புளோரிடா கோல்ஃப் கிளப்பில் டிரம்ப் மீது கொலை முயற்சி: சந்தேக நபர் கைது

முன்னாள் அமெரிக்க அதிபரும், 2024 தேர்தலில் குடியரசுக் கட்சி வேட்பாளருமான டொனால்ட் டிரம்ப், புளோரிடாவில் உள்ள அவரது கோல்ஃப் கிளப் அருகே துப்பாக்கிச் சூடு நடத்தப்பட்டதைத் தொடர்ந்து அவர் பாதுகாப்பாக இருப்பதாக அமெரிக்க ரகசிய சேவை தெரிவித்துள்ளது. இந்தச் சம்பவத்தை 'கொலை முயற்சி'யாக விசாரித்து வருவதாக மத்திய புலனாய்வுப் பிரிவு (FBI) தெரிவித்துள்ளது .

ஞாயிற்றுக்கிழமை (இந்திய நேரப்படி இரவு 11.30 மணி) மதியம் 2 மணிக்கு முன்னதாக கோல்ஃப் கிளப் அருகே துப்பாக்கியுடன் நபர் ஒருவரைக் கண்ட ரகசிய சேவை அதிகாரிகள் அவர் மீது துப்பாக்கிச் சூடு நடத்தினர்.

சந்தேக நபர் சம்பவ இடத்திலிருந்து தப்பியோடினார், ஆனால் பின்னர் கைது செய்யப்பட்டார் மற்றும் 58 வயதான ரயான் வெஸ்லி ரூத் என அடையாளம் காணப்பட்டுள்ளார். அவரது நோக்கத்தை அதிகாரிகள் இன்னும் தீர்மானிக்கவில்லை.

இந்த சம்பவம் நடந்த உடனேயே, டிரம்ப், தனது ஆதரவாளர்களுக்கு அனுப்பிய மின்னஞ்சலில் தான் பாதுகாப்பாக இருப்பதாகவும், " ஒருபோதும் சரணடைய மாட்டேன்" என்றும் கூறினார் .

FBI, ஒரு அறிக்கையில், முன்னாள் ஜனாதிபதி ட்ரம்பை படுகொலை செய்ய முயற்சிப்பது போல் தோன்றுகிறது" என்று கூறியது.

கிளப்புக்கு வெளியே துப்பாக்கிச் சூடு நடந்தபோது டிரம்ப் கோல்ப் விளையாடிக் கொண்டிருந்ததாக கூறப்படுகிறது. இரகசிய சேவை முகவர்கள் அவரை கிளப்பில் ஒரு ஹோல்டிங் அறைக்கு அழைத்துச் சென்றதாக வாஷிங்டன் போஸ்ட் தெரிவித்துள்ளது. அதிகாரிகளின் கூற்றுப்படி, துப்பாக்கி சூடு நடத்தியவர் ட்ரம்ப் இருந்த இடத்தில் இருந்து சுமார் 275-450 மீட்டர் தொலைவில் இருந்தார்.

அதிகாரிகள் துப்பாக்கிச் சூடு நடத்தியதால், துப்பாக்கி ஏந்திய நபர் தனது துப்பாக்கி, இரண்டு பைகள் மற்றும் பிற பொருட்களை கீழே இறக்கிவிட்டு காரில் தப்பிச் சென்றார். ஒரு சாட்சி அவரது கார் மற்றும் உரிமத் தகட்டின் புகைப்படங்களை எடுக்க முடிந்தது, இது அருகிலுள்ள மார்ட்டின் கவுண்டியில் சில மணிநேரங்களில் அவரைக் கைது செய்ய காவல்துறைக்கு உதவியது.

புளோரிடாவில் உள்ள பாம் பீச் கவுண்டி ஷெரிப் அலுவலகத்தின் செய்தித் தொடர்பாளர் கூறுகையில், துப்பாக்கிச் சூடு சம்பவத்தில் காயங்கள் எதுவும் ஏற்படவில்லை.

இந்த சம்பவம் குறித்து அதிபர் ஜோ பைடன் மற்றும் துணை அதிபர் கமலா ஹாரிஸ் ஆகியோருக்கு தகவல் அளிக்கப்பட்டதாகவும், அவர் பாதுகாப்பாக இருப்பதை அறிந்து நிம்மதி அடைந்ததாகவும் வெள்ளை மாளிகை வெளியிட்டுள்ள அறிக்கையில் தெரிவிக்கப்பட்டுள்ளது.

டிரம்ப் மீதான இரண்டாவது கொலை முயற்சி குறித்து கருத்து தெரிவித்த பைடன் அமெரிக்காவில் எந்தவிதமான வன்முறைக்கும் இடமில்லை என்றார்.

"நான் பலமுறை கூறியது போல், நம் நாட்டில் அரசியல் வன்முறைகளுக்கோ அல்லது வன்முறைகளுக்கோ இடமில்லை, மேலும் முன்னையதை உறுதிப்படுத்துவதற்குத் தேவையான அனைத்து வளங்களும், திறன்களும் மற்றும் பாதுகாப்பு நடவடிக்கைகளும் இரகசிய சேவையில் இருப்பதைத் தொடர்ந்து உறுதிப்படுத்துமாறு எனது குழுவிற்கு நான் உத்தரவிட்டுள்ளேன்என்று அவர் ஒரு அறிக்கையில் தெரிவித்துள்ளார்.

என்ன நடந்தது என்பது பற்றிய கூடுதல் விவரங்களை சட்ட அமலாக்க அதிகாரிகள் சேகரித்து வருவதால், இந்த சம்பவம் குறித்து தீவிர விசாரணை நடைபெற்று வருவதாக பைடன் மேலும் கூறினார்.