சூர்யா 42 தலைப்பு இதுதானா? தமிழ் புத்தாண்டில் வெளியாகிறதாம்!

சூர்யா 42 படத்தின் தலைப்பு லீக்காகி உள்ளது. இதுவரை அதிகாரப்பூர்வமாக அறிவிக்கப்படாத நிலையில் இதுதான் டைட்டில் என நம்பத்தகுந்த வட்டாரத் தகவல்கள் தெரிவிக்கின்றன. அதே நேரம் படத்துக்காக இரண்டு தலைப்புகள் தேர்வு செய்யப்பட்டு இருப்பதாகவும் அதில் ஒன்றுதான் இது என்றும் தெரிகிறது.

தமிழ் சினிமாவின் உச்ச நட்சத்திரங்களான கமல்ஹாசன், ரஜினிகாந்த் இருவருக்கும் பிறகு விஜய், அஜித், சூர்யா எனும் மூன்று பேரும் மிகப் பெரிய பிஸினஸ்ஸை கையில் வைத்திருக்கும் நடிகர்களாக இருக்கின்றனர். அவ்வப்போது சூர்யா விஜய், அஜித் இருவரையும் ஓவர்டேக் செய்வதும், பின்தங்குவதுமாக இருந்து வருகிறார். அஜித் கூட இந்த ரேஸில் பெரிய அளவில் கவனம் செலுத்தாமல் இருப்பார் ஆனால் சூர்யாவும், விஜய்யும் போட்டி போட்டுக் கொண்டிருக்கின்றனர்.

ஒரு காலத்தில் அஜித், விஜய் இருவரும் தொடர் தோல்விகளைச் சந்தித்துக் கொண்டிருந்த போது சூர்யா ஓவர்டேக் செய்து ஓடிவந்துகொண்டிருந்தார். ஆனால் விஜய்யும் அஜித்தும் தங்களது பிஸினஸ்ஸை வேறு லெவலுக்கு உயர்த்தும்போது சூர்யாவால் அதனை செய்யமுடியாமல் போய்விட்டது. காரணம் அடுத்தடுத்து தோல்விப் படங்களைக் கொடுத்தார் சூர்யா.

இப்போது மீண்டும் வெற்றிப் பாதைக்கு திரும்பியிருக்கிறார் சூர்யா. இப்போது சூரரைப் போற்று, ஜெய்பீம் என இரண்டு தொடர் வெற்றிகளைக் கொடுத்து அடுத்ததாக சூர்யா 42 படத்துக்காக காத்திருக்கிறார்.

சுதா கொங்கரா இயக்கத்தில் சூர்யா நடித்த சூரரைப் போற்று படம் மிகப் பெரிய அளவில் வரவேற்பை பெற்றது. சிறந்த நடிகருக்கான தேசிய விருதை அந்த படம் பெற்றுத் தந்தது. இதனைத் தொடர்ந்து அவர் நடிப்பில் த செ ஞானவேல் இயக்கிய ஜெய்பீம் படமும் நல்ல விமர்சனங்களைப் பெற்றது.

சமீபத்தில் கமல்ஹாசன் நடிப்பில் லோகேஷ் கனகராஜ் இயக்கிய விக்ரம் படத்தில் கிளைமேக்ஸ் காட்சியில் தலையைக் காட்டினார் சூர்யா. அப்போதி்லிருந்து அவர் ரோலெக்ஸாக மிளிர்ந்து வருகிறார். ஐந்து நிமிடங்கள் வந்தாலும் மக்கள் மனதில் மிகப் பெரிய தாக்கத்தை ஏற்படுத்தியிருப்பார். அதே கதாபாத்திரத்தைக் கொண்டு விக்ரம் பார்ட் 2 வரும் எனவும் தகவல் வெளியாகியுள்ள நிலையில், தற்போது அவர் சிறுத்தை சிவா இயக்கத்தில் நடித்து வரும் படத்துக்கு மிகப் பெரிய வியாபாரம் ஏற்பட்டுள்ளது.

இதுவரை சூர்யாவின் சினிமா வரலாற்றிலேயே இல்லாத அளவுக்கு மிகப் பெரிய பொருட்செலவில் உருவாகி வரும் இந்த படம் 10 மொழிகளில் வெளியிடப்படவிருக்கிறதாம். இதனால் டிஜிட்டல் ரைட்ஸும் மிகப் பெரிய தொகைக்கு விலை போயிருக்கிறது. அமேசான் ப்ரைம் வீடியோஸ் நிறுவனம் இதனை மிகப் பெரிய தொகைக்கு வாங்கியிருக்கிறது.

இந்த படத்துக்கு அக்னீஸ்வரா என்று தலைப்பு வைக்கப்பட்டிருப்பதாக கூறப்படுகிறது. இது மற்ற மொழிகளில் அதற்கு ஏற்றவாறு மொழிபெயர்க்கப்படும் என்றும் கூறப்படுகிறது. அதாவது தமிழில் அக்னீஸ்வரன் என்றும், ஹிந்தியில் அக்னீஸ்வர் என்றும் வைக்கப்படுமாம். இந்நிலையில் இன்னொரு பெயர் வீர். இரண்டில் எதை படத்துக்கு வைக்கிறார்கள் என்பது தெரியவில்லை.

இந்நிலையில் இந்த படத்தின் டைட்டில் லுக் ஒன்று தயாராகி இருக்கிறதாம். இதனை வரும் ஏப்ரல் 16ம் தேதி வெளியிட தயாரிப்பு தரப்பு முடிவு செய்துள்ளது. மோஷன் போஸ்டரோடு சேர்த்து டைட்டில் லுக்கும் வெளியாகும் என்று கூறப்பட்டு வரும் நிலையில், சூர்யா பிறந்த நாளுக்கு மிகப் பெரிய அப்டேட் ஒன்று காத்திருப்பதாக தகவல் வெளியாகியுள்ளது.