ஆளி விதைகளின் மருத்துவ நன்மைகள் குறித்து உங்களுக்குத் தெரியுமா?

Medicinal benefits of flax seeds- ஆளி விதைகளின் மருத்துவ நன்மைகள் மற்றும் அவற்றின் பயன்பாடுகள்

ஆளி விதைகள், சிறிய, தட்டையான, பழுப்பு நிற விதைகளாகும். பல நூற்றாண்டுகளாக பாரம்பரிய மருத்துவத்தில் பயன்படுத்தப்பட்டு வரும் இவை, உடல் ஆரோக்கியத்திற்கு பல நன்மைகளை வழங்குகின்றன. இந்தியாவில் இவை ஆளிசி விதைகள் என்றும் அழைக்கப்படுகின்றன. ஆளி விதைகளின் அற்புதமான நன்மைகள் மற்றும் பயன்பாடுகள் பற்றி காண்போம்.

ஊட்டச்சத்து மதிப்பு:

ஆளி விதைகளில் ஏராளமான ஊட்டச்சத்துக்கள் நிரம்பியுள்ளன. அவை நார்ச்சத்து, புரதம், ஆரோக்கியமான கொழுப்புகள், வைட்டமின்கள் மற்றும் தாதுக்களின் சிறந்த மூலமாகக் கருதப்படுகின்றன.

ஒரு தேக்கரண்டி (10 கிராம்) ஆளி விதைகளில் கிட்டத்தட்ட உள்ளவை:

கலோரிகள்: 55

நார்ச்சத்து: 3 கிராம்

புரதம்: 2 கிராம்

கொழுப்பு: 4 கிராம் (பெரும்பான்மையானவை ஆரோக்கியமான கொழுப்புகள்)

வைட்டமின் பி1 (தியாமின்): தினசரி பரிந்துரைக்கப்பட்ட அளவில் - 10%

காப்பர்: தினசரி பரிந்துரைக்கப்பட்ட அளவில் - 9%

மாங்கனீசு: தினசரி பரிந்துரைக்கப்பட்ட அளவில் - 8%

ஆளி விதைகளின் மருத்துவ பயன்கள்

இதய ஆரோக்கியத்திற்கு

ஆளிவிதைகளில் அதிக அளவு ஒமேகா-3 கொழுப்பு அமிலங்கள் உள்ளன. இவை கெட்ட கொழுப்பை (LDL) குறைத்து, நல்ல கொழுப்பை (HDL) அதிகரிக்க உதவுகின்றன. இதனால், இதய நோய், பக்கவாதம் போன்றவற்றின் அபாயத்தை இவை குறைக்கின்றன.

உயர் இரத்த அழுத்தத்தைக் குறைக்கவும் ஆளிவிதைகள் பங்களிக்கின்றன. இதில் உள்ள நார்ச்சத்து இரத்த அழுத்தத்தை சீராக்க உதவுவதாக ஆய்வுகள் குறிப்பிடுகின்றன.

செரிமான ஆரோக்கியத்தை மேம்படுத்துகிறது:

ஆளி விதைகளில் கரையக்கூடிய மற்றும் கரையாத நார்ச்சத்துகள் நிறைந்துள்ளன. இதனால் மலச்சிக்கல் பிரச்சனையை போக்க இவை உதவுகின்றன. குடல் இயக்கத்தை இவை ஊக்குவித்து, ஆரோக்கியமான செரிமான மண்டலத்தை உருவாக்குகின்றன

புற்றுநோய் அபாயத்தைக் குறைக்கும்:

ஆளி விதைகளில் உள்ள லிக்னன்கள் (Lignans) ஆக்ஸிஜனேற்றிகளாகச் செயல்பட்டு புற்றுநோயை உண்டாக்கும் செல்களின் வளர்ச்சியைத் தடுக்கின்றன. குறிப்பாக மார்பக, புரோஸ்டேட் மற்றும் பெருங்குடல் புற்றுநோய்களுக்கான அபாயத்தைக் குறைத்து பாதுகாப்பளிக்கின்றன.

