Sathu Maavu Ingredients in Tamil: இதெல்லாம் இருந்தா வீட்டிலேயே சத்துமாவு தயாரிக்கலாம்

நம் பாரம்பரிய சத்து மாவுதான் குழந்தைகளுக்கு உண்மையான ஆரோக்கியத்தை கொடுக்கும். இயற்கை உணவுகள் பற்றிய விழிப்புணர்வு தற்போது மக்களிடம் பெருகி வருகிறது. கடைகளில் கிடைக்கும் சத்துமாவுகளை அதிக விலை கொடுத்து வாங்குவதை விட வீட்டிலேயே நாம் தயாரித்தால் பணம் மிச்சப்படுவது மட்டுமன்றி தேவையற்ற ரசாயனங்களை கலப்பதையும் தவிர்க்கலாம். இந்த மாவுதான் குழந்தைகளுக்கு உண்மையான ஆரோக்கியத்தை கொடுக்கும்.

உண்மையான நம் பாரம்பரிய சத்து மாவு தயாரிப்பது எப்படி? 

சத்து மாவு தயாரிக்க தேவையான பொருட்கள்:

சத்து மாவு தயாரிக்க தேவையான பொருட்கள் மளிகைக் கடைகளில் கிடைக்கின்றன.

• ராகி 2 கிலோ
• சோளம் 2 கிலோ
• நாட்டு கம்பு 2 கிலோ
• பாசிப்பயறு அரை கிலோ
• கொள்ளு அரை கிலோ
• மக்காசோளம் 2 கிலோ
• பொட்டுக்கடலை ஒரு கிலோ
• சோயா ஒரு கிலோ
• தினை அரை கிலோ
• கருப்பு உளுந்து அரை கிலோ
• சம்பா கோதுமை அரை கிலோ
• பார்லி அரை கிலோ
• நிலக்கடலை அரை கிலோ
• மாப்பிள்ளை சம்பா அவல் அரை கிலோ
• ஜவ்வரிசி அரை கிலோ
• வெள்ளை எள் 100 கிராம்
• கசகசா 50 கிராம்
• ஏலம் 50 கிராம்
• முந்திரி 50 கிராம்
• சாரப்பருப்பு 50 கிராம்
• பாதாம் 50 கிராம்
• ஓமம் 50 கிராம்
• சுக்கு 50 கிராம்
• பிஸ்தா 50 கிராம்
• மாசிக்காய் 2

செய்முறை :

ராகி, சோளம், கம்பு, பாசிப்பயறு, கொள்ளு ஆகியவற்றை தண்ணீரில் 12 மணி நேரம் ஊற வைக்க வேண்டும்.தண்ணீரை நன்றாக வடித்த பின்னர் அதை ஒரு துணியில் கட்டி 12 மணி நேரம் கழித்து எடுத்தால், தானியங்கள் முளை விட்டு இருக்கும்.அவற்றை 3 நாள் வெயிலில் காய வைக்க வேண்டும்.

மற்ற பொருட்களை ஒரு நாள் வெயிலில் காய வைத்தால் போதும். தனியாக இடம் எதுவும் தேவையில்லை. வீட்டிலேயே தானியங்களை ஊற வைத்து, முளை கட்டலாம். வீட்டு வளாகத்தில் காய வைக்கலாம்.

அனைத்தையும் மொத்தமாக மாவு மில்லில் அரைத்து, 4 மணி நேரம் ஆற வைத்தால் சத்து மாவு தயார். நாம் வீட்டில் தயார் செய்வதால் நமக்கு 12 கிலோ மாவு கிடைக்கும்.

குறிப்பு: தானியங்களை இந்த அளவு வீட்டு மிக்சியில் அரைத்தால் சரியாக வராது. மாவு மில்லில் கொடுத்து அரைக்க வேண்டும்.

சத்து மாவு உண்பதால் கிடைக்கும் பயன்கள்:

ஒரு நபருக்கு ஒரு தம்ளர் தண்ணீர் வீதம் கொதிக்க வைக்க வேண்டும்.

ஒருவருக்கு 2 தேக்கரண்டி மாவு வீதம் தண்ணீரில் கலந்து 2 நிமிடம் கொதிக்க வைத்தால் சத்து மாவு கூழ் தயாராகி விடும்.

அதில் அவரவர் விருப்பப்படி இனிப்பு அல்லது உப்பு அல்லது உப்பு, மிளகுபொடி சேர்த்து பருகலாம்.

எதுவும் கலக்காமல் அப்படியேகூட குடிக்கலாம். காலையில் 2 டம்ளர் சத்துமாவு பானம் குடித்தால் காலை சாப்பாடு பூர்த்தியாகி விடும். இதன்மூலம் உடலுக்கு தேவையான சத்துகள் மற்றும் சக்தி கிடைக்கிறது.

கார்போஹைட்ரேட், கொழுப்பு குறைவாக இருப்பதால் உடல் பெருக்காது.

உடல் எடையை குறைக்க உதவுகிறது. குழந்தைகளுக்கு ஏற்ற உணவு. காலை, மாலை வேளைகளில் அவர்களுக்கு தரலாம்.

முதியோர்கள் இதை அருந்தும் போது உடனடி சக்தி கிடைப்பதை உணர முடியும். எளிதில் ஜீரணிக்க கூடிய உணவு.

இதில் கொஞ்சம் வெந்நீர் ஊற்றி, சிறிதளவு நாட்டு சர்க்கரை சேர்த்து உருண்டையாக பிடித்து மாலை வேளையில் பள்ளியில் இருந்து திரும்பும் குழந்தைகளுக்கு ஸ்நாக்ஸ் போன்று கொடுக்கலாம். 

சத்து மாவு காய வைத்து, வறுத்து அரைக்கப்படுவதால் 5 மாதம் வரை கெடாது. இன்றே இதை உங்கள் வீட்டில் நீங்களே தயாரித்து உங்களின் அக்கறை மிக்க குடும்பத்தினர் அனைவரும் பயன்படுத்தி நலமும் வளமும் பெறுங்கள்.