புகைபிடிப்பதை விட முடியவில்லையா? இதைப்படிங்க..

புகைபிடிப்பதை நிறுத்த வேண்டுமா? சரியான உணவுப் பழக்கம் உதவி செய்யும். புகையில்லாத வாழ்க்கையை நோக்கிய உங்கள் பயணத்தில், நலம் பயக்கும் உணவுகளை உங்கள் உணவுமுறையில் சேர்த்துக்கொள்ளுங்கள்.

புகைபிடிப்பதை நிறுத்துவதற்கான முயற்சி மேற்கொள்வது, ஒருவரது உடல்நலம் மற்றும் மனநலனை மேம்படுத்துவதற்கான மிகச் சிறந்த செயல்களில் ஒன்றாகும். நச்சு இரசாயனங்களை உள்ளிழுக்காத ஒவ்வொரு நாளும், மணிநேரமும், நிமிடமும், உங்கள் உடலின் செல்களை சரிசெய்வதற்கும், பல்வேறு உடல்நல பாதிப்புகளைத் தடுப்பதற்கும் உதவுகிறது. உலகெங்கிலும் பல லட்சம் பேரை புகைபிடித்தல் கொன்று குவிக்கிறது.

உலக சுகாதார நிறுவனத்தின் (WHO) கூற்றுப்படி, இந்தியாவில் மட்டும் உலகின் மொத்த புகைபிடிப்போரில் 12 சதவீதம் பேர் உள்ளனர். சீரான உணவு முறையும் ஆரோக்கியமான உணவுப் பழக்க வழக்கங்களும், உடலுக்குப் போஷாக்கு அளிப்பதன் மூலமும், போதைப் பழக்கத்தைக் கட்டுப்படுத்துவதன் மூலமும், புகையிலையை விட்டு விலகுவதில் பெரும் பங்கு வகிக்கின்றன. பழங்கள், காய்கறிகள் முதல் கொட்டைகள், விதைகள் வரை, புகைப்பழக்கத்தை நிறுத்துவதற்கு உதவும் உணவுகளின் பட்டியலை இங்கே காணலாம்.

புகைப்பழக்கத்தை விடுவதில் உதவும் உணவுகள்

ஊட்டச்சத்து மற்றும் உணவியல் ஆலோசகர் நீதி சர்மா கூறுகையில், புகைபிடிப்பதை நிறுத்தும் இந்தப் பயணத்தை உறுதியுடன் மேற்கொள்வது பாராட்டுக்குரிய முடிவு. உங்களின் இந்த முயற்சியில், ஊட்டச்சத்து நிறைந்த உணவுகளை உங்கள் தினசரி உணவுமுறையில் சேர்த்துக்கொள்வது, வெற்றிபெறுவதற்கான வாய்ப்புகளை அதிகரிக்கும். சவால்கள் நிறைந்த இந்த காலகட்டத்தில், குறிப்பிட்ட சில உணவுகள் உங்கள் உடலை மீட்டெடுக்க உதவக்கூடும் என்கிறார்.

1. வண்ணமயமான பழங்கள் மற்றும் காய்கறிகள்: ஆக்ஸிஜனேற்றிகள், வைட்டமின்கள் மற்றும் தாதுக்கள் நிறைந்த பல்வேறு பழங்கள் மற்றும் காய்கறிகளை உட்கொள்ளுங்கள். இவற்றில் பெர்ரி பழங்கள், சிட்ரஸ் பழங்கள், கீரை வகைகள் மற்றும் கேரட் ஆகியவை அடங்கும். புகைபிடிப்பினால் உருவாகும் ஆக்ஸிஜனேற்ற அழுத்தத்தை எதிர்த்துப் போராடவும், செல் சீரமைப்பை ஊக்குவிக்கவும் ஆக்ஸிஜனேற்றிகள் உதவுகின்றன.

