மூன்றாவது ஒருநாள் போட்டியில் இந்திய அணி அபார வெற்றி

IND vs WI ODI Score- வெஸ்ட் இண்டீசுக்கு சென்றுள்ள ஷிகர் தவான் தலைமையிலான இந்திய கிரிக்கெட் அணி 3 போட்டிகள் கொண்ட ஒரு நாள் தொடரில் பங்கேற்றுள்ளது. இதில் தொடக்க இரு ஆட்டங்களிலும் வெற்றி பெற்று இந்திய அணி தொடரை 2-0 என்ற கணக்கில் கைப்பற்றியது.

இந்த நிலையில் போர்ட் ஆப் ஸ்பெயினில் நடைபெற்ற 3-வது மற்றும் கடைசி ஒரு நாள் போட்டியில் டாஸ் வென்ற இந்திய அணியின் கேப்டன் ஷிகர் தவான் பேட்டிங் தேர்வு செய்தார். அதன்படி தொடக்க வீரர்களாக ஷிகர் தவான் மற்றும் சுப்மன் கில் களமிறங்கினர்.

சிறப்பான பார்மில் உள்ள இந்த தொடக்க ஜோடி வெஸ்ட் இண்டீஸ் அணியின் பந்துவீச்சை சிறப்பாக எதிர்கொண்டனர். தவான் 58 ரன்கள் எடுத்திருந்த போது வால்ஷ் பந்துவீச்சில் பூரனிடம் கேட்ச் கொடுத்து ஆட்டமிழந்தார். பின்னர் ஷ்ரேயஸ் ஐயர் களமிறங்கினார்.

இந்திய அணி 24 ஓவர்களில் 1 விக்கெட் இழப்பிற்கு 115 ரன்கள் எடுத்திருந்த போது மழை குறுக்கிட்டதால் ஆட்டம் தடைப்பட்டது. மழை நின்ற பின் போட்டி 40 ஓவர்களாக குறைக்கப்பட்டது. பேட்டிங்கில் அதிரடி முனைப்பு காட்டிய ஷ்ரேயஸ் ஐயர் 34 பந்துகளில் 44 ரன்கள் எடுத்து ஆட்டமிழந்தார். அவரை தொடர்ந்து வந்த சூர்யகுமார் யாதவ் 8 ரன்களில் ஆட்டமிழந்து ஏமாற்றம் அளித்தார். ஒரு முனையில் விக்கெட்கள் சரிந்தாலும் மறுமுனையில் சுப்மன் கில் சதத்தை நெருங்கி வந்தார். இந்திய அணி 36 ஓவர்களில் 3 விக்கெட் இழப்பிற்கு 225 ரன்கள் எடுத்திருந்த போது போட்டி மீண்டும் மழையால் பாதிக்கப்பட்டது.

சுப்மன் கில் 98 ரன்களுடன் களத்தில் இருந்தார். மேலும் தொடர்ந்து ஆட்ட நேரம் மழையால் பாதிக்கப்பட்டதால் இந்திய அணியின் இன்னிங்ஸ் முடிந்ததாக அறிவிக்கப்பட்டது. அப்போது இந்திய அணி 36 ஓவர்களில் 225 ரன்கள் எடுத்திருந்தது.

டி.எல்.எஸ் விதிப்படி வெஸ்ட் இண்டீஸ் அணி வெற்றி பெற 35 ஓவர்களில் 257 ரன்கள் இலக்காக நிர்ணயிக்கப்பட்டது. தொடக்க வீரர்களாக வெஸ்ட் இண்டீஸ் அணியின் ஷாய் ஹோப், கைல் மேயெர்ஸ் களமிறங்கினர். மேயெர்ஸ், ப்ரூக்ஸ் ஆகியோர் ரன் எதுவும் எடுக்காமல் சிராஜ் பந்துவீச்சில் அடுத்தடுத்து ஆட்டமிழந்தனர். அடுத்து பிராண்டன் கிங் சிறப்பாக விளையாடி ரன்கள் குவித்தார். மறுபுறம் ஷாய் ஹோப் 22 ரன்களில் ஆட்டமிழந்தார். பின்னர் நிக்கோலஸ் பூரன் நிதான ஆட்டத்தை வெளிப்படுத்தினார்.

அணியின் ஸ்கோர் 74 ரன்னாக இருந்த போது பிராண்டன் கிங் 42 ரன்களில் வெளியேறினார். தொடர்ந்து நிக்கோலஸ் பூரன் 42 ரன்களில் ஆட்டமிழந்தார் .அடுத்து வந்த வீரர்களும் இந்திய அணியின் பந்து வீச்சை சமாளிக்க முடியாமல் அடுத்தடுத்து வெளியேறினர்,

இறுதியில் வெஸ்ட் இண்டீஸ் அணி26 ஓவர்கள் முடிவில் 10 விக்கெட் இழப்பிற்கு 137 ரன்கள் எடுத்தது. சாஹல் 4 விக்கெட்டுகள் வீழ்த்தினார். 3 போட்டிகள் கொண்ட ஒருநாள் தொடரை 3-0 என இந்திய அணி கைப்பற்றியது

அடுத்த முக்கியமான செய்திகளை தெரிந்துகொள்ள: Click Here-1, Click Here-2