தம்பினா இப்படித்தான் இருக்கணும் அட்லீ..! ரசிகர்கள் புகழ்ச்சி..!

இந்தி சினிமாவை கடந்த பல வருடங்களாக ஆட்சி செய்து கொண்டிருக்கும் 'கிங்' ஷாருக்கானுக்கு, சொல்லி கொள்ளும்படி பெரிய வெற்றிப் படம் என்பது வெகுநாட்களாக அமையவில்லை. 'ஜீரோ' படத்தின் தோல்விக்கு பிறகு, பல புராஜக்டுகளில் கமிட் ஆகி சில காரணங்களால் அவை கைவிடப்பட்டது குறிப்பிடத்தக்கது. ரசிகர்களே சற்று கவலை அடையத் தொடங்கும் சூழலில் வந்ததுதான் 'ஜவான்'. அதற்கு முன் பதான் திரைப்படம் மிகப் பெரிய அளவிலான வெற்றியைப் பெற்றிருந்தாலும், தென்னிந்தியாவில் அது பெரிய தாக்கத்தை ஏற்படுத்தவில்லை.

இந்திய சினிமாவின் முன்னணி இயக்குநர்களில் ஒருவரான அட்லீயின் இயக்கத்தில், ஷாருக்கான் இரட்டை வேடத்தில் அசத்தியிருக்கும் இந்த படம் பான்-இந்தியா படமாக வெளியானது. விமர்சகர்கள் முதல் ரசிகர்கள் வரை என அனைத்து தரப்பினரும் படத்தை கொண்டாடினர். சர்வதேச அளவில் வரவேற்பை பெற்ற 'ஜவான்' வசூலிலும் கல்லா கட்டியது. ஷாருக்கானுக்கு இரண்டாவது 1000 கோடி வசூல் திரைப்படமாக அது அமைந்தது.

சமீபத்தில் நடைபெற்ற விருது விழா ஒன்றில், 'ஜவான்' திரைப்படத்திற்காக அட்லி சிறந்த இயக்குநர் மற்றும் சிறந்த படம் என இரட்டை விருதுகளை தட்டிச்சென்றார். தனியார் அமைப்பு நடத்திய இந்த விழாவில் பல்வேறு சினிமா பிரபலங்களும் கலந்துகொண்டனர். அட்லிக்கு இந்த விழாவில் சிறந்த இயக்குநர், சிறந்த படம் ஆகிய பிரிவுகளில் விருது கிடைத்தது. வாங்கிய விருதை மேடையில் ஏந்தியவாறு, தனது நன்றியுரையில் விஜய் உள்ளிட்ட பலரையும் அட்லி குறிப்பிட்டது பெரும் கவனத்தை பெற்றது. ஆனால், 'தளபதி' விஜய்க்கு அட்லி அளித்த சிறப்பு நன்றி உரை தான் ஹைலைட்.

"தளபதி விஜய் சார்.. எனது இரண்டாவது படத்திலிருந்து, என்னை ஒரு பெரிய இடத்துக்கு கொண்டு சென்று, நான் திறமையை நிரூபித்து கொள்ள வழிவகை செய்தவர் " என உணர்வுபூர்வமாக கூறினார் அட்லி. அவரது வார்த்தைகள், இருவரின் ரசிகர்களிடையேயும் பெரும் சிலிர்ப்பை ஏற்படுத்தியது. விஜய் - அட்லி கூட்டணியும் ரசிகர்களின் நீண்டநாள் எதிர்பார்ப்பு என்பது குறிப்பிடத்தக்கது.

இந்த நெகிழ்ச்சியான தருணம், 'தளபதி 69' படத்திற்கு அட்லீ தான் இயக்குநர் என்ற வதந்திகளை மேலும் வலுப்படுத்தியுள்ளது. இதுகுறித்து அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.

'தெறி' 'மெர்சல்', 'பிகில்' என அடுத்தடுத்து பிளாக்பஸ்டர் ஹிட்களை கொடுத்த விஜய் - அட்லி கூட்டணி மீண்டும் இணைந்தால், திரையுலகமே அதிரும் என்பதில் சந்தேகமில்லை. ரசிகர்கள் ஏற்கனவே உற்சாகத்தில் திளைக்க தொடங்கிவிட்டார்கள். அவர்களின் எதிர்பார்ப்பு நிறைவேறுமா? பொறுத்திருந்து தான் பார்க்க வேண்டும்!

விஜய்யின் அடுத்த படத்தை அதாவது தளபதி 69 படத்தை அட்லீதான் இயக்குவதாக இருந்தது. ஆனால் அதுகுறித்து சமூக வலைத்தளங்களில் மட்டுமே பேச்சு எழுந்தது. அதிகாரப்பூர்வமான தகவல்கள் எதுவும் வெளியாகவில்லை. அதேநேரம் விஜய் தற்போது வெங்கட் பிரபு இயக்கத்தில் தி கோட் படத்தில் நடித்து வருகிறார். இந்த படத்தைத் தொடர்ந்து அடுத்த படம் ஒன்றில் நடித்துவிட்டு முழு நேர அரசியலுக்குள் நுழைய இருக்கிறாராம்.

இதனால் கடைசி படத்தில் யாரை இயக்குநராக போடப்போகிறார் என்கிற எதிர்பார்ப்பு எகிறியுள்ளது. தெலுங்கு இயக்குநர்தான் என ஒரு தரப்பும், தமிழ் இயக்குநர்தான் என ஒரு தரப்பும் விவாதித்து வருகின்றன.