விரைவில் தொடங்கவுள்ள முட்டுக்காடு மிதவை உணவகம்

சென்னை அருகே திருப்போரூர் ஒன்றியம், கிழக்கு கடற்கரை சாலை, முட்டுக்காடில் நீர் விளையாட்டு மையமாக படகு குழாம் உள்ளது. இது, தமிழ்நாடு சுற்றுலா மேம்பாட்டுக் கழகத்தால் இயக்கப்படுகிறது.

இதில், விசைப்படகுகள், துடுப்பு படகுகள், வேக படகுகள் என, 30க்கும் மேற்பட்ட படகுகள் உள்ளன. வார விடுமுறை, கோடை விடுமுறை நாளில், இங்கு பொழுது போக்குவதற்காக ஏராளமானோர் வருகின்றனர்.

மேலும், சுற்றுலா பயணியர் வருகையை அதிகரிக்கும் நோக்கில், படகு குழாமில், 5 கோடி ரூபாய் மதிப்பில், 125 அடி நீளம், 25 அடி அகலத்தில், இரண்டு அடுக்கு மிதவை உணவக கப்பல் தயாரிக்கப்படுகிறது.

ஏரியின் அழகை ரசித்தவாறே உணவருந்தக்கூடிய வகையில் தமிழ்நாட்டில் முதன் முறையாக மிதவை உணவகம் முட்டுக்காட்டில் அமைய உள்ளது. இந்த மிதவை உணவகம் தனியார் பங்களிப்புடன் செயல்படுத்தப்படும். ஒரு படகு தயார் செய்யப்பட்டு அந்தப் படகில் உணவகம் ஏற்படுத்தப்படும். முட்டுக்காடு ஏரியில் பயணித்தவாறு அந்த உணவகத்தில் அமர்ந்து சுற்றுலா பயணிகள் உணவருந்தலாம்.

இதில், தரை தளம் முழுதும் குளிர்சாதன வசதியும், முதல்தளம் திறந்த வெளியாகவும், சமையலறை, சேமிப்பு அறை, கழிப்பறை மற்றும் இயந்திர அறையுடன் கப்பல் வடிவமைக்கப்படுகிறது.

இந்த கப்பல், தமிழகசுற்றுலா வளர்ச்சிக்கழகம், கொச்சியைச் சேர்ந்த 'கிராண்ட்யூனர் மரைன் இன்டர்நேஷனல்' நிறுவனத்தின் சார்பில், தனியார் மற்றும் பொது பங்களிப்பு மூலம் உருவாகிறது.

கடந்த ஆறு மாதங்களாக, இதற்கான கட்டுமானப்பணிகள் படகு குழாம் வளாகத்தில் நடைபெற்று வருகின்றன. இதுவரை 75 சதவீதம் பணிகள் முடிவடைந்துள்ளன.

இன்னும் 15 நாட்களில், அனைத்து பணிகளும் முழுமையாக முடிக்கப்படும் என, சுற்றுலாத்துறை அதிகாரிகள் தெரிவித்து உள்ளனர்.

மிதவை உணவகத்தின் சிறப்பம்சங்கள்:

• 125 அடி நீளம் 25 அடி அகலத்தில் 2 அடுக்குகளை கொண்டிருக்கும்.

• இந்த படகில் சமையலறை, கழிவறை வசதிகள் உண்டு

• தரைத்தளம் முழுவதும் குளிரூட்டப்பட்ட வசதி.

• ஏரியில் நீரின் அளவு குறைவாக இருந்தால் கூட மிதக்கும்.