மக்களவை தேர்தல்: கரூர் தொகுதி ஒரு பார்வை!

கரூர் எம்.பி.தொகுதி பழைய சட்டமன்றத் தொகுதிகள் சீரமைப்புக்கு முன்பு - அரவாக்குறிச்சி, கரூர், கிருஷ்ணராயபுரம் (தனி), மருங்காபுரி, குளித்தலை, தொட்டியம் என இருந்த தொகுதிகள் மறுசீரமைப்பின் காரணமாக கரூர் மக்களவைத் தொகுதியில் இருந்த மருங்காபுரி, குளித்தலை, தொட்டியம் ஆகியவை நீக்கப்பட்டன.

புதிதாக மணப்பாறை, விராலிமலை ஆகிய இரு தொகுதிகள் இணைக்கப்பட்டன. இவை இரண்டும் புதிதாக உருவாக்கப்பட்டவை ஆகும்.

இதுவரை நடந்துள்ள தேர்தல்களில் 7 முறை காங்கிரஸ்ம், 6 முறை அதிமுகவும், திமுகவும், தமாகாவும் தலா ஒரு முறை வென்று உள்ளன.

கரூர் எம்.பி. தொகுதி கொங்கு மண்டலத்தின் கடைமடை பகுதி அல்லது ஆரம்ப பகுதி என இரண்டு வகையாகவும் பார்க்கலாம். இங்கே கவுண்டர்கள் மட்டுமே ஜெயித்து இருக்கிறார்கள். ஆரம்பத்தில் கவுண்டர்கள், பிறகு பிள்ளைமார்கள், அடுத்து மைனாரட்டி, பிறகு கவுண்டர்கள் தொடர்ந்து அவர்களின் கோட்டையாகவும், காங்கிரஸ் கட்சியும், அதிமுகவும் தொடர்ச்சியாக இந்த தொகுதியை தக்கவைத்து கொண்டுள்ளது. அதிமுக கோட்டையிலிருந்து காங்கிரஸ் தொகுதியாக மாற்றுவதற்கான தேர்தலாகவே இந்த தேர்தல் பார்க்கப்படுகிறது.

1957 - பெரியசாமி கவுண்டர் - காங்கிரஸ்.

1957-ல் மதராஸ் மாகாணத்தில் கரூர் மக்களவை தொகுதியில் இந்திய தேசிய காங்கிரஸ் வென்றது. இத்தேர்தலில் 58.45% வாக்குகள் மட்டுமே பதிவானது. சுயேச்சையாக போட்டியிட்ட சேஷய்யனை இந்திய தேசிய காங்கிரஸ் வேட்பாளர் பெரியசாமி கவுண்டர் 32 ஆயிரம் வாக்குகள் வித்தியாசத்தில் வென்றார்.

1962 - ஆர். ராமநாதன் செட்டியார் - காங்கிரஸ்.

சுதந்திர கட்சி 1967 தேர்தலில் கரூர் மக்களவை தொகுதியை கைப்பற்றியது. 1962-ல் வென்ற ராமநாதன் செட்டியார் சுமார் 24 ஆயிரம் வாக்கு வித்தியாசத்தில் தோற்றார். இத்தேர்தலில் கரூரில் 73.62% வாக்குகள் பதிவானது.

1967 - முத்துச்சாமி கவுண்டர் - சுதந்திரா கட்சி.

1971 - கே. கோபால் - காங்கிரஸ்.

1977 - கே. கோபால் - காங்கிரஸ்.