2. ஒமேகா-3 கொழுப்பு அமிலங்கள்: கொழுப்பு நிறைந்த மீன் வகைகள் (சால்மன், கானாங்கெளுத்தி), ஆளி விதைகள் மற்றும் வால்நட்ஸ் போன்ற ஒமேகா -3 கொழுப்பு அமிலங்களின் மூலங்களைச் சேர்த்துக் கொள்ளுங்கள். இந்த ஆரோக்கியமான கொழுப்புகளில் அழற்சி எதிர்ப்பு பண்புகள் உள்ளன, அவை புகைபிடித்தலுடன் தொடர்புடைய வீக்கத்தைக் குறைக்க உதவும்.

3. கொட்டைகள் மற்றும் விதைகள்: பாதாம், சூரியகாந்தி விதைகள் மற்றும் பூசணி விதைகள் போன்ற கொட்டைகள் மற்றும் விதைகளை சிற்றுண்டியாக உண்ணுங்கள். இவற்றில் வைட்டமின் ஈ நிறைந்துள்ளது. மேலும், புகைப்பிடிப்பதினால் பாதிக்கப்பட்ட சருமத்தின் ஆரோக்கியத்திற்கு உதவுகின்றன.

4. முழு தானியங்கள்: கினோவா, பழுப்பு அரிசி மற்றும் ஓட்ஸ் போன்ற முழு தானியங்களைத் தேர்வு செய்யுங்கள். அவை ஆற்றலின் நீடித்த வெளியீட்டை வழங்குகின்றன. இதனால் இரத்த சர்க்கரை அளவுகளை நிலைப்படுத்தி, புகைப்பழக்கத்தை விடுவதால் ஏற்படும் தீவிர உணவு இச்சைகளைக் கட்டுப்படுத்த உதவுகின்றன.

5. குறைந்த கொழுப்புள்ள புரதங்கள்: கோழி, மீன், டோஃபு மற்றும் பருப்பு வகைகள் போன்ற குறைந்த கொழுப்புள்ள புரத மூலங்களை உணவில் சேர்த்துக் கொள்ளுங்கள். உங்கள் உடல் நல்ல மாற்றத்தை நோக்கி பயணிக்கும் இந்த காலகட்டத்தில், புரதம் தசைகளை சீரமைத்துப் பராமரிக்க உதவுகிறது.

6. நீரேற்றம்: ஏராளமான தண்ணீர் மற்றும் மூலிகை தேநீர் குடித்து உடலை நீரேற்றமாக வைத்திருங்கள். புகைப்பழக்கத்தை விடுவதால் ஏற்படும் உணவு இச்சைகளைக் கட்டுப்படுத்தி, ஒட்டுமொத்த ஆரோக்கியத்தை மேம்படுத்தவும், நீரேற்றம் உதவும்.

7. பால் அல்லது பலப்படுத்தப்பட்ட தாவர-அடிப்படையிலான மாற்றுகள் (Dairy or Fortified Plant-Based Alternatives): பால் பொருட்கள் அல்லது பலப்படுத்தப்பட்ட தாவர அடிப்படையிலான மாற்றுகள் மூலம் போதுமான அளவு கால்சியத்தை உட்கொள்ளுவதை உறுதிப்படுத்திக் கொள்ளுங்கள். புகைபிடித்தல் உடலில் கால்சியம் அளவைக் குறைக்கும். புகைப்பிடிப்பதை விடும்போது எலும்பு ஆரோக்கியத்தைப் பராமரிப்பது மிகவும் முக்கியம்.

8. பச்சை தேநீர்: பச்சை தேநீர் பருகவும். அதன் ஆக்ஸிஜனேற்ற பண்புகளுக்கு பச்சைத் தேநீர் பிரபலமானது. புகைப்பழக்கத்தை விட நினைப்பவர்களுக்கு, உடலை நச்சுத்தன்மையிலிருந்து விடுவிப்பதில் இது உதவக்கூடும்.

