பெயர் குறிப்பிடா காசோலைகள் சுங்கத்துறை பறக்கும் படையினரால் பறிமுதல்
இந்திய தேர்தல் ஆணையத்தின் உத்தரவின் படி, தமிழ்நாடு, புதுச்சேரி, கேரளா மற்றும் மேற்கு வங்கம் போன்ற தேர்தல்கள் நடக்கவிருக்கும் மாநிலங்களில் வாக்காளர்களுக்கு பணம் கொடுப்பதை தடுப்பதற்காக சோதனை நடவடிக்கைகளை மத்திய மறைமுக வரிகள் மற்றும் சுங்க வாரியம் மேற்கொண்டு வருகிறது.
இதன் படி, கடத்தல் சரக்குகள் மற்றும் போதை பொருட்கள் உள்ளிட்டவற்றின் நடமாட்டத்தை தடுப்பதற்காக பறக்கும் படைகள், நிலை கண்காணிப்பு படைகள், கடல் ரோந்து குழு மற்றும் சாலை ரோந்து குழு ஆகியவற்றை சுங்கத்துறையின் சென்னை மண்டலம் அமைத்துள்ளது.
2021 மார்ச் 12 வெள்ளியன்று நள்ளிரவில், சரக்கு வாகனம் ஒன்று சென்னை கடற்கரை ரயில் நிலையம் அருகே சென்னை சுங்கத்துறையின் பறக்கும் படையால் தடுத்து நிறுத்தப்பட்டு, சோதனையிடப்பட்ட போது, ரூ 4,39,430 பணம் மற்றும் ரூ 66,000 மதிப்புடைய பெயர் குறிப்பிடாத காசோலைகள் இரண்டு ஆகியவை ஓட்டுநர் கேபினில் இருந்து கைப்பற்றப்பட்டன.
இவற்றுக்கான தகுந்த ஆவணங்களை ஓட்டுநரால் தர இயலாத நிலையில், பணம் மற்றும் காசோலைகள் சுங்க அலுவலர்களால் பறிமுதல் செய்யப்பட்டன.மேற்கண்ட தகவல்களை செய்திக் குறிப்பு ஒன்றில் சுங்கக் கடத்தல் தடுப்பு பிரிவின் உதவி ஆணையர் டாக்டர் ஆர் நாகராஜன் தெரிவித்துள்ளார்.
