சீன புதிய வரைபடம் குறித்து பிரதமர் பதிலளிக்க வேண்டும்: ராகுல்காந்தி

புதிதாக வெளியிடப்பட்ட வரைபடத்தில் அருணாச்சல பிரதேசம் மற்றும் அக்சாய் சின் என்று சீனா கூறியதை அடுத்து, லடாக்கில் ஒரு அங்குல நிலம் கூட இழக்கப்படவில்லை என்று பிரதமர் மோடி கூறியது பொய் என்று காங்கிரஸ் எம்பி ராகுல் காந்தி புதன்கிழமை தெரிவித்தார்.

இதுபோன்ற அபத்தமான கூற்றுகளை கூறுவது சீனாவின் பழைய பழக்கம் என்று வெளியுறவுத்துறை அமைச்சர் ஜெய்சங்கர் கூறி, இந்தியா தனது எதிர்ப்பை பதிவு செய்தது.

சீனா தனது எல்லையையொட்டிய இந்தியாவின் பல பகுதிகளை தனக்குச் சொந்தமானதாக உரிமை கொண்டாடிவருகிறது. குறிப்பாக, இந்தியாவின் வடகிழக்கு மாநிலங்களுள் ஒன்றான அருணாசலபிரதேசத்தை தங்கள் நாட்டின் தெற்கு திபெத் என்று சீனா கூறுகிறது. அதுதொடர்பான அத்துமீறல் செயல்களிலும் அவ்வப்போது ஈடுபட்டுவருகிறது. கடந்த ஏப்ரல் மாதம், அருணாசலபிரதேசத்தின் 11 இடங்களுக்கு புதிய பெயர்களை சீனா சூட்டியது. அதை இந்தியா முற்றிலுமாக நிராகரித்துவிட்டது.

சீனா குறித்த புதுடெல்லியின் நிலைப்பாடு குறித்து காங்கிரஸ் கேள்வி எழுப்பிய நிலையில், மைசூருவில் க்ருஹ லட்சுமி திட்டத்தை தொடங்கும் நிகழ்ச்சியில் கலந்து கொள்ள கர்நாடகாவுக்கு வருகை தந்த ராகுல் காந்தி, லடாக்கில், ஒரு அங்குல நிலம் கூட இழக்கப்படவில்லை என்று பிரதமர் கூறியது பொய் என்று நான் பல ஆண்டுகளாக கூறி வருகிறேன். சீனா அத்துமீறி நடந்து கொண்டது முழு லடாக்கிற்கும் தெரியும். இந்த வரைபட சிக்கல் மிகவும் தீவிரமானது. நிலத்தை அபகரித்துவிட்டனர். இது குறித்து பிரதமர் ஏதாவது கூற வேண்டும் என்று ராகுல் கூறினார்.

1962 போரில் சீனாவால் ஆக்கிரமிக்கப்பட்ட அக்சாய் சின் பகுதியுடன் இந்தியாவின் அருணாச்சலப் பிரதேச மாநிலத்தையும் அதன் பிரதேசத்தின் ஒரு பகுதியாகக் காட்டிய 2023 ஆம் ஆண்டுக்கான "நிலையான வரைபடத்தின்" பதிப்பை திங்களன்று சீனா அதிகாரப்பூர்வமாக வெளியிட்டது. இந்த வரைபடம் தைவான் மற்றும் சர்ச்சைக்குரிய தென் சீனா பகுதிகளுக்கும் உரிமை கோரியது.

தென்னாப்பிரிக்காவில் நடந்த 15வது பிரிக்ஸ் உச்சிமாநாட்டின் ஓரத்தில் மோடி மற்றும் சீன அதிபர் ஜி ஜின்பிங் இடையேயான சமீபத்திய சந்திப்புக்கு சில நாட்களுக்குப் பிறகு வரைபடத்தின் வெளியீடு வந்தது, அங்கு இரு தலைவர்களும் "உண்மையான எல்லைக்கோடு பகுதியில் விரைவான விலகல் மற்றும் விரிவாக்க முயற்சிகளை தீவிரப்படுத்த" ஒப்புக்கொண்டனர். சீனாவின் ஜி ஜின்பிங் செப்டம்பர் 8-10 வரை தேசிய தலைநகரில் இந்தியா நடத்தும் ஜி 20 உச்சி மாநாட்டில் கலந்து கொள்கிறார்.

சட்டப்பிரிவு 370 ரத்து செய்யப்பட்ட பிறகு முதன்முறையாக சமீபத்தில் லடாக் சென்ற காந்தி, “சீனா மக்களின் நிலத்தை அபகரித்துவிட்டது, அவர்கள் கால்நடைகளை மேய்க்க அனுமதிக்கவில்லை” என்று கூறினார். கிழக்கு லடாக்கில் உள்ள பாங்காங் ஏரியை பார்வையிட்ட ராகுல், “இங்கே, சீனாவால் தங்கள் நிலம் பறிக்கப்படுவது குறித்து மக்கள் கவலையடைந்துள்ளனர். மேய்ச்சல் நிலங்கள் பறிக்கப்பட்டதால் மக்கள் பாதிக்கப்பட்டுள்ளனர்” என்றார்.

சீன ஊடுருவல் இல்லை, நிலம் பறிக்கப்படவில்லை என்றமத்திய அரசின் கூற்றுக்கு பதிளித்த ராகுல், “சீனப் படைகள் நுழைந்து தங்கள் மேய்ச்சல் நிலத்தை ஆக்கிரமித்ததாகவும் இப்போது அங்கு செல்ல முடியாது என்றும் இங்குள்ள மக்கள் கூறுகிறார்கள். ஒரு அங்குல நிலம் கூட பறிக்கப்படவில்லை என்று பிரதமர் கூறுகிறார், அது சரியல்ல. இங்கே யாரிடமாவது கேளுங்கள், அவர்கள் உங்களுக்குச் சொல்வார்கள் என்று கூறினார்