அதிகரிக்கும் தேவை, உற்பத்தி குறைவு: விண்ணை எட்டும் கோதுமை மாவு விலை

மத்திய நுகர்வோர் விவகாரங்கள், உணவு மற்றும் பொது விநியோக அமைச்சகத்திற்கு மாநில சிவில் சப்ளைஸ் துறைகள் அளித்த தரவின் படி, கோதுமை மாவின் அகில இந்திய சராசரி சில்லறை விலை மே ஆரம்பத்தில்  கிலோ ரூ.32.78 ஆக இருந்தது. இது சென்ற ஆண்டு விலையை விட (கிலோ ரூ.30.03) 9.15 சதவீதம் அதிகம்.

நான்கு பெருநகரங்களில், சராசரி கோதுமை மாவின் சில்லறை விலை மும்பையில் கிலோ ரூ.49/- சென்னை ரூ. 34/கிலோ, கொல்கத்தா ரூ. 29/கிலோ மற்றும் டெல்லி ரூ. 27/கிலோ என விற்பனையாகிறது.

கோதுமை மாவின் அகில இந்திய சராசரி தினசரி சில்லறை விலை காலண்டர் ஆண்டின் தொடக்கத்தில் இருந்து அதிகரித்து வருகிறது. ஏப்ரல் 2021 இல் பதிவு செய்யப்பட்ட சராசரி சில்லறை விலை கிலோ ரூ.31 ஆக இருந்தது.

உற்பத்தி வீழ்ச்சி மற்றும் உக்ரைன் போர் காரணமாக இந்திய கோதுமைக்கான அதிக வெளிநாட்டு தேவை காரணமாக, கோதுமை விலை உயர்ந்து வருவதே மாவு விலையில் நிலையான அதிகரிப்புக்கு காரணம் என்று தகவல்கள் தெரிவித்தன.

உள்நாட்டில் டீசலின் விலை உயர்வு காரணமாக கோதுமை மற்றும் மாவு ஆகிய இரண்டின் போக்குவரத்து செலவைக் கூட்டியுள்ளது.

நாடு கோதுமை உற்பத்தி வீழ்ச்சியை சந்திக்கும் நேரத்தில் மாவு மற்றும் ரொட்டியின் விலைகள் உயர்ந்து வருகின்றன. 2021-22 ஆம் ஆண்டில் 110 மில்லியன் டன் கோதுமை உற்பத்தி இலக்கை அரசாங்கம் நிர்ணயித்துள்ளது, இது 2020-21 இல் மதிப்பிடப்பட்ட 109.59 மில்லியன் டன் உற்பத்தியை விட அதிகமாகும். ஆனால், மார்ச் மாதத்தில் வெப்பநிலையின் திடீர் அதிகரிப்பு, சாதனை உற்பத்திக்கான அரசாங்கத்தின் நம்பிக்கையைத் தகர்த்தது. 2021-22 ஆம் ஆண்டிற்கான மொத்த கோதுமை உற்பத்தி இலக்கை விட குறைவாக இருக்கலாம் என்று அதிகாரிகள் இப்போது கூறுகின்றனர்.

இதனிடையே பிரதான் மந்திரி கரிப் கல்யாண் அன்ன யோஜனா திட்டத்தின் கீழ் சில மாநிலங்கள் மற்றும் யூனியன் பிரதேசங்களுக்கான கோதுமை ஒதுக்கீட்டை செப்டம்பர் வரை குறைத்து மத்திய அரசு அறிவித்துள்ளது.

திருத்தப்பட்ட ஒதுக்கீட்டின்படி, பீகார், கேரளா மற்றும் உத்தரபிரதேசம் ஆகிய மூன்று மாநிலங்கள் இலவச உணவு திட்டத்தின் கீழ்  கோதுமையை பெறாது. தவிர, டெல்லி, குஜராத், ஜார்க்கண்ட், மத்தியப் பிரதேசம், மகாராஷ்டிரா, உத்தரகாண்ட் மற்றும் மேற்கு வங்கம் ஆகிய எட்டு மாநிலங்களின் கோதுமை ஒதுக்கீடு குறைக்கப்பட்டுள்ளது. மீதமுள்ள 25 மாநிலங்கள் மற்றும் யூனியன் பிரதேசங்களுக்கான கோதுமை ஒதுக்கீட்டில் எந்த மாற்றமும் இல்லை.