மலையாள மெகா ஸ்டார் மம்முட்டியுடன் ஜோடி சேரும் ஜோதிகா..!
நடிகர் சூர்யாவைத் திருமணம் செய்துகொண்ட பின்னர் திரைப்படங்களில் நடிப்பதை நிறுத்திக் கொண்டார் நடிகை ஜோதிகா. சூர்யா, குழந்தைகள், குடும்பம் என சென்றுகொண்டிருந்த ஜோதிகா, '36 வயதினிலே' படம் மூலம் ரீ என்ட்ரி கொடுத்தார். அதன்பிறகு தொடர்ந்து 'மகளிர் மட்டும்', 'நாச்சியார்', 'செக்கச் சிவந்த வானம்', 'காற்றின் மொழி', 'ராட்சசி', 'ஜாக்பாட்', 'தம்பி', 'பொன்மகள் வந்தாள்', 'உடன்பிறப்பே' என மீண்டும் கோலிவுட்டின் நாயகியாக வலம் வருகிறார் ஜோதிகா. இந்தநிலையில், சுமார் 13 ஆண்டுகளுக்குப் பிறகு, ஜோதிகா மீண்டும் மலையாளப் படத்தில் நடிக்கவுள்ளதாக செய்திகள் வெளியாகி இருக்கிறது.
மலையாளத்தில் ஏற்கெனவே, 'ராக்கிலிப்பட்டு', 'சீதா கல்யாணம்' என இரண்டு படங்களில் மட்டும் நடித்துள்ளார் ஜோதிகா என்பது குறிப்பிடத்தக்கது. இந்தநிலையில், தற்போது ஜியோ பேபி இயக்கும் ஒரு படத்தில் ஜோதிகா ஒப்பந்தம் ஆகியுள்ளதாகக் கூறப்படுகிறது. 'தி கிரேட் இந்தியன் கிச்சன்' உட்பட தரமான படங்களை இயக்கியுள்ளார் ஜியோ பேபி.
தற்போது இவர் இயக்கும் படத்தில் மலையாள மெகா ஸ்டாரான மம்முட்டிக்கு ஜோடியாக ஜோதிகா நடிக்கவுள்ளதாக தகவல் வெளியாகியுள்ளது. 70வயது மூத்த நடிகருக்கு ஜோடியாக ஜோதிகா நடிப்பது, ரசிகர்களுக்கே ஷாக்கிங் என்றாலும், இப்போதே படத்துக்கான எதிர்பார்ப்பு மிகையாக உள்ளது.
