வந்தியத்தேவன் மேக்கிங் வீடியோவை வெளியிட்ட பொன்னியின் செல்வன் படக்குழு

இயக்குநர் மணிரத்னத்தின் இயக்கத்தில் மிக பிரமாண்டமாக உருவாகிய பொன்னியின் செல்வன் முதல் பாகம், கடந்த செப்டம்பர் 30ஆம் தேதி உலகெங்கிலும் வெளியாகி பெரும் வரவேற்பைப் பெற்றது. லைகா புரொடக்சன்ஸ் – மெட்ராஸ் டாக்கீஸ் தயாரித்த இத்திரைப்படத்தில் ஜெயம் ரவி, விக்ரம், கார்த்தி, த்ரிஷா, ஐஷ்வர்யா ராய், சரத்குமார், பார்த்திபன், பிரகாஷ் ராஜ், விக்ரம் பிரபு, ஷோபிதா, ஐஷ்வர்யா லக்‌ஷ்மி உள்ளிட்ட மிகப் பெரிய நடிகர் பட்டாளம் கால்பதித்திருந்தது.

இசைப்புயல் ஏ.ஆர்.ரகுமான் இசையமைத்த இத்திரைப்படம், புகழ்பெற்ற எழுத்தாளர் கல்கியின் நாவலை அடிப்படையாகக் கொண்டு உருவாகப்பட்டது. பொன்னியின் செல்வன் முதல் பாகம், ரூ.500 கோடிக்கும் மேல் வசூலித்து சாதனை படைத்தது. கலவையான விமர்சனங்களைப் பெற்றிருந்தாலும், வெற்றிப் படமாகவே பொன்னியின் செல்வன் கருதப்படுகிறது.

முதல் பாகமே ரசிகர்களின் எதிர்பார்ப்பை பூர்த்தி செய்த நிலையில், பொன்னியின் செல்வன் திரைப்படத்தின் இரண்டாம் பாகம் வரும் ஏப்ரல் 28ம் தேதி வெளியாகும் என படக்குழு அறிவித்தது. மேலும் இத்திரைப்படத்தின் முதல் பாடலான ’அக நக’ மார்ச் 20 ஆம் தேதி வெளியாகவுள்ளது.

இந்நிலையில் இத்திரைப்படத்தில் வந்தியத்தேவன் கதாபாத்திரம் வடிவமைக்கப்பட்ட விதத்தை படக்குழு வெளியிட்டுள்ளது. வந்தியத்தேவன் கதாபாத்திரத்தில் கார்த்தி நடித்திருந்தார். அவருக்கான ஆடை, அணிகலன்கள் எவ்வாறு தயாரிக்கப்பட்டன, தேர்வு செய்யப்பட்டன போன்றவை இந்த மேக்கிங் வீடியோவில் இடம் பெற்றுள்ளன. இந்த மேக்கிங் வீடியோ தற்சமயம் சமூக வலைத்தளங்களில் வைரலாகி வருகிறது.