5 நூற்றாண்டுகளின் வாக்குறுதி இன்று நிறைவேற்றம்: அமித்ஷா

அயோத்தியில் உள்ள ராமர் கோயிலில் கும்பாபிஷேகம் நிறைவடைந்ததன் மூலம், 5 நூற்றாண்டுகளின் காத்திருப்பு மற்றும் வாக்குறுதி இன்று நிறைவேற்றப்பட்டுள்ளது என்று மத்திய உள்துறை அமைச்சரும் கூட்டுறவுத் துறை அமைச்சருமான அமித் ஷா தெரிவித்துள்ளார்.

இதுகுறித்து எக்ஸ் தளத்தில் வெளியிட்டுள்ள அவரது பதிவில், 5 நூற்றாண்டுகளுக்கான காத்திருப்பு மற்றும் வாக்குறுதி இன்று நிறைவேற்றப்பட்டுள்ளது என்று திரு அமித் ஷா கூறியுள்ளார். பிரபு ஸ்ரீராமரின் கோடிக்கணக்கான பக்தர்களுக்கு இன்று மறக்க முடியாத நாள். இன்று, நமது குழந்தை ராமர் அவரது பிரம்மாண்டமான கோவிலில் காட்சியளிக்கும்போது, பிரபு ஸ்ரீராமரின் எண்ணற்ற பக்தர்களைப் போலவே, நானும் உணர்ச்சியில் மூழ்கியிருக்கிறேன். இந்த உணர்வை வார்த்தைகளால் விவரிக்க முடியாது.

நமது தலைமுறையினர் பலர் இந்தத் தருணத்திற்காகத் தியாகம் செய்துள்ளனர் என்றும், ஸ்ரீ ராமஜன்மபூமியில் மீண்டும் கோயில் கட்டுவதற்கான உறுதியையும் நம்பிக்கையையும் எந்த அச்சமோ, பயங்கரமோ அசைத்துவிட முடியாது. இன்று, பிரதமர் நரேந்திர மோடி தலைமையின் கீழ் லட்சியம் நிறைவேற்றப்பட்டுள்ளது என்றும், இதற்காக அவருக்கு எனது இதயத்தின் அடிப்பகுதியில் இருந்து நன்றியைத் தெரிவித்துக் கொள்கிறேன் என்றும் அவர் தெரிவித்துள்ளார்.

மேலும் இந்தப் புனிதமான நாளில், பல நூற்றாண்டுகளாக இந்தப் போராட்டத்தையும் உறுதியையும் உயிர்ப்புடன் வைத்திருந்த, பல அவமானங்களையும் சித்திரவதைகளையும் தாங்கிக்கொண்டு, ஆனால் மதத்தின் பாதையை விட்டு விலகாத, அனைத்துப் பெரிய மனிதர்களுக்கும் எனது மரியாதையைத் தெரிவித்துக் கொள்கிறேன் என்றும் அவர் கூறினார்.

விஸ்வ ஹிந்து பரிஷத், ஆயிரக்கணக்கான துறவிகள் மற்றும் எண்ணற்ற முகம் தெரிந்தவர்கள் மற்றும் தெரியாதவர்களின் போராட்டம் இன்று இனிமையான, வெற்றிகரமான பலனை அளித்துள்ளது என்று அவர் மேலும் கூறினார். இந்த பிரம்மாண்டமான ஸ்ரீ ராம ஜன்மபூமி கோயில் பல யுகங்களாக நித்திய மற்றும் அழியாத சனாதன கலாச்சாரத்தின் தனித்துவமான அடையாளமாக இருக்கும் என்றும் அமித்ஷா தெரிவித்துள்ளார்.