பேரீச்சம்பழத்தை தண்ணீரில் ஊறவைத்து தினமும் சாப்பிட்டால்...?

Eating dates soaked in water- பேரீச்சம்பழத்தை தண்ணீரில் ஊறவைத்து தினமும் சாப்பிடுவதால் கிடைக்கும் நன்மைகள்

பேரீச்சம்பழம் ஒரு இயற்கையான இனிப்பு வகை. அதுமட்டுமல்லாமல் நார்ச்சத்து, தாதுக்கள் மற்றும் வைட்டமின்கள் நிறைந்த ஒரு ஆரோக்கியமான சூப்பர்ஃபுட். பேரீச்சம்பழத்தை தண்ணீரில் ஊறவைத்து சாப்பிடுவதால் நம் உடல் ஆரோக்கியம் மேம்படுவதாக பல ஆய்வுகள் கூறுகின்றன. அதனால், பேரீச்சம்பழத்தை ஊறவைத்து சாப்பிடும் முறை பற்றியும் அதன் நன்மைகள் பற்றியும் இந்த கட்டுரையில் விரிவாகப் பார்ப்போம்.

பேரீச்சம்பழத்தை எப்படி ஊறவைப்பது?

நான்கு அல்லது ஐந்து பேரீச்சம் பழங்களை எடுத்து நன்றாக தண்ணீரில் கழுவ வேண்டும்.

பிறகு ஒரு கிளாஸ் தண்ணீரில் அவற்றைப் போட்டு இரவு முழுவதும் ஊற வைக்க வேண்டும்.

காலையில் தண்ணீரை வடிகட்டி விட்டு ஊற வைத்த பேரீச்சம் பழங்களை ஒரு ஸ்பூன் தேனுடன் சாப்பிட வேண்டும்.

பேரீச்சம்பழத்தை தண்ணீரில் ஊற வைத்து சாப்பிடுவதால் கிடைக்கும் நன்மைகள்

செரிமான ஆரோக்கியத்தை மேம்படுத்துகிறது: பேரீச்சம்பழத்தில் நார்ச்சத்து அதிக அளவு உள்ளது. இது மலச்சிக்கலைத் தடுப்பதற்கும் செரிமான மண்டலத்தின் ஆரோக்கியத்தை மேம்படுத்துவதற்கும் உதவுகிறது. தினசரி ஊறவைத்த பேரீச்சம் பழத்தை சாப்பிட்டு வந்தால், முறையாக மலம் கழிக்க உதவுவதோடு, குடல் நலனையும் மேம்படுத்தும்.

இரத்த சோகையைத் தடுக்கிறது: பேரீச்சம்பழத்தில் இரும்புச் சத்து நிறைந்துள்ளது. இரும்புச் சத்து குறைபாடு இரத்த சோகைக்கு முக்கிய காரணம். இந்த குறைபாட்டை போக்க பேரீச்சம்பழத்தை தண்ணீரில் ஊறவைத்து சாப்பிடுவது மிகவும் உதவியாக இருக்கிறது. குறிப்பாக பெண்கள் மற்றும் குழந்தைகள் இந்த முறையை பின்பற்றலாம்.

ஆற்றலை அதிகரிக்கிறது: பேரீச்சம்பழத்தில் இயற்கையான சர்க்கரை நிறைந்துள்ளது. அதனால் உடனடி ஆற்றலை அளிக்கிறது. நீங்கள் சோர்வாக உணரும்போது நீங்கள் பேரீச்சம்பழத்தை சாப்பிட்டு உடனடி ஆற்றலைப் பெறலாம். குறிப்பாக உடற்பயிற்சி செய்பவர்கள், நீண்ட நேரம் உடல் உழைப்பு செய்பவர்கள் தினமும் காலையில் இந்த பழத்தை சாப்பிட்டால் நல்ல பலனைப் பெறலாம்.