உடல் எடை குறைப்பில் உதவுதல்:

ஆளி விதைகளில் உள்ள நார்ச்சத்து நீண்ட நேரம் பசி உணர்வைத் தடுக்கிறது, இதனால் அதிகப்படியான உணவை உட்கொள்வதை கட்டுப்படுத்த உதவுகிறது. மேலும், இதில் உள்ள ஆரோக்கியமான கொழுப்புகள் வளர்சிதை மாற்றத்தை அதிகரிக்கின்றன.

இரத்த சர்க்கரை அளவைக் கட்டுப்படுத்துகிறது:

ஆளி விதைகளில் உள்ள கரையக்கூடிய நார்ச்சத்து சர்க்கரையின் உறிஞ்சுதலைக் குறைக்கிறது. இதனால், நீரிழிவு நோயாளிகளுக்கு அவசியமான ஒன்றாக மாறுகிறது. இவை இரத்த சர்க்கரை அளவை சீராக பராமரிக்க உதவுகின்றன.

வீக்கத்தைக் குறைக்கும்:

ஒமேகா-3 கொழுப்பு அமிலங்களின் பண்புகள் உடலில் ஏற்படும் அழற்சி (வீக்கம்) போன்றவற்றைக் குறைக்கின்றன. மூட்டுவலி போன்ற பிரச்சினைகளை இது நிவர்த்தி செய்ய உதவும்.

ஆளிவிதையை உணவில் சேர்க்கும் வழிகள்:

தூளாக்குதல்: ஆளி விதைகளை பொடி செய்து தோசை மற்றும் இட்லி மாவுகளிலும், சப்பாத்திக்கு பிசையும் மாவிலும் கலந்து கொள்ளலாம்.

தயிர், ஓட்ஸ் கஞ்சி போன்ற உணவுகளில் சேர்த்து கொள்ளுதல்: தயிர் மற்றும் ஓட்ஸுடன் இந்தப் பொடியைச் சேர்த்து உட்கொள்ளலாம்.

ஸ்மூத்தி மற்றும் சாலட்களில் தூவுதல்: ஸ்மூத்திகள் மற்றும் சாலட்களின் மீது இவற்றைத் தூவி சுவை கூட்டலாம்.

ரொட்டிகளில் பயன்படுத்துதல்: ரொட்டி அல்லது பரோட்டா செய்யும்போது மாவில் கலந்து பயன்படுத்தலாம்.

கவனத்தில் கொள்ள வேண்டியவை

அதிகப்படியான ஆளி விதை பயன்பாடு வயிற்று வலி அல்லது வீக்கத்தை ஏற்படுத்தலாம். எனவே, குறைந்த அளவுடன் தொடங்கி, படிப்படியாக உங்கள் உடலின் தேவைகளுக்கு ஏற்ப அளவை அதிகரிக்கவும்.

அதிக அளவு ஆளி விதைகளை பச்சையாக சாப்பிடுவது உடலுக்கு தீங்கு விளைவிக்கும். இவற்றை பொடி செய்து பயன்படுத்துவதே சாலச்சிறந்தது.

ஆளி விதைகள் சத்துக்கள் நிரம்பிய உணவாகும், மேலும் இவற்றை உணவில் சேர்த்துக் கொள்வதால் பல சுகாதார நன்மைகளை அடைய முடியும். இது ஒரு சூப்பர்ஃபுட் என்றே கூறலாம். உணவில் சிறிய மாற்றங்களைச் செய்வதன் மூலம், ஆளி விதைகளின் நன்மைகள் மூலம் நீண்ட மற்றும் ஆரோக்கியமான வாழ்க்கைக்கான பாதையை நீங்களே அமைத்துக் கொள்ள முடியும்.