ஸ்டெர்லைட் ஆலை துப்பாக்கி சூடு வழக்கில் சி.பி.ஐ. குற்றப்பத்திரிகை நிராகரிப்பு

தூத்துக்குடியில் உள்ள ஸ்டெர்லைட் ஆலையை நிரந்தரமாக மூட வேண்டுமென்று கடந்த 2018ம் ஆண்டு அமைதியான முறையில் போராட்டத்தில் ஈடுபட்ட பொதுமக்கள் மீது,நடத்தப்பட்ட துப்பாக்கி சூட்டில் பொதுமக்கள் 15 பேர் சுட்டு கொல்லப்பட்டனர். பலர் காயமடைந்தார்கள்.

இந்த துப்பாக்கி சூடு சம்பவம் குறித்து சி.பி.ஐ .விசாரணை நடத்த உயர்நீதிமன்ற மதுரை கிளை உத்தரவு பிறப்பித்தது. அதன் அடிப்படையில் சி.பி.ஐ. வழக்கு பதிவு செய்து விசாரணையை துவங்கியது.

துப்பாக்கி சூட்டிற்கு காரணமான மாவட்ட ஆட்சித்தலைவர், மாவட்ட காவல்துறை கண்காணிப்பாளர், காவல் ஆய்வாளர்கள் ஹரிஹரன்,மீனாட்சிநாதன், பார்த்தீபன், தாசில்தார்கள் சேகர், கண்ணன், சந்திரன் உள்ளிட்டோர்கள் மீது முதல் தகவல் அறிக்கை பதிவு செய்திட வேண்டி மார்க்சிஸ்ட்கம்யூனிஸ்ட் கட்சியின் தூத்துக்குடி மாவட்ட முன்னாள் செயலாளர் கே.எஸ்.அர்ச்சுனன் சி.பி.ஐ.க்கு புகார் மனு அனுப்பினார். பின்னர் நீதிமன்றத்தில் வழக்குதொடர்ந்தால் அதன் அடிப்படையில் விசாரணையும் மேற்கொள்ளப்பட்டது.

இந்நிலையில், சி.பி.ஐ. விசாரணையை முடித்து காவல் ஆய்வாளர் திருமலை என்பவர் மீது மட்டும் மதுரை சி.பி.ஐ. நீதிமன்றத்தில் இறுதி அறிக்கையை தாக்கல் செய்தது..சி.பி.ஐ.யின் நடவடிக்கை சட்ட விதிமுறைகளுக்கு எதிரானது என்றும், சி.பி.ஐ.யின் இறுதி அறிக்கையை ரத்து செய்ய வேண்டும். கொலைகள் மற்றும்குற்றசெயல்களில் ஈடுபட்ட மாவட்ட ஆட்சியர், காவல்துறை கண்காணிப்பாளர் ,வருவாய் அலுவலர், காவலர்கள் மீது நடவடிக்கை எடுக்கப்பட வேண்டும்,என மதுரையில் உள்ள தலைமை குற்றவியல் நீதிமன்றத்தில் அர்ச்சுனன் என்பவர் மனு தாக்கல் செய்திருந்தார்.

இந்த மனு மீதான விசாரணை முடிந்து தீர்ப்பு வழங்கினார் நீதிபதி சண்முகையா. அப்போது, தூத்துக்குடி ஸ்டெர்லைட் துப்பாக்கிச்சூடு படுகொலைகள் வழக்கில், ஒரு இன்ஸ்பெக்டர் மட்டுமே குற்றவாளி என்ற  சிபிஐ யின் குற்றப்பத்திரிகையை நிராகரித்து, மீண்டும் இந்த வழக்கில் புலன் விசாரணை செய்து ஆறு மாதத்திற்குள் முடித்து புதிய இறுதியறிக்கையை தாக்கல் செய்ய அதிரடி உத்தரவு பிறப்பிக்கப்பட்டுள்ளது.