உங்களுக்கும் சுருள் முடி வேகமா வளரணுமா ? அப்ப இந்த டிப்ஸ் ஃபாலோ பண்ணுங்க..! ஆண்களும்தான்!

சுருள் முடி உள்ளவர்களுக்கு முடி நீளமாக இருந்தாலும் குறைவாகவே தெரியும். முடி சுருண்டு சுருண்டு இருப்பதால் இது குறைவான நீளத்தை கொண்டிருப்பது போன்ற தோற்றத்தை தருகிறது. இருப்பினும் சுருள் முடி உடையவர்கள் எவ்வாறு நீளமாக முடியை வளர்க்கலாம் என்பதை குறித்து நாம் இங்கு சில குறிப்புகளை தெரிந்து கொள்ளலாம். அதே நேரத்தில் சுருள் முடி உடையவர்கள் எவ்வாறு தங்களது கூந்தலை கவனித்துக் கொள்ள வேண்டும், பராமரிப்பு முறைகள் போன்றவற்றை குறித்தும் நாம் இங்கு தெரிந்து கொள்ளலாம்.

சுருள் முடி உடையவர்களுக்கு அவர்களது கூந்தலை பராமரிப்பது சற்று சிரமமான காரியமாக இருக்கலாம். முடி வளர்ச்சியின் போது இது போன்ற சுருள் முடிகளை நிர்வகிப்பது ஒரு சிலருக்கு பிரச்சனையாக இருக்கலாம். அதே நேரத்தில் நாம் சரியான பராமரிப்பு நடவடிக்கை முறைகளை மேற்கொள்ளும் போது சுருள் முடி உடையவர்களும் நீளமான முடி வளர்ச்சியை பெற முடியும். ஆரோக்கியமான வழிமுறைகளின் மூலம் சுருள் முடி உடையவர்கள் முடி வளர்ச்சியை மேம்படுத்தக்கூடிய பல வழிகள் உள்ளன. இந்த கட்டுரையில் நாம் சுருள் முடியை எவ்வாறு நீளமாக அல்லது முடி வளர்ச்சியை எவ்வாறு ஊக்குவிப்பது என்பதை குறித்து குறிப்புகளை பற்றி தெரிந்து கொள்ளலாம்.

சுருள் முடி பற்றி நீங்கள் தெரிந்து கொள்ள வேண்டியது

சுருள் முடியை நீளமாக வளர்க்க வேண்டும் என்று நீங்கள் ஆசைப்பட்டால் அதற்கு முதலில் நீங்கள் அந்த கூந்தலின் தன்மையை பற்றி புரிந்துகொள்ள வேண்டும். மற்ற முடி வகைகளை விட இந்த சுருள் முடி வகையை கொண்ட நபர்கள் தங்களது கூந்தலை ஈரப்பதமாகவும், வறட்சி ஏற்படாமலும் பாதுகாக்க வேண்டியது அவசியம்.

நீங்கள் கூந்தலில் எண்ணெய் தேய்க்கும் போது உச்சந்தலை முதல் நுனி வரை எண்ணெய் நன்றாக பிடித்துக் கொள்ளுமாறு தேய்க்க வேண்டும். சுருள் முடியை கொண்டவர்களுக்கு அடிக்கடி முடியில் சிக்கு ஏற்படும் என்பதால் அவர்களுக்கு அதனை பராமரிப்பது மிகவும் சிரமமான காரியமாக இருக்கும். எனவே முடிவில் சிக்கு ஏற்படாமல், வறட்சி ஏற்படாமல் பாதுகாக்க வேண்டியது மிகவும் அவசியம். தினமும் 2-3 முறையேனும் கூந்தலை சீவி விட வேண்டும். இது போன்ற வறட்சி மற்றும் முடியில் ஏற்படும் சிக்குகள் கூந்தலை அதிகமாக பாதிக்க கூடியவை. இது முடி உதிர்வுக்கு வழிவகுக்கும்.

