விராட் கோலி அறையின் வீடியோ கசிவு: ஹோட்டல் விளக்கம்

இந்திய நட்சத்திர பேட்ஸ்மேனும், முன்னாள் கேப்டனுமான விராட் கோலி நடந்து வரும் டி20 உலகக் கோப்பைக்காக பெர்த்தில் தங்கியிருந்தபோது அனுபவித்த "பயங்கரமான" அனுபவத்தை விவரித்தார். அவர் இல்லாத நேரத்தில், ஒருவர் அவரது அறைக்குள் நுழைந்து, கோலியின் அனைத்து உடைகள் மற்றும் அலமாரிகளை வீடியோ எடுத்து வெளியிட்டுள்ளார்.

இது குறித்து கோலி இன்ஸ்டாகிராமில் ஒரு நீண்ட பதிவை வெளியிட்டார், ஒருவரின் தனியுரிமைக்கு மரியாதை இருக்க வேண்டும் என்றும், யாரையும் பொழுதுபோக்கிற்கான "பொருளாக" கருதக்கூடாது என்றும் கூறினார்.

இந்த வீடியோ விவகாரம் குறித்து பெர்த்தில் உள்ள ஹோட்டல் கிரவுன் டவர்ஸ் வெளியிட்டுள்ள அறிக்கையில், இந்த சம்பவத்தில் தொடர்புடைய அனைத்து நபர்களும் நிறுத்தப்பட்டுள்ளனர் என்றும் அவர்கள் இந்திய ஆண்கள் கிரிக்கெட் அணி மற்றும் ஐசிசியுடன் இணைந்து பணியாற்றி வருவதாகவும் கூறியுள்ளனர்.

"சம்பந்தப்பட்ட விருந்தினரிடம் நாங்கள் நிபந்தனையின்றி மன்னிப்பு கேட்டுக்கொள்கிறோம், மேலும் இது போன்ற சம்பவம் மீண்டும் நிகழாமல் இருப்பதை உறுதிசெய்ய தேவையான நடவடிக்கைகளை தொடர்ந்து எடுப்போம். சிக்கலை சரிசெய்ய கிரவுன் உடனடி நடவடிக்கைகளை எடுத்துள்ளது. சம்பந்தப்பட்ட நபர்கள் நிறுத்தப்பட்டு, ஹோட்டலில் இருந்து நீக்கப்பட்டுள்ளனர், மேலும் அசல் வீடியோ சமூக ஊடக தளத்திலிருந்து விரைவாக அகற்றப்பட்டது," என்று கூறியுள்ளது .

"கிரவுன் ஹோட்டல் மூன்றாம் தரப்பு ஒப்பந்தக்காரரிடம் விசாரணை நடத்தி வருகிறது, மேலும் இதுபோன்ற சம்பவம் மீண்டும் நடக்காமல் இருக்க தேவையான கூடுதல் நடவடிக்கைகளை எடுப்போம். நாங்கள் இந்திய கிரிக்கெட் அணி மற்றும் சர்வதேச கிரிக்கெட் கவுன்சிலிடம் எங்கள் மன்னிப்பை கோருகிறோம். அவர்களுடன் தொடர்ந்து பணியாற்றுவோம்," என்று அது மேலும் கூறியது.

கோலி தனது இன்ஸ்டாகிராம் பதிவில் கூறியிருப்பதாவது: "ரசிகர்கள் தங்களுக்குப் பிடித்த வீரர்களைப் பார்த்து மிகவும் மகிழ்ச்சியடைகிறார்கள், அவர்களைச் சந்திப்பதில் உற்சாகம் அடைகிறார்கள் என்பதை நான் புரிந்துகொள்கிறேன், அதை நான் எப்போதும் பாராட்டுகிறேன். ஆனால் இங்குள்ள இந்த வீடியோ பயங்கரமானது. இது எனது தனியுரிமை பற்றிய கவலையை ஏற்படுத்தியுள்ளது . எனது சொந்த ஹோட்டல் அறையில் தனியுரிமை இருக்க முடியாவிட்டால், தனிப்பட்ட இடத்தை நான் எங்கே எதிர்பார்க்க முடியும்? இந்த வகையான வெறித்தனம் மற்றும் தனியுரிமை மீதான முழுமையான படையெடுப்பு எனக்கு பிடிக்கவில்லை. தயவுசெய்து மக்களின் தனியுரிமையை மதிக்கவும், அவர்களை பொழுதுபோக்கிற்கான ஒரு பண்டம் போல் கருத வேண்டாம். என்று அவர் மேலும் கூறினார்.

தற்போது நடைபெற்று வரும் டி20 உலகக் கோப்பையில், கோஹ்லி 82, 62 மற்றும் 12 ரன்களை பதிவு செய்து சிறப்பான ஆட்டத்தை வெளிப்படுத்தி வருகிறார். இப்போட்டியில் அவரது மொத்த எண்ணிக்கை இப்போது 156 ஆக உள்ளது.

160 ரன்களை துரத்தியதில் கோஹ்லி ஆட்டமிழக்காமல் 82 ரன்களை குவித்ததால், பாகிஸ்தானுக்கு எதிராக கோலியின் ஆட்டம் உண்மையிலேயே சிறப்பு வாய்ந்தது. இந்த ஆண்டின் தொடக்கத்தில், கோலி தனது முதல் டி20 சதத்தை பதிவு செய்தார், அது ஆசிய கோப்பையில் ஆப்கானிஸ்தானுக்கு எதிராக வந்தது.