ஜெய்ஸ்வால், சுப்மன் கில் அதிரடியால் இந்திய அணி அபார வெற்றி

இந்தியா - வெஸ்ட் இண்டீஸ் இடையேயான 4வது டி20 போட்டி அமெரிக்காவின் புளோரிடா மாகாணத்தில் நடைபெற்றது. இதில் டாஸ் வென்ற மேற்கிந்திய தீவுகள் அணி பேட்டிங்கைத் தேர்வு செய்தது.

மேற்கிந்திய தீவுகள் அணியில் கைல் மேயர்ஸ், பிரண்டன் கிங் தொடக்க ஆட்டக்காரர்களாக களமிறங்கினர். தொடக்க ஆட்டக்காரர்கள் இருவரும் சுமாரான தொடக்கத்தை அளித்தனர். மேயர்ஸ் 17 ரன்களில் ஆட்டமிழந்தார். பிரண்டன் கிங் 18 ரன்கள் எடுத்து ஆட்டமிழந்தார். இதனை தொடர்ந்து களமிறங்கிய ய் ஹோப் அதிரடியாக விளையாடி ரன்களை குவித்தார். 29 பந்துகளில் 45 ரன்கள் எடுத்த நிலையில் ஆட்டமிழக்க. அடுத்து களமிறங்கிய அதிரடி வீரர்களான நிக்கோலஸ் பூரன் மற்றும் கேப்டன் ரோவ்மேன் பவல் இருவரும் தலா 1 ரன்னில் ஆட்டமிழந்தனர்.

பின்னர் களமிறங்கிய ஹெட்மயர், தனது அதிரடி ஆட்டத்தால் அணியின் ஸ்கோரை வேகமாக உயர்த்தினார். அவர் 39 பந்துகளில் 3 பவுண்டரி, 4 சிக்சருடன் 61 ரன்கள் எடுத்து அவுட்டானார். அடுத்து வந்த வீரர்கள் சொற்ப ரன்னில் ஆட்டமிழந்தனர்

இறுதியில் மேற்கிந்திய தீவுகள் 20 ஓவர்கள் முடிவில் 8 விக்கெட் இழப்புக்கு 178 ரன்கள் எடுத்தது. இந்திய அணி தரப்பில் அர்ஸ்தீப் சிங் அதிகபட்சமாக 3 விக்கெட்டுகளும், குல்தீப் யாதவ் 2 விக்கெட்டுகளும், அக்சர் பட்டேல், சாஹல், முகேஷ் குமார் ஆகியோர் தலா ஒரு விக்கெட்டும் வீழ்த்தினர்

இதனை தொடர்ந்து 179 ரன்கள் எடுத்தால் வெற்றி என்ற இலக்குடன் இந்திய அணியின் சார்பில் ஜெய்ஸ்வால் மற்றும் சுப்மன் கில் ஆகியோர் களமிறங்கினர். சிறப்பாக ஆட்டத்தை வெளிப்படுத்திய இந்த ஜோடி அதிரடியாக ரன்களை குவித்து அணியின் ஸ்கோரை வேகமாக உயர்த்தியது. தொடர்ந்து அதிரடி காட்டிய இந்த ஜோடியில் ஜெய்ஸ்வால் மற்றும் சுப்மன் கில் ஆகியோர் தங்களது அரை சதத்தை பதிவு செய்து அசத்தினர்.

வெஸ்ட் இண்டீஸ் பந்து வீச்சாளார்கள் இந்த ஜோடியின் விக்கெட்டை வீழ்த்த எடுத்துக் கொண்ட முயற்சிகள் தோல்வியடைந்தன. இறுதியில் வெற்றி பெற 14 ரன்கள் தேவைப்பட்டநிலையில் சுப்மன் கில் 47 பந்துகளில் 3 பவுண்டரிகள், 5 சிக்சர்களுடன் 77 ரன்கள் எடுத்த நிலையில் ஆட்டமிழந்தார்.

அடுத்ததாக ஜெய்ஸ் வாலுடன் இணைந்த திலக் வர்மா சிறப்பான ஆட்டத்தை வெளிப்படுத்தி, அணியை வெற்றிப்பாதைக்கு அழைத்துச் சென்றது.

சிறப்பாக ஆடிய ஜெய்ஸ்வால் ஆட்டமிழக்காமல் 84 (51) ரன்களும், திலக் வர்மா 7 (5) ரன்களும் எடுத்தனர். இறுதியில் இந்திய அணி 17 ஒவர்களில் ஒரு விக்கெட்டை மட்டுமே இழந்து 179 ரன்கள் எடுத்து வெற்றி பெற்றது.

மேற்கிந்திய தீவுகள் அணியின் சார்பில் ஷெப்பர்டு ஒரு விக்கெட் வீழ்த்தினார். இதன்மூலம் 4-வது டி20 போட்டியில் இந்திய அணி 9 விக்கெட்டுகள் வித்தியாசத்தில் வெற்றிபெற்றது.

இதன்படி 5 போட்டிகள் கொண்ட டி20 தொடரில் 2-2 என்று இரு அணிகளும் சம நிலையில் உள்ளனர். இரண்டு அணிகளுக்கு எதிரான 5-வது மற்றும் இறுதி டி 20 போட்டி இன்று நடைபெறுகிறது.