எலும்பு ஆரோக்கியத்தை மேம்படுத்துகிறது: பேரீச்சம்பழத்தில் கால்சியம், பொட்டாசியம், பாஸ்பரஸ் மற்றும் மெக்னீசியம் போன்ற எலும்புகளை வலுவாக்கும் தாதுக்கள் உள்ளன. இந்த முக்கிய தாதுக்கள் எலும்பு முறிவு, ஆஸ்டியோபோரோசிஸ் (எலும்பு தேய்மானம்) போன்ற எலும்பு சார்ந்த நோய்களைத் தடுக்கவும், எலும்புகளை வலுப்படுத்தவும் உதவுகின்றன.

இதய ஆரோக்கியத்தைப் பாதுகாக்கிறது: பேரீச்சம்பழத்தில் இதயத்திற்கு நன்மை தரும் பொட்டாசியம் நிறைந்துள்ளது. இவை இரத்த அழுத்தத்தைக் குறைப்பதோடு, இதயம் சீராக செயல்படவும் உதவுகிறது. இதய நோய் அபாயத்தைத் தடுக்க பேரீச்சம்பழத்தை உட்கொள்வது மிக நல்லது.

சருமம் மற்றும் கூந்தலைப் பராமரிக்கிறது: வைட்டமின் சி மற்றும் டி போன்ற அத்தியாவசிய வைட்டமின்கள் பேரீச்சம் பழத்தில் உள்ளன. இவை சருமம், முடி ஆரோக்கியத்திற்கு பெரிதும் உதவுகின்றன. பேரீச்சம்பழத்தை சாப்பிட்டால் சரும பொலிவைப் பெறலாம். முடி உதிர்வைத் தடுக்கலாம்.

நோய் எதிர்ப்பு சக்தியை அதிகரிக்கிறது: பேரீச்சம்பழத்தில் வைட்டமின்கள், ஆன்டி-ஆக்ஸிடன்ட்டுகள் மற்றும் ஆன்டி-இன்ஃபிளமேட்டரி பண்புகள் உள்ளன. இவை நோய் எதிர்ப்பு சக்தியை அதிகரிக்க உதவுவதோடு, நாள்பட்ட நோய்கள் ஏற்படும் அபாயத்தையும் குறைக்கின்றன.

நரம்பு மண்டலத்தைச் சீராக்குகிறது: பேரீச்சம்பழத்தில் பொட்டாசியம் அதிக அளவில் காணப்படுகிறது. பொட்டாசியம் நரம்பு மண்டலத்தின் சீரான இயக்கத்திற்கு மிகவும் அவசியம். எளிதில் பதட்டம் அடையாமல் இருக்கவும், நிம்மதியான மனநிலையை அடையவும் பேரீச்சம்பழம் உதவுகிறது.

குறிப்பு

பேரீச்சம்பழம் மிகவும் இனிப்பானது. எனவே சர்க்கரை நோய் உள்ளவர்கள் மருத்துவரின் ஆலோசனைப்படி மிதமான அளவில் உட்கொள்ளவேண்டும். மேலும், எந்த உணவாயினும் அளவுக்கு அதிகமாக சாப்பிடுவது பல பக்க விளைவுகளை ஏற்படுத்தும்.

பேரீச்சம்பழம் பல ஆரோக்கிய நன்மைகளை வாரி வழங்கக்கூடிய ஒன்று. ஊட்டச்சத்துக்கள் நிறைந்த இந்தப் பழத்தை அதிக தண்ணீரில் ஊறவைத்து சாப்பிடும் பழக்கம் உடல் ஆரோக்கியத்தை அற்புதமாக மேம்படுத்த உதவுகிறது. மேற்கூறிய அனைத்து நன்மைகளையும் முழுமையாகப் பெற, தினமும் குறைந்தது ஐந்து முதல் ஆறு பேரீச்சம்பழங்களை தண்ணீரில் ஊறவைத்து சாப்பிட்டு வரலாம்.