குன்னூர் ஹெலிகாப்டர் விபத்தில் 7பேர் பலி: ராணுவ தலைமைத்தளபதி கதிஎன்ன?

கோவை மாவட்டம் சூலூர் விமானப்படை தளத்தில் இருந்து, இன்று காலை ராணுவ ஹெலிகாப்டர் ஒன்று, நீலகிரி மாவட்டம், குன்னூர் அருகே வெலிங்டன் பகுதிக்கு புறப்பட்டுள்ளது. இதில், ராணுவ முப்படை தலைமைத் தளபதி பிபின் ராவத், அவரது மனைவி மது லிக்கா, மகள் உள்பட, 14, பேர் பயணித்ததாக தெரிகிறது.

ஹெலிகாப்டர், குன்னூர் அருகே காட்டேரி மலைப்பகுதியில், பகல் 12.20. மணியளவில் சென்று கொண்டிருந்த போது, எதிர்பாராதவிதமாக விபத்துக்குள்ளானது. பலத்த சத்தத்துடன், தீப்பிழம்பாக தரையில் விழுந்து ராணுவ ஹெலிகாப்டர் நொறுங்கியது. இதில் பயணித்தவர்கள், தீயில் கருகினர்.

சம்பவப்பகுதிக்கு தேவையான மருத்துவ உதவிகள் செய்யப்பட்டு வருவதாக, சுகாதாரத்துறை செயலாளர் ராதாகிருஷ்ணன் தெரிவித்துள்ளார். தலைமைச் செயலாளர் இறையன்பு உடன் ஆலோசனை நடத்திய முதல்வர் மு.க. ஸ்டாலின், மீட்பு நடவடிக்கைகளை துரித கதியில் மேற்கொள்ள உத்தரவிட்டுள்ளார்.

இதனிடையே, முப்படை தலைமைத்தளபதி சென்ற ஹெலிகாப்டர் விபத்துக்குள்ளானது குறித்து அதிர்ச்சியடைந்துள்ள பிரதமர் மோடி, பாதுகாப்புத்துறை அமைச்சர் ராஜ்நாத் சிங் உள்ளிட்டோர், இது தொடர்பாக டெல்லியில் அவசர ஆலோசனையில் ஈடுபட்டுள்ளனர்.

ராணுவ முப்படைகளின் தலைமைத் தளபதி சென்றதாக கூறப்படும் ஹெலிகாப்டர் விபத்துக்குள்ளானதில், சதி ஏதேனும் உள்ளதா, அல்லது வானிலை, தொழில் நுட்பப்பிரச்சனை போன்ற காரணங்களால் விபத்து நேர்ந்துள்ளதா என்று விசாரணை நடைபெற்று வருகிறது. இச்சம்பவம், இந்திய அளவில் பெரும் பரபரப்பை ஏற்படுத்தி உள்ளது.