சுமார் 73 ஆயிரம் வாக்குகள் வித்தியாசத்தில் ஸ்தாபன காங்கிரஸ் வேட்பாளர் ராமநாதனை தோற்கடித்தார் இந்திய தேசிய காங்கிரஸ் கட்சியின் வேட்பாளர் கோபால். 1971 தேர்தலில் கரூர் மக்களவை தொகுதியில் 71.18% வாக்குகள் பதிவாகியிருந்தது. கோபால் மீண்டும் 1977 தேர்தலில் வென்றார். இம்முறை 62.26% வாக்குகள்பெற்றார். ஸ்தாபன காங்கிரஸ் கட்சியின் வேட்பாளர் மீனாட்சி சுந்தரம் சுமார் 1,45,000 வாக்குகள் வித்தியாசத்தில் தோல்வியை தழுவினார். இத்தேர்தலில் 70.67% வாக்குப்பதிவு நடந்தது. சுமார் 5 லட்சம் பேர் வாக்களித்தனர்.

1980 - துரை செபாஸ்டியன் - (காங்கிரஸ்)

அதிமுக வேட்பாளர் கனகராஜை சுமார் 74 ஆயிரம் வாக்குகள் வித்தியாசத்தில் வீழ்த்தினார் துரை செபாஸ்டியன். இத்தேர்தலில் 67.44% வாக்குகள் பதிவானது.

1984 - ஏ.ஆர்.முருகையா (காங்கிரஸ்)

எட்டாவது மக்களவை தொகுதியில் 68.36% வாக்குகளை பெற்று திமுக வேட்பாளர் கந்தசுவாமியை தோற்கடித்தார் காங்கிரஸ் கட்சியைச் சேர்ந்த முருகையா. பதிவான சுமார் ஆறு லட்சத்துக்கும் அதிகமான வாக்குகளில் முருகையா 4.13 லட்சம் வாக்குகள் பெற்று அபார வெற்றி பெற்றார். கந்தசுவாமி இரண்டு லட்சத்து முப்பத்து மூன்றாயிரம் வாக்குகள் வித்தியாசத்தில் தோல்வியுற்றார். 1984 தேர்தலில் கரூர் மக்களவை தொகுதியில் 77.25% வாக்குப்பதிவு நடந்தது. இவருடைய மகன் தான் வாசன் முருகையா ரியல்எஸ்டேட் தொழிலும், இன்னோருவர் வாசன் கண் மருத்துவமனையும், வாசன் மெடிக்கல் தொழிலும் செய்து வருகிறார்.

1989 - மு. தம்பிதுரை - (அதிமுக)

1989 தேர்தலில் அதிமுக சார்பில் போட்டியிட்ட தம்பிதுரை வென்றார். பதிவான 7.48 லட்ச வாக்குகளில் தம்பிதுரைக்கு 4.84 லட்ச வாக்குகள் கிடைத்தது. திமுகவின் கே.சி. பழனிசாமி 2.45 லட்ச வாக்குகள் பெற்றார். பாமக 3,679 வாக்குகள் பெற்றது. இந்த தேர்தலில் கரூரில் 71.21% வாக்குப்பதிவு நடந்தது.

1991 - என். முருகேசன் - (அதிமுக)

பத்தாவது மக்களவை தொகுதியில் அதிமுக வேட்பாளர் முருகேசன் பதிவான ஏழு லட்சம் வாக்குகளில் 4.75 லட்சம் வாக்குகள் பெற்றார். திமுக வேட்பாளர் திருநாவுக்கரசு 2.05 லட்சம் வாக்குகள் மட்டுமே பெற்று இரண்டாமிடம் பிடித்தார். பாமக 4,388 வாக்குகள் பெற்று மூன்றாவது இடம் பிடித்தது.

1996 - கே. நாட்ராயன் - (தமாகா)

மூப்பனாரின் தமிழ் மாநில காங்கிரஸ் கட்சியின் வேட்பாளர் நாட்ராயன் கரூரில் 56.12% வாக்குகள் பெற்று வெற்றி பெற்றார். அதிமுகவின் தம்பிதுரை 2.41 லட்சம் வாக்குகள் பெற்று தோல்வியைத் தழுவினார். மதிமுக சார்பில் போட்டியில் டி.பி.மூர்த்தி 8.38% வாக்குகள் பெற்றார். பாஜக வேட்பாளருக்கு ஒரு சதவீத ஓட்டு கூட கிடைக்கவில்லை. இந்த தேர்தலில் 71.20% வாக்குகள் பதிவாகியிருந்தது.

