ஆமணக்கு எண்ணெய்ல இவ்ளோ மகத்துவம் இருக்கா?

காலம் காலமாக நம் முன்னோர்களால் பயன்படுத்தப்பட்டு வரும் ஆமணக்கு எண்ணெய், தமிழக வீடுகளில் பெரும்பாலும் காணப்படும் பொருளாகும். இந்த இயற்கையான எண்ணெயில் பல்வேறு நன்மைகள் நிறைந்துள்ளன. சருமம் மற்றும் கூந்தல் பராமரிப்பில் பல நூற்றாண்டுகளாக பயன்படுத்தப்படும் ஆமணக்கு எண்ணெயின் நன்மைகள் அளப்பரியது. அதுமட்டுமின்றி, அன்றாட வாழ்வின் பல பிரச்சனைகளுக்கும் இது ஒரு சிறந்த தீர்வளிக்கும் என்பதை பலரும் அறிவதில்லை.

அதனால்தான், இந்த கட்டுரையில் ஆமணக்கு எண்ணெயின் வரலாறு, அதன் மகத்துவம், அது உடலுக்கு தரும் பல்வேறு ஆரோக்கிய நன்மைகள், அழகு சாதனப் பொருளாக அதன் பயன்கள் என விரிவாகப் பார்க்க இருக்கிறோம்.

ஆமணக்கு எண்ணெய்யின் வரலாறு

ஆமணக்கு எண்ணெய் 'ரிசினஸ் கம்யூனிஸ்' (Ricinus Communis) என்ற தாவரத்தின் விதைகளிலிருந்து எடுக்கப்படுகிறது. இந்தச் செடி வெப்ப மண்டல பகுதிகளில் அதிக அளவில் காணப்படுகிறது. இந்தியா, ஆப்ரிக்கா, தென்னமெரிக்கா போன்ற நாடுகளில் பல நூற்றாண்டுகளாக, பல்வேறு தேவைகளுக்காக ஆமணக்கு எண்ணெய் பயன்படுத்தப்பட்டு வருகிறது.

பண்டைய எகிப்திய நாகரிகத்தில் ஆமணக்கு எண்ணெய் தீபங்கள் எரிப்பதற்கு பயன்படுத்தப்பட்டது. இது வலி நிவாரணி மற்றும் மலமிளக்கியாகவும் பாரம்பரிய மருத்துவத்தில் பயன்படுத்தப்பட்டு வருகிறது.

ஆமணக்கு எண்ணெய்யில் நிறைந்துள்ள சத்துக்கள்

ஆமணக்கு எண்ணெய் ஆரோக்கியத்திற்கு பெரும் நன்மைகளைத் தரும் என்பதற்கு இதிலுள்ள ஊட்டச்சத்துக்கள்தான் காரணம். இதில் ரிக்னோலிக் அமிலம் (Ricinoleic acid) என்னும் கொழுப்பு அமிலம் அதிக அளவில் நிறைந்துள்ளது. அத்துடன் வைட்டமின் ஈ, அமினோ அமிலங்கள் மற்றும் தாதுக்களும் இதில் உள்ளன.

உடல் ஆரோக்கியத்திற்கான நன்மைகள்

மலச்சிக்கலை கட்டுப்படுத்தும்: ஆமணக்கு எண்ணெய் அதன் மலமிளக்கி பண்புகளுக்கு பலராலும் அறியப்படுகிறது. ஒரு தேக்கரண்டி ஆமணக்கு எண்ணெயை காலையில் வெறும் வயிற்றில் உட்கொள்வதன் மூலம், மலச்சிக்கலை திறம்பட சரிசெய்ய முடியும்.

வலியை குறைக்கிறது: ஆமணக்கு எண்ணெய்யை வலி உள்ள பகுதியில் தடவி மசாஜ் செய்வதன் மூலம், மூட்டு மற்றும் தசை வலியிலிருந்து நிவாரணம் பெறலாம். இதிலுள்ள அழற்சி எதிர்ப்பு மற்றும் வலி நிவாரணி பண்புகளுக்கு ரிக்னோலிக் அமிலம் (Ricinoleic acid) தான் காரணம்.

நோய் எதிர்ப்பு சக்தியை அதிகரிக்கும்: நம் உடலில் நிணநீர் அமைப்பு சரியாக செயல்பட ஆமணக்கு எண்ணெய் பெரிதும் உதவுகிறது. நிணநீர் அமைப்பு என்பது நோயெதிர்ப்பு செயல்பாட்டில் முக்கிய பங்கு வகிக்கிறது. இது உடலின் நோய் எதிர்ப்பு சக்தியை அதிகரிக்க உதவுகிறது.

இயற்கையான அழகுப் பொருள்

அழகு சாதனப் பொருட்களில் ஒன்றாக ஆமணக்கு எண்ணெய் பரவலாக பயன்படுகிறது.

சரும பிரச்சனைகளை சரி செய்கிறது: முகப்பரு, கரும்புள்ளிகள், தோல் சுருக்கம், தழும்புகள் என ஏராளமான சரும பிரச்சனைகளுக்கு ஆமணக்கு எண்ணெய் வீட்டிலேயே தயாரிக்கக்கூடிய இயற்கையான தீர்வாக அமைகிறது. இதனை பாதிக்கப்பட்ட இடத்தில் மட்டும் நேரடியாக தடவி வரலாம்.

முடி உதிர்வை கட்டுப்படுத்தும் ஆமணக்கு எண்ணெய்யை இளஞ்சூடாக்கி தலைமுடியின் வேர்கால்களில் மசாஜ் செய்வதன் மூலம் முடி வளர்ச்சியை ஊக்குவிக்க முடியும். மேலும் இது முடி உதிர்வை தடுத்து, அடர்த்தியான கூந்தலை பெற உதவுகிறது.

ஆரோக்கியமான நகங்கள் : நம் உடல் ஆரோக்கியத்தில் நகங்களும் முக்கிய பங்கு வகிக்கின்றன. வலுவிழந்த, உடையக்கூடிய நகங்களை வலுவாக்க ஆமணக்கு எண்ணெயை நகங்கலில் பூசி மசாஜ் செய்து வர நல்ல பலன் கிடைக்கும்.

பயன்படுத்தும் போது கவனத்தில் கொள்ளவேண்டியவை

பொதுவாக ஆமணக்கு எண்ணெய் பாதுகாப்பானது என்றாலும், அளவுக்கு அதிகமாக பயன்படுத்துவதை தவிர்க்க வேண்டும். கர்ப்பிணிப் பெண்கள் மற்றும் பாலூட்டும் தாய்மார்கள் மருத்துவரின் ஆலோசனைப்படி பயன்படுத்த வேண்டும். சிலருக்கு இவ்வெண்ணெய் ஒவ்வாமையை ஏற்படுத்தலாம். எனவே, பயன்படுத்துவதற்கு முன், சிறிதளவை தோலில் பூசி, எந்தவித அழற்சியும் ஏற்படுகிறதா என்று பார்த்த பிறகே பயன்படுத்த வேண்டும்.

இறுதியாக...

ஆமணக்கு எண்ணெய் பலவித நன்மைகளைக் கொண்ட பாரம்பரிய தீர்வாகும். இதனை அளவோடு பயன்படுத்தும் போது அழகு மற்றும் ஆரோக்கியம் இரண்டிலும் பன்மடங்கு பலன் கிடைத்திடும்