கமல் தந்த கனிந்த முத்தம்..!

பாக்ஸ் ஆபீஸின் வெற்றிப் படமாக வலம் வந்துகொண்டிருக்கிறது கமலின் 'விக்ரம்'. இயக்குநர் லோகேஷ் கனகராஜின் இயக்கத்தில் கமல், ஃபஹத் ஃபாசில், விஜய்சேதுபதி, சூர்யா உள்ளிட்ட நட்சத்திர அணிவகுப்பில் ஜூன் 3-ம் தேதி வெள்ளித்திரையில் பல்வேறு மொழிகளில் உலகெங்கும் வெளியான ' விக்ரம்' தற்போது மூன்றாவது வாரத்தில் ஓடிக்கொண்டிருக்கிறது.

ஏற்கெனவே உள்ள பல சாதனைகளை முறியடித்துள்ள 'விக்ரம்' வெற்றிப் பாதையில் விரைந்துகொண்டிருக்கிறது. இப்படத்தின் சக்சஸ் மீட் நிகழ்வு, சென்னை கிண்டி ரேஸ் கோர்ஸில் பிரமாண்டமாக நடந்தது. அந்நிகழ்வில் இயக்குநர் லோகேஷ் கனகராஜ், விஜய்சேதுபதி, உதயநிதி ஸ்டாலின், அனிருத் ரவிச்சந்திரன் ஆகியோருக்கு கனிவோடு கன்னத்தில் கனிந்த முத்தமிட்டு தன் நெஞ்சம் நிறைந்த நேசத்தைப் பரிசாகப் பகிர்ந்தார் கமல்ஹாசன்.

அந்த தித்திப்புத் தருணத்தைப் பிரதிபலிக்கும் புகைப்படங்களை இயக்குநர் லோகேஷ் கனகராஜ் தனது ட்விட்டர் பக்கத்தில் பகிர்ந்துள்ளார். 'விக்ரம்' வெற்றியைப் போன்றே ஏராளமான ரசிகர்கள் லோகேஷின் புகைப்படப் பதிவுக்கு லைக்குகளையும் கமெண்ட்களையும் தாராளமாகக் குவித்து வருகின்றனர்.