மேச்சேரி-பென்னாகரம் நெடுஞ்சாலையில் மரம் விழுந்து போக்குவரத்து பாதிப்பு

மேச்சேரி - பென்னாகரம் நெடுஞ்சாலையில் புளியமரம் சாய்ந்து போக்குவரத்து பாதிப்பு

மேட்டூர் அருகே மேச்சேரி - பென்னாகரம் நெடுஞ்சாலையில் அமைந்துள்ள மல்லிகுந்தம் பிரிவு சாலையில் நேற்று மாலை 5:00 மணியளவில் எதிர்பாராத விபத்து ஒன்று நடைபெற்றது.

பலத்த காற்றுடன் கூடிய மழை பெய்த நேரத்தில், சாலையோரம் இருந்த பெரிய புளியமரம் ஒன்று வேருடன் சாய்ந்து மேச்சேரி - பென்னாகரம் நெடுஞ்சாலை குறுக்கே விழுந்தது. அருகில் இருந்த மின்கம்பத்தின் மீதும் விழுந்ததால், மல்லிகுந்தம் சுற்றுப்பகுதி முழுவதும் மின்தடை ஏற்பட்டது.

இந்த சம்பவம் குறித்து தகவல் அறிந்ததும், மேட்டூர் தீயணைப்பு நிலைய அலுவலர் வெங்கடேசன் தலைமையிலான தீயணைப்பு குழுவினர் சம்பவ இடத்திற்கு விரைந்தனர். வருவாய்த்துறை மற்றும் நெடுஞ்சாலைத்துறை அலுவலர்களுடன் இணைந்து, சாலையின் குறுக்கே விழுந்த புளியமரத்தை துண்டுகளாக வெட்டி அகற்றும் பணியில் ஈடுபட்டனர்.

இந்த சம்பவத்தால் சுமார் இரண்டு மணி நேரம் அந்த சாலையில் போக்குவரத்து முற்றிலும் பாதிக்கப்பட்டது. வாகனங்கள் நீண்ட வரிசையில் நின்றதால் பயணிகள் சிரமத்திற்கு உள்ளாயினர். மின்துறை ஊழியர்கள் பழுதடைந்த மின்கம்பத்தை சரிசெய்து மின்சாரம் வழங்கும் பணியிலும் ஈடுபட்டனர்.