இந்த வாரம் வெயில் சுட்டெரிக்கும்: வானிலை ஆய்வு மையம் எச்சரிக்கை

இந்திய வானிலை ஆய்வு மையம் (IMD) வெளியிட்டுள்ள அறிக்கையில், டெல்லி, ஹரியானா, பஞ்சாப் உள்ளிட்ட வடமேற்கு இந்தியாவில் வரும் வாரம் முதல் பகல் நேர வெப்பநிலை இரண்டு முதல் நான்கு டிகிரி செல்சியஸ் வரை உயரக்கூடும் எனத் தெரிவிக்கப்பட்டுள்ளது.

"அடுத்த நான்கு முதல் ஐந்து நாட்களுக்கு அதிகபட்ச வெப்பநிலை படிப்படியாக இரண்டு முதல் நான்கு டிகிரி செல்சியஸ் வரை உயரக்கூடும்," என்று ஞாயிற்றுக்கிழமை வெளியிடப்பட்ட இந்திய வானிலை ஆய்வு மையத்தின் அறிக்கையில் கூறப்பட்டுள்ளது.

வானிலை ஆய்வு மையத்தின் தகவலின்படி, ஜம்மு-காஷ்மீர்-லடாக்-கில்கிட்-பால்டிஸ்தான்-முசாஃபராபாத், இமாச்சலப் பிரதேசம், பஞ்சாப், வடகிழக்கு மற்றும் தெற்கு தீபகற்ப இந்தியாவில் பகல் நேர வெப்பநிலை இயல்பை விட அதிகமாக உள்ளது. மற்ற இடங்களில் இது இயல்பான நிலையிலேயே உள்ளது. ஆனால் இனி வரும் நாட்களில் வெப்பநிலை அதிகரிக்கும் எனக் கூறப்படுகிறது.

"கேரளா, மஹே பகுதிகளில் அடுத்த நான்கு நாட்களுக்கும், ராயலசீமாவில் அடுத்த மூன்று நாட்களுக்கும், தமிழ்நாடு, புதுச்சேரி, காரைக்கால் பகுதிகளில் அடுத்த இரண்டு நாட்களுக்கும் வெப்பமான மற்றும் ஈரப்பதமான வானிலை நிலவக்கூடும்" என்று வானிலை ஆய்வு நிறுவனம் ஞாயிற்றுக்கிழமை தனது அறிக்கையில் தெரிவித்துள்ளது.

"பின்னடைவு மேற்குத் தொந்தரவுகள் காரணமாக குளிர்ந்த காற்றின் ஊடுருவலால் வடமேற்கில் வெப்பநிலை பெரும்பாலும் இயல்பை விடக் குறைவாகவே உள்ளது. ஆனால் தற்போது எந்தவொரு பெரிய அளவிலான மேற்குத் தொந்தரவும் எதிர்பார்க்கப்படவில்லை. நேரடி சூரிய வெளிச்சம் காரணமாக, வெப்பநிலை உயரத் தொடங்கும்," என்று இந்திய வானிலை ஆய்வு மையத்தின் தலைமை இயக்குநர் மிருத்யுஞ்சய் மகாபாத்ரா தெரிவித்தார்.

“வடமேற்கு இந்தியாவில் இப்போது எந்த முக்கிய வானிலை நிகழ்வும் எதிர்பார்க்கப்படவில்லை. இதனால், பகல் மற்றும் இரவு நேர வெப்பநிலை உயரும். டெல்லியில் அடுத்த வாரம் அதிகபட்ச வெப்பநிலை 33 டிகிரி செல்சியஸைத் தொட்டு மேலும் உயரும்" என ஸ்கைமெட் வெதரின் துணைத் தலைவர் (காலநிலை மற்றும் வானிலை) மகேஷ் பலாவத் தெரிவித்தார்.

இருப்பினும், இந்தியாவின் மத்திய மற்றும் கிழக்குப் பகுதிகளில் இடியுடன் கூடிய மழை மற்றும் ஆலங்கட்டி மழை பெய்யக்கூடும் என்று இந்திய வானிலை ஆய்வு மையம் தெரிவித்துள்ளது. மேற்கு விதர்ப்பாவிலிருந்து வடக்கு கேரளா வரை தாழ்வான அடிவளிவு நிலைகளில் புழக்கம் இருந்து வருகிறது.

“மேற்கு மத்திய மற்றும் அதையொட்டிய வடமேற்கு வங்கக் கடலில் குறைந்த அடிவளிவு நிலைகளில் எதிர் சூறாவளி நிலவுகிறது. இவற்றின் தாக்கத்தால், மார்ச் 19ஆம் தேதி ஆலங்கட்டி மழை மற்றும் சூறாவளி காற்று (மணிக்கு 50-60 கிமீ வேகம்) ஆகியவற்றுடன் மேற்கு வங்காளப் பகுதியில் விரிவான லேசானது முதல் மிதமான மழை பெய்யக்கூடும்" என்று இந்திய வானிலை ஆய்வு மையம் சேர்த்துள்ளது.

மேலும், ஜார்கண்ட், ஒடிசா, விதர்ப்பா, சத்தீஸ்கர் மற்றும் கிழக்கு மத்தியப் பிரதேசத்தில் மார்ச் 17 முதல் 20 வரையிலும், பீகாரில் மார்ச் 19 முதல் 21 வரையிலும் இடியுடன் கூடிய மழை மற்றும் சூறாவளி காற்றுடன் பரவலான லேசானது முதல் மிதமான மழை பெய்யக்கூடும். விதர்ப்பா, கிழக்கு மத்தியப் பிரதேசம் மற்றும் சத்தீஸ்கர் பகுதிகளில் மார்ச் 17 முதல் 19 வரையிலும், ஜார்கண்ட் மற்றும் ஒடிசாவில் மார்ச் 19ம் தேதியும் ஆலங்கட்டி மழைக்கு வாய்ப்பு உள்ளது என்று இந்திய வானிலை ஆய்வு மையம் தெரிவித்துள்ளது.