திருச்சி திருவானைக்காவலில் பிரபல ரவுடி வெட்டிக் கொலை

திருச்சியில் பிரபல ரவுடி மண்டை வெட்டி மாதவன் கொடூரமாக வெட்டி கொலை செய்யப்பட்டார்.

திருச்சி மாவட்டம் மண்ணச்சநல்லூர் பகுதியை சேர்ந்தவர் மண்டை வெட்டி மாதவன் (வயது50). பிரபல ரவுடியான இவர் மீது திருச்சி மாநகரம் மற்றும் புறநகர் பகுதிகளில் உள்ள போலீஸ் நிலையங்களில் கொலை, கடத்தல், வழிப்பறி மற்றும் கஞ்சா கடத்தியது உள்பட பல்வேறு வழக்குகள் நிலுவையில் உள்ளன. மேலும் இவர் பிரபல ரவுடி குணாவின் கூட்டாளி என்றும் கூறப்படுகிறது.

இந்நிலையில் திருச்சி திருவானைக்காவல் சன்னதி வீதி நாலுகால் மண்டபம் அருகில் இன்று காலை இவர் உடல் முழுவதும் ரத்த காயங்களுடன் பிணமாக கிடந்தார். அவரது உடல் முழுவதும் ரத்தம் வழிந்தோடி இருந்தது. இதுபற்றிய தகவல் அறிந்ததும் ஸ்ரீரங்கம் போலீசார் அங்கு விரைந்து வந்து மாதவன் உடலை கைப்பற்றி பிரதே பரிசோதனைக்காக திருச்சி அரசு மருத்துவமனைக்கு அனுப்பி வைத்தனர்.

மேலும் இது தொடர்பாக போலீசார் ஒரு வழக்குப்பதிவு செய்து விசாரணை நடத்தி வருகிறார்கள். போலீசார் நடத்திய முதல் கட்ட விசாரணையில் முன்விரோதம் காரணமாக பழிக்குப்பழியாக ரவுடி மாதவன் எதிர் கோஷ்டியினரால் வெட்டி கொலை செய்யப்பட்டு இருக்கலாம் என தெரிய வந்துள்ளது. கொலையாளிகளை போலீசார் வலைவீசி தேடி வருகிறார்கள்.

கொலை நடந்த நடந்த இடத்திற்கு போலீஸ் துப்பறியும் நாய் வரவழைக்கப்பட்டது. ஆனால் அது யாரையும் கவ்வி பிடிக்கவில்லை.திருச்சியில் ரவுடி கொலை செய்யப்பட்ட சம்பவம் பெரும் பரபரப்பை ஏற்படுத்தி உள்ளது.

ரவுடி மாதவன் யாருடனாவது பிரச்சினை தகராறு என்று வந்தால் அரிவாளால் அவர்களது மண்டையில் வெட்டி விட்டு ஓடி விடுவாராம். இதன் காரணமாக தான் இவருக்கு மண்டை வெட்டி மாதவன் என அடைமொழி பெயர் வந்துள்ளது.