தண்ணீர் தட்டுப்பாடா?: சென்னை உட்பட 6 நகரங்களுக்கு எச்சரிக்கை மணி

இந்தியா முழுவதும் தண்ணீர் நெருக்கடி என்பது நாளுக்கு நாள் தீவிரமடைந்து வருகிறது. அதிகரித்து வரும் மக்கள் தொகை, குறைந்து வரும் நீர் ஆதாரங்கள், திட்டமிடப்படாத நகரமயமாக்கல் போன்றவை இதற்கு முக்கிய காரணிகளாக விளங்குகின்றன. இந்த நிலையில், இந்தியாவிலேயே நீர் தட்டுப்பாடு ஏற்படக்கூடிய ஆபத்துள்ள ஆறு நகரங்களைப் பற்றிய ஒரு பார்வை.

நீர் ஆதாரம் குறையும் மும்பை

மும்பையின் ஏழு ஏரிகள் படிப்படியாக வற்றத் தொடங்கியுள்ளதோடு, நகருக்கு மாற்று நீர் ஆதாரங்கள் ஏதுமில்லை என்பதால் மும்பை மாநகராட்சி அடிக்கடி நீர் விநியோகத்தில் கட்டுப்பாடுகளை விதிக்க வேண்டிய நிலை ஏற்பட்டுள்ளது.

நிலத்தடி நீர் சுரண்டலில் ஜெய்ப்பூர்

ஜெய்ப்பூர் நகரின் மக்கள் தொகை அதிகரிப்பு, தொழில்மயமாக்கல் போன்றவை தண்ணீர் தேவையை பன்மடங்காக உயர்த்தியுள்ளன. நிலத்தடி நீரை இந்நகரம் பெரிதும் நம்பியுள்ள நிலையில் அதுவும் வேகமாக சுரண்டப்படுவதால் அங்கு தண்ணீர் பற்றாக்குறை தீவிரமடைந்து வருகிறது.

விவசாயத்தால் பட்டிண்டா பாதிப்பு

விவசாயத்திற்கு அதிகமான அளவில் நிலத்தடி நீர் பயன்படுத்தப்படுவதால் பட்டிண்டா நகரமும் தண்ணீர் தட்டுப்பாட்டை சந்தித்து வருகிறது. மேலும், அங்குள்ள நிலத்தடி நீர் இருப்புக்கள் சீராக குறைந்து வருவதும் இதற்கு முக்கியக் காரணம்.

லக்னோவுக்கு சூழலியலாளர்கள் எச்சரிக்கை

லக்னோவிலும் தண்ணீர் தட்டுப்பாடு உருவாகும் அபாயம் நாளுக்கு நாள் அதிகரித்து வருவதாக சூழலியலாளர்கள் தொடர்ந்து எச்சரிக்கை விடுத்து வருகின்றனர். அங்கு நிலத்தடி நீர் அதிகளவில் உறிஞ்சப்படுவதாலும், அதை மீண்டும் ரீசார்ஜ் செய்யும் வழிமுறைகள் குறைவாக இருப்பதாலும் இந்தப் பிரச்சனை உருவாகியுள்ளது.

சென்னைக்கும் மீண்டும் ஒரு நெருக்கடி?

சுமார் 1,400 மிமீ மழைப்பொழிவைப் பெறும் சென்னை, பருவநிலை மாற்றங்கள் மற்றும் தொழில்வளர்ச்சி காரணமாக கடந்த 2019 ஆம் ஆண்டில் தீவிர தண்ணீர் தட்டுப்பாட்டைச் சந்தித்தது. அப்போது வெளி மாநிலங்களில் இருந்து தினமும் 10 லட்சம் லிட்டர் நீர் ரயில்கள் மூலம் கொண்டுவரும் அவலமும் ஏற்பட்டது.

யமுனை மாசுபாட்டால் டெல்லியில் நிலத்தடி நீர் குறைவு

டெல்லியின் பெரும்பாலான பகுதிகளில் கொடுமையான நீர் பற்றாக்குறை அடிக்கடி ஏற்படுகிறது. யமுனை நதி அதிக அசுத்தமடைந்து காணப்படுவதும், நிலத்தடி நீர்மட்டம் வெகுவாக குறைந்ததும் டெல்லியின் தண்ணீர் தட்டுப்பாட்டிற்கு இரண்டு முக்கிய காரணங்கள்.

காலநிலை மாற்றம், திட்டமிடப்படாத நகரமயமாக்கல் மற்றும் தண்ணீர் விரயம் போன்றவற்றால் இந்நிலை நாளுக்கு நாள் மோசமாகி வருகிறது. மாற்று நீர் ஆதாரங்களை உருவாக்குவது, மழைநீர் சேமிப்பை தீவிரப்படுத்துவது, பொதுமக்களின் ஒத்துழைப்பு - இவை அனைத்துமே தண்ணீர் தட்டுப்பாட்டை ஒருவாறு சமாளிக்க உதவும்.

நீர் தட்டுப்பாட்டை சமாளிக்க சில வழிமுறைகள்:

• மழைநீர் சேகரிப்பு: மழைநீர் சேகரிப்பு அமைப்புகளை அமைப்பதன் மூலம் மழைநீரை சேமித்து பயன்படுத்தலாம்.
• கழிவுநீர் சுத்திகரிப்பு: கழிவுநீரை சுத்திகரித்து மறுசுழற்சி செய்து, தோட்டப்பாசனம் மற்றும் பிற தேவைகளுக்கு பயன்படுத்தலாம்.
• நீர்வள மேலாண்மை: தண்ணீரை சிக்கனமாக பயன்படுத்துவதற்கும், விரயத்தை தடுப்பதற்கும் அரசாங்கம், தொழில்துறைகள் மற்றும் பொதுமக்கள் ஒன்றிணைந்து செயல்பட வேண்டும்.
• நவீன நீர்ப்பாசன முறைகள்: சொட்டு நீர்ப்பாசனம் போன்ற நவீன நீர்ப்பாசன முறைகளை பயன்படுத்துவதன் மூலம் தண்ணீரை சிக்கனமாக பயன்படுத்தலாம்.
• பொதுமக்களுக்கு விழிப்புணர்வு: தண்ணீர் தட்டுப்பாடின் தீவிரத்தை பற்றி பொதுமக்களுக்கு விழிப்புணர்வு ஏற்படுத்த வேண்டும்.

தண்ணீர் ஒரு விலைமதிப்பற்ற இயற்கை வளம். அதை பாதுகாப்பது நம் அனைவரின் கடமை.