beetroot powder: முகம் பொலிவு பெற பீட்ரூட் பவுடர், ரொம்ப ஈசிங்க

உடனடியாக தேவைப்படுகிறது என்றால் கையில் சட்டென்று கிடைக்ககூடிய பொருள்களை கொண்டுதான் அழகு குறிப்புக்கு பராமரிக்க வேண்டியிருக்கிறது. ஆனால் இப்போது அழகு பராமரிப்புக்கு இயற்கையில் கிடைக்கும் பொருள்களை வைத்து தயாரித்து வைத்துகொள்ளலாம். இதனால் பணமும் மிச்சமாகும், பக்கவிளைவுகளும் இருக்காது

அந்த வகையில் பீட்ரூட்டை கொண்டு உதடுகளை இயற்கையாக சிவப்பு நிறம் வரும்படி செய்யலாம். அவ்வப்போது இதை மசித்து உதட்டுக்கு மட்டும் தடவுவது உண்டு. ஆனால் இதை பொடியாக்கி வைத்து கொண்டால் முகத்துக்கும் சேர்த்து பயன்படுத்தலாம். எல்லா அழகு பராமரிப்பிலும் இதை சேர்த்து பயன்படுத்தினால் அழகை கூடுதலாக பெறமுடியும்.

புதிதாக இருக்கும் பீட்ரூட்டை வாங்கி தோலை நீக்கி சிறு சிறு துண்டுகளாக நறுக்கி கொள்ளுங்கள். பிறகு மெல்லிய துணியில் அதை நிழலில் உலர்த்தி எடுங்கள். தொடர்ந்து இரண்டு அல்லது மூன்று நாட்கள் காயவைத்து எடுத்தால் அதன் ஈரப்பதம் குறைந்திருக்கும். நன்றாக ஈரம் குறைந்திருக்க வேண்டும் அப்போதுதான் மிக்ஸியில் அரைக்கும் போது பொடியாக்க முடியும்.

நன்றாக காய்ந்ததும் சிறிது சிறிதாக மிக்ஸியில் நறுக்கி பொடித்து விடுங்கள். பொடி ஈரமாக இருந்தால் மீண்டும் ஒருநாள் முழுக்க நிழலில் உலர்த்தி காயவிடுங்கள். பிறகு மீண்டும் மிக்ஸியில் பொடித்து அதை மெல்லிய துணியில் வடிகட்டி கண்ணாடி பாட்டிலில் அடைத்து வையுங்கள். வெளியில் வைக்க வேண்டாம். ஃப்ரிட்ஜ்ஜில் வைத்து தேவையான போது பயன்படுத்துங்கள்.

பீட்ரூட் பவுடரை எப்படியெல்லாம் பயன்படுத்தலாம்?

இயற்கை ஹேர் டை தயாரிக்கும் போது ஒரு டீஸ்பூன் பீட்ரூட் பொடியை சேர்த்துக் கொள்ளலாம். அல்லது வெறும் பீட்ரூட் பவுடரை மட்டுமே ஊறவைத்து இளநரை இருக்கும் பகுதியில் தடவி காயவிட்டால் போதும். இதனால் தலைக்கு குளிக்கவேண்டிய அவசியம் இல்லை. இதே போன்று தலை சீவிய பிறகு பீட்ரூட் பவுடரை சிறிதளவு நீர் சேர்த்து கலந்து தலைக்கு ஸ்ப்ரே செய்தாலே போதும். தினமும் செய்துவந்தாலே இளநரைக்கு குட்பை சொல்லலாம்.

