இரும்பு மாதிரி உறுதி வேண்டுமா? கேழ்வரகு லட்டு சாப்பிடுங்க!

Kelvaraku Lattu Recipe- கேழ்வரகு லட்டு: இரும்புச்சத்தின் களஞ்சியம்

கிராமப்புறங்களில் ஒரு காலத்தில் பட்டிதொட்டியெல்லாம் கேழ்வரகின் மகிமை கொடிகட்டி பறந்தது. ஆனால் காலப்போக்கில் பல பாரம்பரிய உணவுகளைப் போலவே கேழ்வரகும் நம் அன்றாட உணவுப் பழக்கத்திலிருந்து கொஞ்சம் கொஞ்சமாக மறைந்துவிட்டது. பரபரப்பான வாழ்க்கை முறையில் இட்லி, தோசை போன்ற எளிமையாக செய்து சாப்பிடக்கூடிய உணவுகளுக்கு மாறிவிட்டோம். ஆனால் இந்த கேழ்வரகில் ஒளிந்திருக்கும் அத்தனை நன்மைகளை அறிந்தால், நிச்சயமாக அதற்கு நம் உணவில் நிரந்தர இடம் கிடைக்கும்.

சத்தின் சுரங்கம்

இயற்கையாகவே கால்சியம் சத்து மிகுந்த ஒரு தானியமாக இருக்கும் கேழ்வரகு, வளரும் குழந்தைகளுக்கும் எலும்பு தேய்மான பிரச்சினை உள்ளவர்களுக்கும் அற்புதமான உணவு. உடல் எடையை குறைக்க நினைப்பவர்கள் கேழ்வரகை தங்கள் உணவில் சேர்த்துக்கொண்டால், அதிலுள்ள நார்ச்சத்து அதிக நேரம் பசியை கட்டுப்படுத்தி, தேவையற்ற கொழுப்புகளை உடலில் சேராமல் தடுக்கும். இரத்த சர்க்கரையின் அளவை சீராக வைத்திருக்கவும் கேழ்வரகு உதவும். நமது உடலின் நோய் எதிர்ப்பு சக்தியை அதிகரித்து நம்மை ஆரோக்கியமாக வைத்திருக்கவும் கேழ்வரகு முக்கிய பங்காற்றுகிறது.

கேழ்வரகு லட்டு செய்வது எப்படி?

இத்தனை சத்துக்கள் நிறைந்த கேழ்வரகை சுவையான லட்டாக செய்து வீட்டில் உள்ள பெரியவர்கள் முதல் சிறியவர்கள் வரை அனைவருக்கும் கொடுக்கலாம்!

தேவையான பொருட்கள்:

கேழ்வரகு மாவு - 1 கப்

வெல்லம் - 1/2 கப்

முந்திரி - 10

உலர் திராட்சை - 10

நிலக்கடலை - 1/4 கப்

ஏலக்காய் பொடி - 1/2 தேக்கரண்டி

நெய் - 3 தேக்கரண்டி

செய்முறை:

ஒரு வாணலியில் ஒரு ஸ்பூன் நெய் விட்டு கேழ்வரகு மாவை மிதமான தீயில் நன்கு வறுத்துக்கொள்ளவும். மாவு நிறம் மாறி நல்ல மணம் வரும் வரை பொறுமையாக வறுப்பது முக்கியம்.

வெல்லத்தை பொடித்து அல்லது துருவி கால் கப் தண்ணீர் சேர்த்து கம்பி பதம் வரும் வரை காய்ச்சவும்.

வறுத்த நிலக்கடலை தோல் நீக்கி கொரகொரப்பாக உடைக்கவும். முந்திரியை சிறு துண்டுகளாக நறுக்கி கொள்ளவும்.

வறுத்த கேழ்வரகு மாவுடன் நெய்யில் வறுத்த முந்திரி, உலர்திராட்சை, நிலக்கடலை மற்றும் ஏலக்காய் பொடி ஆகியவற்றை கலந்துகொள்ளவும்.

காய்ச்சி வைத்திருக்கும் வெல்லப் பாகை நன்கு வடிகட்டி கேழ்வரகு மாவுடன் கலக்கவும். கலவையை லேசாக ஆற விடவும்.

கலவை கை பொறுக்கும் சூட்டிற்கு வந்ததும், லேசாக நெய் தடவிய கைகளினால் சிறு உருண்டைகளாக்கி பிடிக்கவும்.

சுவையான சத்தான கேழ்வரகு லட்டு ரெடி! காற்று புகாத டப்பாவில் இதை வைத்து ஒரு வாரம் வரை சாப்பிடலாம்.

கேழ்வரகு லட்டு தரும் நன்மைகள்

குழந்தைகளுக்கு பள்ளிகூடம் முடிந்து வீட்டுக்கு வந்ததும் சத்து நிறைந்த ஸ்நாக்ஸாக கேழ்வரகு லட்டை கொடுத்தால் பசியும் அடங்கும், ஆரோக்கியமும் பெருகும். அலுவலகம் செல்பவர்கள் பணி நேரங்களில் சிறிது இடைவேளை எடுக்கும் நேரத்தில் ஒரு கேழ்வரகு லட்டு சாப்பிட்டால் உற்சாகமாக செயல்படலாம். இரவு படுக்கும் முன் ஒரு லட்டுடன் ஒரு டம்ளர் பால் குடிப்பது நல்ல ஆழ்ந்த உறக்கத்தை தரும். மேலும், கர்ப்பிணிப் பெண்களுக்கு தேவையான கால்சியம் சத்தை இந்த கேழ்வரகு லட்டு எளிதில் அளிக்கிறது.

சுவையும் சத்தும் நிறைந்த கேழ்வரகை உங்களின் அன்றாட உணவில் அவ்வப்போது சேர்த்துக்கொள்வது, நோயற்ற ஆரோக்கியமான வாழ்க்கைக்கு ஒரு சிறந்த இயற்கை வழி!