1998 - மு. தம்பிதுரை - (அதிமுக)

1998-ல் நடந்த மக்களவை தேர்தலில் காட்சிகள் மாறின. முந்தைய தேர்தலில் வென்றிருந்த நட்ராயன் இரண்டாமிடத்துக்கு தள்ளப்பட்டார். தம்பிதுரை 43,673 வாக்குகள் வித்தியாசத்தில் வென்றார். இந்த தேர்தலில் 59.84% வாக்குகள் பதிவாகியிருந்தது.

1999 - எம்.சின்னசாமி - (அதிமுக)

1999-ல் மீண்டும் மக்களவை தேர்தல் நடந்தது. இதில் அதிமுக வேட்பாளர் சின்னசாமி வெறும் மூவாயிரம் வாக்குகள் வித்தியாசத்தில் திமுக வேட்பாளர் கே.சி.பழனிசாமியை வென்றார். தமிழ் மாநில காங்கிரஸ் சார்பில் போட்டியிட்ட நட்ராயன் 6.33% வாக்குகள் அதாவது 45 ஆயிரம் வாக்குகள் பெற்றிருந்தார். இந்த தேர்தலில் 62.94% வாக்குகள் பதிவானது.

2004 - கே. சி. பழனிசாமி - (திமுக)

இரண்டு முறை கரூர் மக்களவை தொகுதியில் தோல்வியைத் தழுவியிருந்த கே.சி.பழனிசாமி தனது 69-வது வயதில் 2004 மக்களவை தேர்தலில் கரூரில் வென்றார். இம்முறை அதிமுக வேட்பாளரை சுமார் 1.91 லட்சம் வாக்குகள் வித்தியாசத்தில் வீழ்த்தினார்.

2009 - மு. தம்பிதுரை - (அதிமுக)

2009 மக்களவை தேர்தலில் .சுமார் 47 ஆயிரம் வாக்குகள் வித்தியாசத்தில் அதிமுக சார்பில் நிறுத்தப்பட்ட தம்பிதுரை வென்றார். தேமுதிக வேட்பாளர் ராமநாதன் 51 ஆயிரம் வாக்குகள் பெற்றது குறிப்பிடத்தக்கது.

2014 - மு. தம்பிதுரை - (அதிமுக)

கடந்த 2014 மக்களவை தேர்தலிலும் தம்பிதுரை வென்றார். இம்முறை சுமார் 1.95 லட்சம் வாக்குகள் வித்தியாசத்தில் திமுக வேட்பாளர் சின்னசாமியை வீழ்த்தினார். தேமுதிக வேட்பாளர் கிருஷ்ணன் 76 ஆயிரம் வாக்குகள் பெற்றார். இந்திய தேசிய காங்கிரஸ் சார்பில் நின்ற ஜோதிமணிக்கு 30 ஆயிரம் வாக்குகள் கிடைத்தது. 13,733 பேர் நோட்டாவுக்கு வாக்களித்தனர்.

2019இல் ஜோதிமணி வெற்றி பெற்றார்.

ஆறு முறை திமுக - அதிமுக நேரடியாக மோதியுள்ளன. இதில் ஒரே ஒரு முறை மட்டுமே திமுக வென்றது. இதுவரை 7 முறை காங்கிரஸ் கட்சி இங்கே வென்றுள்ளது.

தற்போதைய 2024 தேர்தலில் காங்கிரஸ் சார்பாக ஜோதிமணி, பாஜக சார்பாக செந்தில்நாதன், அதிமுக சார்பா தங்கவேல் போட்டியில் உள்ளனர்.