முதல்வர் பதவி இல்லையா? எம்எல்ஏவா இருக்கேன்: சிவக்குமார்

கார்கே உடனான தனது சந்திப்பில், சிவக்குமார் காங்கிரஸ் தலைவரிடம், சித்தராமையாவுக்கு ஏற்கனவே முதல்வராக வாய்ப்பு வழங்கப்பட்டுள்ளதாகவும், இப்போது அது அவரது முறை என்றும் கூறியதாக வட்டாரங்கள் தெரிவித்தன.

கர்நாடக மாநில முதல்வராக பதவியேற்கும் போட்டியில் உள்ள காங்கிரஸ் தலைவர் டி.கே.சிவக்குமார், அக்கட்சியின் தலைவர் மல்லிகார்ஜுன் கார்கேவை செவ்வாய்க்கிழமை டெல்லியில் சந்தித்தார். அப்போது சிவக்குமார் அடுத்த முதல்வர் ஆக வேண்டும் என்ற தனது விருப்பத்தை கார்கேவிடம் வெளிப்படுத்திய அவர் 2019இல் காங்கிரஸ் அரசாங்கம் சரிந்த பிறகு மாநிலத்தில் கட்சியை மீண்டும் கட்டியெழுப்ப உதவியதாகக் கூறினார்.

மே 10 சட்டமன்றத் தேர்தலில் அமோக வெற்றி பெற்றதையடுத்து, கர்நாடகாவில் ஆட்சி அமைப்பது குறித்து விவாதிக்க சிவக்குமார் மற்றும் சித்தராமையா இருவரும் காங்கிரஸ் தலைமையைச் சந்திக்க டெல்லிக்கு விரைந்தனர்.

கார்கே உடனான தனது சந்திப்பில், சிவக்குமார் காங்கிரஸ் தலைவரிடம், சித்தராமையாவுக்கு ஏற்கனவே முதல்வராக வாய்ப்பு வழங்கப்பட்டுள்ளதாகவும், இப்போது அது அவரது முறை என்றும் தனக்கு முதல்வர் பதவி மறுக்கப்பட்டால், கட்சியில் எம்எல்ஏவாக மட்டுமே பணியாற்ற விரும்புவதாகவும் அவர் கூறியதாக தெரிகிறது.

சித்தராமையா முதலமைச்சராக இருந்த காலம் தவறான ஆட்சி என்றும், கர்நாடகாவில் உள்ள முக்கிய சமூகமான லிங்காயத்துகள் முன்னாள் முதல்வருக்கு எதிராக இருப்பதாகவும் சிவகுமார் கார்கேவிடம் கூறியுள்ளார்.

ரகசிய வாக்கெடுப்பு முடிவு குறித்து காங்கிரஸ் தலைவர் சோனியா காந்தி மற்றும் முன்னாள் தலைவர் ராகுல் காந்தியுடன் விவாதித்த பிறகு கர்நாடகாவின் அடுத்த முதல்வர் யார் என்பதை காங்கிரஸ் தலைவர் முடிவு செய்வார் என்று கட்சி வட்டாரங்கள் தெரிவித்தன. சோனியா காந்தி தற்போது சிம்லாவில் இருக்கிறார்.

திங்களன்று, கர்நாடகாவிற்கான மூன்று பார்வையாளர்களும் தங்கள் அறிக்கையை கார்கேவிடம் சமர்ப்பித்தனர் மற்றும் கட்சித் தலைவர்களின் கூட்டம் ஐந்து மணி நேரத்திற்கும் மேலாக நீடித்தது.