வறட்சி தடுக்க வேண்டும்

எந்த வகையான கூந்தலாக இருந்தாலும் கூந்தலில் வறட்சி ஏற்படும் போது அது கூந்தலின் தன்மையை பாதிக்கிறது. இதனால் முடி உதிர்வு, பொடுகு பிரச்சனை, போன்ற பாதிப்புகள் ஏற்பட்டு முடி வளர்ச்சியும் பாதிக்கப்படுகிறது.

ஆரோக்கியமான உணவு பழக்க வழக்கம்!

வெளியில் இருந்து கூந்தல் ஆரோக்கியத்தை பாதுகாப்பதற்கு முன்பு உள்ளிருந்தும் கூந்தல் ஆரோக்கியத்தை பாதுகாக்க கூடிய விஷயங்களை நாம் செய்ய வேண்டும். ஆரோக்கியமான உணவு பழக்க வழக்கம் உச்சந்தலையில் வறட்சி ஏற்படாமல் தடுக்க உதவுகிறது. உங்களது தினசரி உணவுகளில் நார்ச்சத்து நிறைந்த காய்கறிகள் மற்றும் பழங்களை சேர்த்துக் கொள்வதன் மூலம் உடலில் நீர் சத்து குறைபாடு ஏற்படுவது தடுக்கப்படுகிறது. இதனால் கூந்தலில் ஈரப்பதம் தக்க வைக்கப்படுகிறது.

சுருள் முடி பராமரிப்பில் பயன்படுத்தப்படும் பொருள்கள்

• கூந்தலில் பயன்படுத்தக்கூடிய பொருட்கள் ஆர்கானிக் முறையில் தயாரிக்கப்பட்ட பொருட்களாக இருப்பது சிறந்தது.
• இயற்கையான முறையில் முடியை கண்டிஷனிங் செய்ய வீட்டில் கிடைக்கக்கூடிய தயிர் மற்றும் முட்டை போன்றவற்றை நீங்கள் பயன்படுத்தலாம்.
• சந்தைகளில் முடி வளர்ச்சியை ஊக்குவிக்க கூடிய பல ஷாம்பூக்கள் கிடைக்கின்றன. அவற்றில் ரசாயனங்கள் கலக்காத ஷாம்புக்களை தேர்ந்தெடுத்து பயன்படுத்தலாம்.
• அதே போன்று கூந்தலுக்கு பயன்படுத்த வாங்கும் பொருட்களில் சல்பேட் இல்லாத பொருட்களாக பார்த்து வாங்க வேண்டியது அவசியம். இவை முடி வளர்ச்சியை சேதப்படுத்தக்கூடிய பண்புகளை கொண்டுள்ளன.

• மூலிகைகள் , இயற்கை பொருள்கள் மற்றும் ரசாயனம் கலக்காத பொருள்களிலிருந்து தயாரிக்கப்பட்டவற்றை மட்டும் பயன்படுத்த வேண்டும். கூந்தலில் வறட்சி ஏற்படாமல் ஈரப்பதத்தை தக்க வைக்க உதவுகிறது.
• கூந்தலில் வறட்சி ஏற்படாமல் தடுப்பதற்கு வாரத்துக்கு இருமுறை கண்டிஷனரை பயன்படுத்துவது மிகவும் சிறந்தது. பெரும்பாலும் ரசாயனங்கள் கலந்த ஷாம்பு மற்றும் கண்டிஷனரை பயன்படுத்துவதை தவிர்க்கவும்.
• சுருள் முடிக்கு ஏற்ற சீரம் பயன்படுத்தலாம்.
• அதே நேரத்தில் முடிக்காக நீங்கள் மருத்துவர் உதவியை நாடுகிறீர்கள் என்றால் ரசாயனம் சார்ந்த சிகிச்சை முறைகளை தவிர்ப்பது சிறந்தது.

சுருள் முடி இருப்பவர்கள் ஹீட் ஸ்டைலிங் மற்றும் கெமிக்கல் சிகிச்சைகள் செய்யலாமா?