வெளியில் செல்லும் போது மட்டும் லிப்ஸ்டிக் பயன்படுத்தலாம். மற்ற நேரங்களில் லிப்ஸ்டிக் பயன்படுத்துவதற்கு பதில் பீட்ரூட் பவுடரை பாலில் குழைத்து பூசி வாருங்கள். தினமும் இரவு நேரங்களில் படுக்கும் முன்பு பீட்ரூட்டை குழைத்து உதட்டுக்கு போட்டு வந்தால் போதும் தொடர்ந்து ஒரு மாதம் பயன்படுத்தினாலே உதடு லிப்ஸ்டிக் போடாமலே அழகாய் இருக்கும். பீட்ரூட் பவுடருன் குங்குமப்பூ குச்சிகளையும் கலந்து பயன்படுத்தினால் உதடு மேலும் சிவக்கும்.

முகத்தில் இருக்கும் கரும்புள்ளிகள், பருக்கள், பருக்களால் ஏற்படும் வடுக்கள், தழும்புகள் அனைத்துமே முகத்தின் நிறத்தை மாற்றிவிடும். முகம் இழந்த நிறத்தை மீண்டும் பெற பீட்ரூட் பவுடரை பாலில் குழைத்து முகத்தில் பேக் போடுங்கள். இதனால் முகம் இயற்கையாக சிவப்பாக மாறும்.

முகத்தில் கரும்புள்ளிகள் மறைய பீட்ரூட் பவுடருடன் கற்றாழை சாறு சேர்த்து முகத்தில் தடவி 20 நிமிடங்கள் கழித்து முகத்தை கழுவினால் முகம் பளிச்சென்று இருக்கும். விழாக்களுக்கு செல்லும் போது ஃபேஷியல் செய்வதுண்டு. மாறாக வீட்டிலேயே பேக் பயன்படுத்தும் போது சந்தனத்தூளுடன் சம அளவு பீட்ரூட் பவுடர் கலந்து பேக் போட்டால் கோல்டன் ஃப்பேஷியல் செய்த லுக் கிடைக்கும்.

முகத்தில் இருக்கும் அழுக்குகளை நீக்கி முகச்சோர்வை விரட்டி அடிக்க பீட்ரூட்டுடன் சம அளவு தயிர் கலந்து முகத்துக்கு மசாஜ் செய்தால் சருமத்துவாரங்களில் இருக்கும் இறந்த செல்கள் வெளியேற்றப்பட்டு முகம் புத்துணர்ச்சியாய் இருக்கும்.

மூக்கின் நுனியில் இருக்கும் கருப்பு அல்லது வெள்ளை நிற கொழுப்பு படலங்களை வெளியே எடுக்க பீட்ரூட் பவுடருடன் ஓட்ஸ் பொடித்து சேர்த்து தேய்த்து வந்தால் மூக்கின் நுனி கருப்பு நிறமாக மாறாது. இப்படி எல்லா பயன்பாடுகளிலும் பீட்ரூட் பவுடரை பயன்படுத்தலாம். நிச்சயம் அழகை அதிகரித்து காணலாம்.

கால்களுக்கு பெடிக்யூர் செய்யும் போது பீட்ரூட்டை கற்றாழை சாறில் குழைத்து பாதங்களின் மீது தடவினால் பாதம் வெடிப்பு நீங்கி கால் பாதங்கள் சிவப்பாய் மிளிரும்.

பீட்ரூட்டை குழைத்து தொடை இடுக்கில் இருக்கும் கருமையை நீக்கவும் பயன்படுத்தலாம். அக்குளில் இருக்கும் கருமையை நீக்கவும் பயன்படுத்தலாம்.

முக்கியமாக கவனிக்க வேண்டியது

பீட்ரூட் பவுடரை 6 மாதங்கள் வரை மட்டுமே பயன்படுத்த முடியும். உச்சி முதல் உள்ளங்கால் வரையும் இதை பயன்படுத்தலாம்.

முகத்துக்கு பயன்படுத்தும் போது கழுத்துக்கும் சேர்த்து பயன்படுத்துங்கள். இல்லையெனில் முகம் ஒரு நிறத்திலும் கழுத்து ஒரு நிறத்திலும் இருக்கும்.