தனி ஒருவன் 2 .. பூஜையே முடிஞ்சிடிச்சாம்ப்பா...!

சென்னையில் நேற்று நடைபெற்ற 'தனி ஒருவன் 2' படத்தின் பூஜையுடன், மீண்டும் இணைகிறது வெற்றிக் கூட்டணி. ரசிகர்களின் நீண்ட காலக் காத்திருப்புக்கு ஒரு முற்றுப்புள்ளி வைத்திருக்கிறது படக்குழு. இந்த படத்தை தயாரிக்க இருப்பது ஏஜிஎஸ் நிறுவனம் தான். ஏப்ரல் மாதம் முதல் படப்பிடிப்பு துவங்கும் என்றும் தகவல் வெளியாகியுள்ளது.

மீண்டும் களமிறங்கும் 'தனி ஒருவன்'

ஆக்‌ஷன் த்ரில்லர்களில் தனக்கென ஓர் இடத்தைப் பிடித்தவர் இயக்குநர் மோகன் ராஜா. அவருடைய 'தனி ஒருவன்' திரைப்படம் விமர்சன ரீதியாகவும், வசூலிலும் மாபெரும் வெற்றி பெற்றது. சாமானியனை மையப்படுத்திய கதையும், அதிரடி திருப்பங்களும், அரவிந்த் சாமியின் அபார வில்லத்தனமும் படத்தின் மிகப்பெரிய பலம்! இந்தப் படத்தின் இரண்டாம் பாகத்திற்காக ரசிகர்கள் நீண்ட நாட்களாகக் காத்துக் கொண்டிருக்கின்றனர்.

பூஜையுடன் தொடங்கும் களம்

இந்தக் காத்திருப்புக்கு நேற்றைய பூஜையுடன் விடை கிடைத்துள்ளது. 'தனி ஒருவன் 2' படத்தின் படப்பிடிப்பு விரைவில் தொடங்கவிருக்கிறது. மீண்டும் ஜெயம் ரவி – மோகன் ராஜா கூட்டணி ரசிகர்களிடையே பெரும் எதிர்பார்ப்பை கிளப்பியிருக்கிறது.

சைரன் வெற்றி, புதிய பரிமாணங்கள்…

தற்போது திரையரங்குகளில் வெற்றிகரமாக ஓடிக்கொண்டிருக்கும் 'சைரன்' படத்தில் ஜெயம் ரவி அசத்தியிருக்கிறார். இதனிடையே, கமல்ஹாசன் - மணிரத்னம் கூட்டணியில் உருவாகும் புதிய படமான 'தக் லைஃப்' படத்திலும் ஜெயம் ரவி முக்கிய கதாபாத்திரத்தில் நடிக்கிறார். இந்தப் படங்களுக்குப் பிறகே 'தனி ஒருவன் 2' தொடங்கும் என எதிர்பார்க்கப்படுகிறது.

பழைய கூட்டணி, புது எதிர்பார்ப்புகள்

'தனி ஒருவன்' படத்தில் நயன்தாரா நாயகியாக நடித்தார். இப்படத்தின் இரண்டாம் பாகத்தில் நாயகி யார், படத்தின் மற்ற நட்சத்திரங்கள், தொழில்நுட்பக் கலைஞர்கள் என படக்குழுவின் முழு விவரங்கள் விரைவில் அதிகாரப்பூர்வமாக வெளியாகும். நயன்தாராதான் அனேகமாக இந்த படத்தில் நாயகியாக இருக்கலாம் அதே நேரம் படத்தில் இன்னும் இரண்டு நாயகிகள் இருப்பார்கள் என்று கூறப்படுகிறது. ஜெயம் ரவியின் அணியில் இந்த முறை பெண் ஒருவர் டிடெக்டிவாக இருப்பார் என்று தெரிகிறது.

வில்லன் யார்?

முதல் பாகத்தில் சர்வ வல்லமை படைத்த வில்லனாக மிரட்டிய அரவிந்த் சாமி, இந்த இரண்டாம் பாகத்திலும் வருவாரா என்ற கேள்வி பல ரசிகர்களின் மனங்களில் எழுந்துள்ளது. ஆனால் அவர் இறந்துவிட்டதாகவே காட்டியிருந்தார்கள். மோகன் ராஜா, படத்தின் கதையைப் பற்றி எந்த துப்பும் கொடுக்காமல் இரகசியம் காத்து வருவதால், 'தனி ஒருவன் 2' படத்தின் மீதான ஆர்வமும் எதிர்பார்ப்பும் பன்மடங்கு அதிகரித்துள்ளது. தனி ஒருவன் படத்தின் நாயகன், நாயகி ஆகிய இரு கதாபாத்திரங்களை மட்டும் வைத்துக் கொண்டு இன்னும் பல புதிய நடிகர்களை களமிறக்க முடிவு செய்துள்ளாராம் மோகன் ராஜா. அதில் ஹாலிவுட்டிலிருந்து வில்லன் நடிகர் ஒருவரை இறக்கலாமா அல்லது பாலிவுட்டில் முன்னாள் கதாநாயகன் ஒருவரை வரவழைக்கலாமா என்று யோசித்து வருகிறாராம்.

ஆக்‌ஷன் த்ரில்லரின் மறுவருகை

'தனி ஒருவன்' படத்தைப் போல் இரண்டாம் பாகமும், விறுவிறுப்பான ஆக்‌ஷன் படமாக உருவாகும் என்று நம்பலாம். சமூகப் பிரச்சனைகளைக் கருப்பொருளாகக் கொண்டு உருவான முதல் பாகம் போலவே, இந்தப் படத்திலும் ஒரு முக்கியமான விஷயத்தை மையப்படுத்தியிருப்பாரா மோகன் ராஜா என்கிற ஆர்வமும் ரசிகர்களிடையே எழுந்துள்ளது.

இந்தக் காத்திருப்புகள் அனைத்திற்குமான விடை கிடைக்க இன்னும் சில மாதங்கள் ஆகலாம்!