கூந்தலில் ஹீட் ஸ்டைலிங் போன்ற முறைகளை பயன்படுத்தக் கூடாது. அதே நேரத்தில் கெமிக்கல் சிகிச்சைகள் போன்றவற்றை கூந்தலில் உட்படுத்தக் கூடாது. ஏனெனில் ஹீட் ஸ்டைலிங் செய்யும் போது அதிலிருந்து வெளிப்படக்கூடிய வெப்பம் உங்கள் கூந்தலை சேதப்படுத்தலாம். இதனால் கூந்தலில் முடி உதிர்வு போன்ற பாதிப்புகள் ஏற்படும் வாய்ப்புகள் உள்ளது. மேலும் கூந்தலில் அடிக்கடி சிகிச்சைகளை மேற்கொள்வது கூந்தல் வளர்ச்சியை பாதித்து முடி உதிர்வு போன்ற பாதிப்புகளை ஏற்படுத்தக்கூடும். அதனால் இயற்கையான முறையில் செய்யப்படும் சிகிச்சை முறைகளை மேற்கொள்ளலாம்.

சுருள் முடி இருப்பவர்கள் அன்றாடம் செய்ய வேண்டிய பராமரிப்புகள்

கூந்தல் பராமரிப்பு!

சுருள் முடியை கொண்டவர்கள் கூந்தலை ரெகுலராக பராமரிக்க வேண்டியது மிகவும் அவசியம். ஏனெனில் சுருள் முடி உடையவர்களுக்கு அடிக்கடி சிக்கு ஏற்படும் என்பதால் முடியை ட்ரிம் செய்வது சிறந்தது. குறைந்தது 8 லிருந்து 12 வாரங்களுக்கு ஒரு முறை கூந்தலை ட்ரிம் செய்து கொள்ளலாம். அதே நேரத்தில் சுருள் முடியில் அதிக சிக்கு ஏற்படும் என்பதால் பெரிய பற்களாக கொண்ட சீப்புகளை பயன்படுத்துவது சிறந்தது.

தலையணை உறை

நாம் தூங்கும் போது பயன்படுத்தக்கூடிய தலையணை உறைகள் கூட உங்கள் முடியில் உராய்வுகளை ஏற்படுத்தி முடியை சேதப்படுத்தக் கூடும். எனவே கூந்தலுக்கு பாதிப்பு ஏற்படுத்தாத வகையில் உள்ள தலையணை உறைகளை பயன்படுத்துவது மிகவும் அவசியம் என்பதை புரிந்து கொள்ளுங்கள். பட்டு தலையணை உறை பயன்படுத்தலாம்.

ஊட்டச்சத்து நிறைந்த உணவுகள்

நாம் முன்னரே குறிப்பிட்டபடி ஊட்டச்சத்து நிறைந்த உணவுகள் நமது உடல் ஆரோக்கியத்தை மட்டுமல்லாது கூந்தல் ஆரோக்கியத்தையும் மேம்படுத்த உதவுகிறது. நமது உணவில் முடி ஆரோக்கியத்தை மேம்படுத்தக்கூடிய ஊட்டச்சத்துக்கள் நிறைந்துள்ளதா என்பதை நாம் கவனிக்க வேண்டும். நீர்ச்சத்து என்பது கூந்தல் வளர்ச்சியை மேம்படுத்தக்கூடிய மிக முக்கிய காரணியாகும். எனவே நமது உணவில் நீர்ச்சத்து நிறைந்த காய்கறிகள் மற்றும் பழங்களை தினசரி சேர்த்து கொள்வது நல்லது. உங்கள் உணவில் முடி வளர்ச்சியை ஊக்குவிக்க கூடிய முட்டை, சர்க்கரை வள்ளிக்கிழங்கு, தயிர், அவகேடோ, கேரட், கீரைகள், கொட்டைகள், விதைகள் மற்றும் பழங்கள் போன்றவற்றை தவிர்க்காமல் சேர்க்க வேண்டியது அவசியம்.