புகைப்பழக்கத்தை நிறுத்துவதில் வேறு வழிகள்

உணவியல் நிபுணர் வேதிகா ப்ரேமானி, புகைப்பழக்கத்தை நிறுத்தும் போது, தீவிர உணவு இச்சைகளைக் குறைக்கவும், உடலின் மீட்புக்கு உதவவும் உணவுகளில் கவனம் செலுத்துவது அவசியம். பழங்கள், காய்கறிகள், கொட்டைகள் போன்ற ஆன்டி-ஆக்ஸிடன்ட்கள் நிறைந்த உணவுகளைத் தேர்வு செய்யவும், இவை புகைப்பிடிப்பால் ஏற்படும் ஆக்ஸிஜனேற்ற அழுத்தத்தை எதிர்த்துப் போராட உதவுகின்றன. ஆரஞ்சு, கிவி மற்றும் மிளகாய் போன்ற வைட்டமின் சி நிறைந்த உணவுகளைச் சேர்த்துக் கொள்ளுங்கள், ஏனெனில் அவை சேதமடைந்த திசுக்களை சரிசெய்ய உதவும். நிறைய தண்ணீரும், வெள்ளரி மற்றும் தர்பூசணி போன்ற நீரேற்றம் நிறைந்த உணவுகளையும் உட்கொள்வது நச்சுகளை வெளியேற்றவும், புகைப்பழக்கத்தை விடுவதால் ஏற்படும் அறிகுறிகளை போக்க உதவும். உங்கள் கைகள் மற்றும் வாயை பிஸியாக வைத்திருக்க கேரட், செலரி குச்சிகள் மற்றும் உப்பு சேர்க்கப்படாத கொட்டைகள் போன்ற ஆரோக்கியமான சிற்றுண்டிகளைத் தேர்வு செய்யுங்கள்," என்கிறார். 

தவிர்க்க வேண்டிய உணவுகள்

சர்க்கரை நிறைந்த உணவுகள் மற்றும் பானங்கள்: செயற்கை இனிப்புகள், சர்க்கரை நிறைந்த பானங்கள், கேக்குகள் போன்ற சர்க்கரை நிறைந்த உணவுகள், புகைபிடிப்பதை நிறுத்த முயற்சிக்கும் போது தீவிர உணவு இச்சைகளைத் தூண்டலாம். மேலும் இவை உடல் பழுதுபார்ப்புக்கும், ஒட்டுமொத்த ஆரோக்கியத்திற்கும் தீங்கு விளைவிக்கும்.

பதப்படுத்தப்பட்ட உணவுகள்: பதப்படுத்தப்பட்ட உணவுகளில் அதிக அளவு சோடியம் மற்றும் தீங்கு விளைவிக்கும் கொழுப்புகள் உள்ளன, அவை உடலில் வீக்கத்தை அதிகரிக்கலாம். புகைப்பழக்கத்தால் ஏற்கனவே உடல் பாதிப்பில் இருக்கும் நிலையில், இந்த உணவுகள் பிரச்சனைகளை அதிகப்படுத்தக்கூடும்.

ஆல்கஹால்: புகைப்பழக்கத்தை நிறுத்த முயற்சிக்கும் போது மது அருந்துவதைத் தவிர்ப்பது நல்லது. ஆல்கஹால் பெரும்பாலும் புகைப்பழக்கத்துடன் தொடர்புடையதாக இருப்பதால், அது ஏக்கத்தைத் தூண்டும். மேலும், இது உடலின் மீட்பு செயல்முறையைத் தடுத்துவிடும்.

புகைபிடிப்பதை விடுவது என்பது ஒரு சவாலான பயணம். இந்த செயல்முறையை எளிதாக்கும் சரியான ஆலோசனை மற்றும் வழிகாட்டுதலுடன், நீங்கள் உங்கள் இலக்கை அடைய முடியும். உங்களுக்கு அதிக ஆதரவு தேவைப்பட்டால், ஒரு மருத்துவரை அணுகுவது, மற்றும் ஆலோசனை பெறுவது நல்லது, மேலும் உங்கள் வெற்றியை உறுதி செய்வதற்காக புகைபிடிப்பதை நிறுத்துவதற்கான உதவிக்குழுக்களையும் பரிசீலிக்கலாம்.

புகையிலையை விட உறுதியானது உங்களது மனம். அதை நிரூபிக்க இதுவே தருணம்!