தர்பூசணியை பிரிட்ஜில் வைத்து சாப்பிடலாமா?

Ways to eat watermelon- கோடை காலத்தின் இன்றியமையாத பழங்களில் தர்பூசணிக்கு தனி இடம் உண்டு. அதன் இனிப்புச் சுவை, அதிக நீர்ச்சத்து மற்றும் உடலைக் குளிர்விக்கும் தன்மை ஆகியவற்றால் பலராலும் விரும்பப்படுகிறது. பழக்கடைகளில் தர்பூசணிச் சாறும் மிகவும் பிரபலமான பானமாக விளங்குகிறது. தர்பூசணியை பலர் வெட்டி, குளிர்சாதனப் பெட்டியில் குளிரூட்டி வைத்து பின்னர் உண்பது வழக்கம். இது ஆரோக்கியமான பழக்கமா, அல்லது தர்பூசணியை குளிர்விக்காமல் சாப்பிடுவதுதான் சிறந்ததா என்ற கேள்வி பலருக்கும் எழுகிறது. இதில் அதுபற்றி தெரிந்துக் கொள்வோம். 

தர்பூசணியின் சிறப்பு

தர்பூசணியில் நீர்ச்சத்து மிக அதிகம். சுமார் 90 சதவீதத்துக்கும் மேல் தர்பூசணியில் தண்ணீர் இருப்பதாக கூறப்படுகிறது. இதனால், உடல் நீர்ச்சத்தை இழந்து வறட்சி (dehydration) அடைவதைத் தடுக்கிறது. உடலுக்கு தேவையான உப்புக்கள் (Electrolytes) சமநிலையை பேணுவதற்கும் உதவுகிறது. மேலும், வைட்டமின் சி, வைட்டமின் ஏ, பொட்டாஷியம், ஆன்டி-ஆக்ஸிடண்ட்டுகள் போன்ற பல்வேறு ஊட்டச்சத்துக்கள் நிறைந்த பழம் தர்பூசணி.

இந்த ஊட்டச்சத்துக்கள் நோய் எதிர்ப்புச் சக்தி அதிகரிப்பது, கண் பார்வை மேம்படுவது, தசை வளர்ச்சிக்கு உதவுவது போன்ற பல்வேறு நன்மைகளைத் தருகின்றன. தர்பூசணியில் லைகோபீன் (Lycopene) என்னும் சத்து, சருமத்தை சூரியனின் புற ஊதா கதிர்களில் இருந்து பாதுகாப்பதாகவும், இதய மற்றும் புற்று நோய் அபாயத்தைக் குறைப்பதாகவும் ஆய்வுகள் குறிப்பிடுகின்றன.

குளிர்சாதனப் பெட்டியில் வைப்பதால் ஏற்படும் மாற்றங்கள்

தர்பூசணியைக் குளிர்சாதனப் பெட்டியில் வைக்கும்போது பழத்தின் சத்துக்கள் மற்றும் பண்புகளில் சில மாற்றங்கள் ஏற்படுகின்றன. குளிர்ந்த வெப்பநிலை பல ஊட்டச்சத்துக்களைச் சிதைத்துவிடும் என்பது முக்கியக் கவலை. குறிப்பாக, லைகோபீன் மற்றும் பீட்டா-கரோட்டீன் போன்ற ஆன்டி-ஆக்ஸிடண்ட்டுகளின் அளவு குறைந்துவிடும் வாய்ப்புகள் அதிகம். இதனால் தர்பூசணியின் முழுமையான நன்மைகளைப் பெறுவது கடினமாகிவிடுகிறது.

மேலும், தர்பூசணியின் இனிப்புச்சுவை, குளிர்ந்த நிலையில் உண்ணும்போது உணர முடிவதில்லை. தர்பூசணியை ரசித்து ருசித்து உண்பதிலும் ஒரு தனி சுகம் இருக்கிறது அல்லவா? குளிர்விக்கப்பட்ட தர்பூசணியை வேகமாக அள்ளி விழுங்க வேண்டும் என்ற உந்துதல் வந்துவிடுகிறது. இதனால், அதன் முழு சுவையை அனுபவிக்க முடியாமல் போகலாம்.

வெப்பநிலை பாதிப்புகள்

தர்பூசணியை 13 டிகிரி செல்சியஸில் நீண்ட நாட்கள் வைத்திருப்பது, அதன் தரத்தை பாதிக்கலாம். பழத்தின் தோல் பகுதியில் "சில்லிங் இஞ்சுரி" (Chilling Injury) எனப்படும் பாதிப்புகள் ஏற்படும் வாய்ப்புண்டு. குறிப்பாக நீண்ட நேரம் குளிர்சாதனப் பெட்டியில் வைத்திருந்த தர்பூசணியை வெளியே எடுத்தவுடன் வெட்டாமல் அப்படியே வைத்திருக்கக் கூடாது. வெளியில் உள்ள வெப்பம் மற்றும் குளிர்சாதனப் பெட்டியில் உள்ள குளிர்ந்த காற்றின் வித்தியாசத்தினால் ஈரப்பதம் ஏற்பட்டு, பழத்தை அழுக வைக்கலாம்.

ஆயுர்வேதப் பார்வை

ஆயுர்வேத மருத்துவ முறையின்படி, குளிர்விக்கப்பட்ட உணவுகளை உட்கொள்வது உடல் செரிமான மண்டலத்தின் நெருப்பை (அக்னி) குறைத்துவிடும். இதனால், செரிமானக் கோளாறுகள், வயிற்று உப்புசம் போன்ற பிரச்சனைகள் ஏற்படும் வாய்ப்பு இருக்கிறது. உடல்வாகு, உடல் உஷ்ணம் ஆகியவற்றை கருத்தில் கொண்டு, சிலருக்கு குளிர்விக்கப்பட்ட பழங்கள் ஒவ்வாமையை ஏற்படுத்தலாம் என்கிறது ஆயுர்வேதம்.

சரியான முறை

எனவே, தர்பூசணியை இயற்கையான அறை வெப்பநிலையில் வைத்து உண்பதே சிறந்தது. உடலுக்கும் மிகவும் ஆரோக்கியமானது. அதன் முழு சுவையையும் அப்போதுதான் அனுபவிக்க முடியும். தேவைப்பட்டால், தர்பூசணியை வெட்டி சில மணி நேரங்கள் மட்டும் குளிர்சாதனப் பெட்டியில் வைக்கலாம். நீண்ட நேரம் குளிர்விக்க வேண்டியது அவசியமில்லை.

பழத்தை வெட்டி வைத்த பின்னர், மீதமாகும் துண்டுகளை குளிர்சாதனப் பெட்டியில் வைக்கலாம். ஆனால், அந்தத் துண்டுகளை வைக்கும் முன், காற்றுப் புகாத டப்பாவில் இட்டு, பின்னர் குளிர்சாதனப் பெட்டியில் வைக்க வேண்டும். இதனால், மற்ற உணவுப் பொருட்களின் மணம் தர்பூசணியில் பரவுவது தடுக்கப்படும்.

தர்பூசணி, சிறந்த ஊட்டச்சத்துக்கள் நிறைந்த கோடைக்காலப் பழம். அதை குளிர்விக்காமல், இயற்கையான அறை வெப்பநிலையில் வைத்து உண்பதுதான் சிறந்தது. இந்த முறையில் தர்பூசணியின் சுவை, சத்துக்கள் ஆகிய அனைத்தையும் முழுமையாகப் பெறலாம்.