ஆப்பிள் சாதனங்களை வைத்துள்ளீர்களா.. மத்திய அரசு எச்சரிக்கை

ஆப்பிள் சாதனங்களான மொபைல், லேப்டாப் மற்றும் டேப்லெட் உள்ளிட்ட பொருட்களை வைத்துள்ள அனைவருக்கும் மத்திய அரசின் சைபர் பாதுகாப்பு அமைப்பு சிஇஆர்டி பாதுகாப்பு எச்சரிக்கை விடுத்துள்ளது.

உலகமே ஆப்பிள் மொபைல், லேப்டாப் மற்றும் டேப்லெட் சாதனங்களின் அழகிலும், அவற்றின் பாதுகாப்பு அம்சங்களிலும் மயங்கிக் கிடக்கிறது. ஆனால், கடந்த சில நாட்களாக இந்த நம்பிக்கைக்கு பெரும் சவால் எழுந்துள்ளது. இந்திய அரசின் சைபர் பாதுகாப்பு அமைப்பான சிஇஆர்டி இன் (CERT-in), ஆப்பிள் சாதனங்களைப் பயன்படுத்தும் அனைவருக்கும் ஒரு 'உயர் பாதுகாப்பு எச்சரிக்கை'யை விடுத்துள்ளது. இந்த எச்சரிக்கையின் பின்னணியும் , அதிலிருந்து நம்மை பாதுகாப்பது எப்படி என்பதையும் இந்தக்கட்டுரையில் காண்போம்.

ஆப்பிளின் பாதுகாப்பு வளையத்தில் ஓட்டை

ஆப்பிளின் இயங்குதளங்களில் (iOS, iPadOS) உள்ள WebRTC மற்றும் CoreMedia என்ற தொழில்நுட்பக் கூறுகளில் ஒரு குறைபாடு கண்டறியப்பட்டுள்ளது. இந்தக் குறைபாட்டின் மூலம் ஹேக்கர்கள் இலக்கு வைக்கப்படும் சாதனங்களில் அங்கீகரிக்கப்படாத குறியீடுகளைச் செயல்படுத்த முடியும் ("remote code execution"). ஒரு சாதனத்தை ஹேக்கர் முழுவதுமாக கட்டுப்படுத்திவிட்டால், அந்த சாதனத்திலுள்ள தகவல்களைத் திருடுவது மட்டுமின்றி, ஒட்டுக்கேட்பது உட்பட பல்வேறு சட்ட விரோத செயல்களிலும் ஈடுபட முடியும்.

யாருக்கு ஆபத்து?

• CERT-In இன் கூற்றுப்படி, பின்வரும் ஆப்பிள் சாதனங்களைப் பயன்படுத்துபவர்கள் ஆபத்தில் உள்ளனர்:
  
• iOS மற்றும் iPadOS 17.4.1 பதிப்புகளுக்கு முந்தைய பதிப்புகளை இயக்கும் ஐபோன்கள் மற்றும் ஐபேடுகள்
  
• macOS Ventura 13.6.6 க்கு முந்தைய பதிப்புகளை இயக்கும் மேக்புக் மடிக்கணினிகள்
• உங்கள் ஆப்பிள் சாதனத்தின் இயங்குதள பதிப்பை Settings -> General -> Software Update பகுதியில் சரிபார்க்கலாம்.

குறிவைக்கப்படுவது யார்?

இந்திய அரசு, இந்தக் குறைபாட்டைப் பயன்படுத்தி ஹேக்கர்கள், தனிநபர்களை மட்டுமல்லாது, பெரிய நிறுவனங்கள், ஏன் அரசாங்க அமைப்புகளைக்கூட குறி வைக்கலாம் என்று எச்சரிக்கிறது. உங்களுடைய கைபேசியிலுள்ள தகவல்கள் உலகத்தில் எவருக்கும் எந்தப் பயனுமில்லாமல் இருக்கலாம். ஆனால் உங்களைப் போல் ஆயிரக்கணக்கான நபர்களின் தகவல்களைத் திரட்டும்போது, அது ஒரு சக்திவாய்ந்த ஆயுதமாக மாறிவிடுகிறது.

இதிலிருந்து மீள்வது எப்படி?

இந்த ஆபத்திலிருந்து தற்காத்துக் கொள்ள ஒரே வழி உங்கள் ஆப்பிள் சாதனங்களின் மென்பொருளை (Software Update) உடனடியாக புதுப்பித்துக் கொள்வதுதான். ஆப்பிள் நிறுவனம் ஏற்கனவே இந்தக் குறைபாட்டை அடைக்கும் பாதுகாப்பு புதுப்பிப்புகளை (security patch) வெளியிட்டுள்ளது. எனவே தாமதிக்காமல் உங்கள் சாதனங்களைப் புதுப்பித்துக்கொள்ளுங்கள்.

எச்சரிக்கையே சிறந்த தற்காப்பு

நுகர்வோர் தொழில்நுட்பத்தில் பாதுகாப்பில் முன்னேற்றங்கள் ஏற்பட்ட போதிலும், ஹேக்கர்களும் தங்கள் தாக்குதல் உத்திகளைச் செழுமைப்படுத்தி வருகின்றனர். இந்த சூழலில், பின்வரும் எச்சரிக்கைகளை மனதில் கொள்வது அவசியம்:

அறிமுகமில்லாத இணைப்புகள்: தெரியாத நபர்கள் மின்னஞ்சல், குறுஞ்செய்திகள் மூலம் அனுப்பும் இணைப்புகளை சொடுக்க வேண்டாம்.

சந்தேகத்திற்கிடமான செயலிகள்: சரியான ஆதாரமில்லாத 'மூன்றாம் தரப்பு' செயலிகளை பதிவிறக்கம் செய்ய வேண்டாம்.

தொடர்ந்து புதுப்பித்தல்: உங்கள் சாதனங்களுக்கான மென்பொருள் புதுப்பிப்புகளை, நிறுவனங்கள் அவற்றை வெளியிடும்போதே உடனடியாக நிறுவிக் கொள்ளுங்கள்.

தொழில்நுட்பம் நமக்கு வசதிகளை வாரி வழங்குகிறது, ஆனால் அதனுடனான அச்சுறுத்தல்களையும் உணர்ந்திருப்பது அவசியம். இந்திய அரசின் சைபர் பாதுகாப்பு எச்சரிக்கையை அலட்சியப்படுத்தாமல், உங்கள் ஆப்பிள் சாதனங்களைப் பாதுகாத்துக் கொள்வது உங்கள் கைகளில் உள்ளது.