IND Vs WI ODI: 3 ரன்கள் வித்தியாசத்தில் இந்திய அணி திரில் வெற்றி

India Won The Match- வெஸ்ட் இண்டீசில் சுற்றுப்பயணம் மேற்கொண்டுள்ள இந்திய கிரிக்கெட் அணி 3 ஒரு நாள் மற்றும் ஐந்து 20 ஓவர் போட்டிகளில் விளையாடுகிறது. இந்தியா- வெஸ்ட் இண்டீஸ் இடையிலான முதலாவது ஒரு நாள் போட்டி போர்ட் ஆப் ஸ்பெயினில் நேற்று நடந்தது.

இந்திய அணியில் இஷான் கிஷனுக்கு பதிலாக சுப்மான் கில்லுக்கு வாய்ப்பு அளிக்கப்பட்டது. வெஸ்ட் இண்டீஸ் அணியில் கொரோனா தொற்று காரணமாக ஆல்-ரவுண்டர் ஜாசன் ஹோல்டர் சேர்க்கப்படவில்லை. .

'டாஸ்' ஜெயித்த வெஸ்ட் இண்டீஸ் கேப்டன் நிகோலஸ் பூரன் முதலில் இந்தியாவை பேட்டிங் செய்ய அழைத்தார். இந்திய அணியின் தொடக்க ஆட்டக்காரர்களாக கேப்டன் ஷிகர் தவானும், சுப்மான் கில்லும் களம் புகுந்தனர். நிதானமாக ஆடிய இவர்கள் ஸ்கோரை துரிதமாக உயர்த்தினர். வெஸ்ட் இண்டீஸ் பவுலர்களால் பந்துவீச்சில் பெரிய அளவில் தாக்கத்தை ஏற்படுத்த முடியவில்லை. சுப்மான் கில் 36 பந்துகளில் தனது முதலாவது அரைசதத்தை பூர்த்தி செய்தார். 14 ஓவர்களில் இந்தியா 100 ரன்களை தொட்டது.

ஸ்கோர் 119-ஐ எட்டிய போது, பந்தை அருகில் தட்டிவிட்டு ஒரு ரன்னுக்கு ஓட முயற்சித்த சுப்மான் கில் (64 ரன், 53 பந்து, 6 பவுண்டரி, 2 சிக்சர்) நிகோலஸ் பூரனால் ரன்-அவுட் செய்யப்பட்டார். அடுத்து தவானுடன் கைகோர்த்த ஸ்ரேயாஸ் ஐயரும் சிறப்பாக ஆடினார். இவர்கள் ஆடிய விதத்தை பார்த்த போது இந்திய அணி 350 ரன்களை நெருங்கும் போல் தோன்றியது.

ஆனால் ஷிகர் தவான் 97 ரன்களில் ( 99 பந்து, 10 பவுண்டரி, 3 சிக்சர்) குடகேஷ் மோட்டியின் சுழற்பந்து வீச்சில் கேட்ச் ஆனார். தொடர்ந்து ஸ்ரேயாஸ் அய்யர் 54 ரன்னிலும் (57 பந்து, 5 பவுண்டரி, 2 சிக்சர்), சூர்யகுமார் யாதவ் 13 ரன்னிலும், சஞ்சு சாம்சன் 12 ரன்னிலும் வெளியேறினர்.

40 ரன் இடைவெளியில் 4 விக்கெட்டுகளை இழந்ததால் கடைசி கட்டத்தில் இந்தியாவின் ரன்வேகம் கொஞ்சம் குறைந்தது.

ஆனால், தீபக் ஹூடாவும் (27 ரன்), அக்‌ஷர் பட்டேலும் (21 ரன்) அணியின் ஸ்கோரை 300-ஐ தாண்ட வைத்தனர். நிர்ணயிக்கப்பட்ட 50 ஓவர்களில் இந்தியா 7 விக்கெட்டுக்கு 308 ரன்கள் குவித்தது.

பின்னர் 309 ரன் இலக்கை நோக்கி வெஸ்ட் இண்டீஸ் அணி தொடக்க ஆட்டக்காரர்களாக சாய் ஹோப் மற்றும் கெயில் மேயர்ஸ் ஆகியோர் களமிறங்கினர். சாய் ஹோப் 7 ரன்களில் ஆட்டமிழந்தார். அடுத்ததாக மேயர்சுடன், சாமர் பூரூக்ஸ் ஜோடியின் நிதான ஆட்டத்தால் அணியின் ரன்ரேட் சீராக உயர்ந்தது.

பூருக்ஸ் 46 ரன்களில் ஆட்டமிழக்க, கெயில் மேயர்ஸ் 75 ரன்களில் வெளியேறினார். அடுத்து களமிறங்கிய கேப்டன் நிகோலஸ் பூரன் 25 ரன்களும், ரோவன் பவல் 6 ரன்களும் எடுத்து ஆட்டமிழந்தனர்.

மறுமுனையில் நிதானமாக ஆடிய பிராண்டன் கிங் 54 ரன்களில் கேட்ச் ஆகி வெளியேறினார். முடிவில் தங்களது அதிரடியான ஆட்டத்தால் அணியின் ரன்ரேட்டை வேகமாக உயர்த்திய அகேல் ஹூசைன் 32 (32) ரன்களும், ரோமோரியோ செப்பர்டு 39 (25) ரன்களும் எடுத்தனர்.

கடைசி ஓவரில் 15 தேவைப்பட்ட நிலையில் சிராஜ் சிறப்பாக பந்து வீசி 11 ரன்கள் மட்டுமே கொடுத்தார். கடைசிவரை ஆட்டமிழக்காமல் களத்தில் இருந்தனர்.

இறுதியில் வெஸ்ட் இண்டீஸ் அணி 50 ஒவர்களில் 6 விக்கெட்டுகளை இழந்து 305 ரன்கள் எடுத்தது. இந்திய அணியின் சார்பில் அதிகபட்சமாக முகமது சிராஜ், ஷர்துல் தாக்கூர் மற்றும் சாஹல் ஆகியோர் தலா 2 விக்கெட்டுகள் வீழ்த்தினர்.

இதன்மூலம் முதலாவது ஒரு நாள் கிரிக்கெட் போட்டியில் இந்திய அணி 3 ரன்கள் வித்தியாசத்தில் திரில் வெற்றி பெற்றது. 3 போட்டிகள் கொண்ட ஒருநாள் தொடரில் 1-0 என்ற கணக்கில் இந்திய கிரிக்கெட் அணி முன்னிலை வகிக்கிறது.

அடுத்த முக்கியமான செய்திகளை தெரிந்துகொள்ள: Click Here-1, Click Here-2