சுருள் முடி வளர்ச்சியை ஊக்குவிக்க கூடிய எண்ணெய்கள்

• சுருள் முடி உடையவர்கள் தங்கள் முடி வளர்ச்சியை ஊக்குவிப்பதற்கு நாம் தினசரி பயன்படுத்தக்கூடிய தேங்காய் எண்ணெயை தாராளமாக பயன்படுத்தலாம். தேங்காய் எண்ணெயில் உள்ள பண்புகள் நமது தலைமுடிக்கு ஈரப்பதத்தையும் தேவையான ஊட்டச்சத்துக்களையும் கொடுத்து முடி வளர்ச்சியை ஊக்குவிக்கும்.
• தற்போது சந்தைகளில் முடி வளர்ச்சியை ஊக்குவிக்க மிகவும் பிரபலமாக அறியப்படும் எண்ணெய்களில் ரோஸ்மெரி எண்ணெய், ஆர்கன் எண்ணெய், ஆலிவ் எண்ணெய் என பலவும் உண்டு. தினசரி பயன்பாட்டில் இவற்றை சேர்த்துக் கொள்வது முடி வளர்ச்சியை ஊக்குவித்து முடி உதிர்வை தடுக்க உதவும்.
• விளக்கு எண்ணெயில் முடி வளர்ச்சி ஊக்குவிக்க கூடிய பல பண்புகள் நிறைந்துள்ளதால் இவற்றை வாரத்திற்கு இருமுறை பயன்படுத்தலாம்.
• நல்லெண்ணெய் குளியல் கூந்தலுக்கு ஏற்படும் உஷ்ணத்தை தணிக்க செய்யும். தலைக்குளியலுக்கு முன்பு மசாஜ் செய்வதற்கு இந்த எண்ணெயை பயன்படுத்தலாம்.
• இவை தவிர கூந்தல் தைலம் வெங்காயம், வெந்தயம், கரிசலாங்கண்ணி, மருதாணி, கறிவேப்பிலை, கருஞ்சீரகம் போன்ற மூலிகைகளை பயன்படுத்தி வீட்டில் எண்ணெய் காய்ச்சி பயன்படுத்தலாம்.

சுருள் முடி வைத்திருப்பவர்கள் செய்ய வேண்டியவை செய்ய கூடாதவை

• சுருள் முடியை உடையவர்கள் கூந்தல் வளர்ச்சியை மேம்படுத்துவதற்கு குளித்தவுடன் தலையை நன்றாக உலர வைக்க வேண்டியது அவசியம்.
• வேகமாக கூந்தலை உலர வைக்க ஹேர் டிரையர் போன்றவற்றை பயன்படுத்துவதை தவிர்க்கவும்.நீங்கள் பயன்படுத்தும் துண்டு மென்மையானதாக இருக்குமாறு பார்த்துக் கொள்ளுங்கள். சுத்தமான காட்டன் துணியினால் ஆன துண்டுகளை பயன்படுத்தலாம்.
• உங்கள் கூந்தலில் நீர் அதிகமாக இல்லாமல் நன்றாக துடைக்க வேண்டும்.
• கூந்தலை விரித்துவிடாமல் கூந்தலை நன்கு சீவி பின்னல் போட்டுக் கொள்வது முடியில் சிக்கு ஏற்படாமல் முடி உதிர்வை தடுக்க உதவும்.
• ஈரமான கூந்தலை அதிகமாக சீவ வேண்டாம். இது முடி உடைதலை ஊக்குவிக்கும்.

தவிர்க்க வேண்டியவை!

• பெரும்பாலும் முடி உதிர்வு பிரச்சனை உள்ளவர்கள் செய்யும் மிகப்பெரிய தவறு தினசரி தலைக்கு குளிப்பது. வாரத்திற்கு மூன்று அல்லது தேவைப்பட்டால் மட்டுமே தலைக்கு குளிப்பது நல்லது.
• கூந்தலில் அதிக ரசாயனங்களை பயன்படுத்துவது முடி உதிர்வை ஏற்படுத்தும். அதே நேரத்தில் அடிக்கடி ஷாம்புக்களை மாற்றுவது, தரமற்ற பொருட்களை கூந்தலில் பயன்படுத்துவது போன்றவை முடி உதிர்வை ஏற்படுத்தக்கூடிய காரணிகள் ஆகும்.
• கூந்தலில் வெடிப்புகள் இருந்தால் அதனை கவனமாக கவனித்து சரி செய்ய வேண்டும். ஏனெனில் இது முடி உதிர்வு ஏற்படுத்தக்கூடிய மிக முக்கிய காரணிகளில் ஒன்றாகும்.