டிரைவரே இல்லாமல் ஜம்மு-பஞ்சாப் வரை 80 கி.மீ. சென்ற ரயிலால் பரபரப்பு

ஓட்டுநர்கள் ‘இடைவேளையில்’ இருக்க, ரயில் ஒன்று ஜம்முவிலிருந்து பஞ்சாப் வரை 80 கி.மீ தூரம் தானாகவே சென்றுள்ளது பரபரப்பை ஏற்படுத்தியுள்ளது.

ஹாலிவுட் திரில்லர் "அன்ஸ்டாப்பபிள்" (Unstoppable ) படத்தின் சாயலைப் போல, 53 பெட்டிகளைக் கொண்ட சரக்கு ரயில் ஒன்று ஓட்டுநர் இல்லாமல், ஜம்முவின் கதுவாவிலிருந்து பஞ்சாப்பின் ஹோஷியார்பூர் வரை 80 கி.மீ தூரத்தை 90 கி.மீ வேகத்தில் சீறிப்பாய்ந்தது. இயந்திரத்தை இயங்கும் நிலையில் விட்டுவிட்டு, ஓட்டுநர்கள் தேநீர் இடைவேளைக்குச் சென்றதால் இந்த சம்பவம் தொடங்கியதாக கூறப்படுகிறது.

ஆனால், பேரழிவைத் தடுக்க கடிகாரத்துடன் போராடிய 2010 ஆம் ஆண்டு படத்தின் நட்சத்திரங்களான டென்சல் வாஷிங்டன் மற்றும் கிறிஸ் பைன் போலன்றி, பஞ்சாபில் உள்ள தண்டவாளங்களின் செங்குத்தான சரிவு, கற்குவியல்களுடன் வந்த அந்த ரயிலை இறுதியில் நிறுத்தி, பேரழிவைத் தடுத்தது.

இந்த சம்பவத்திற்காக, இரண்டு ஓட்டுனர்கள் உட்பட ஆறு ரயில்வே அதிகாரிகள் பணியிடை நீக்கம் செய்யப்பட்டனர். அப்போது, அந்த ரயிலின் பரபரப்பான பயணத்தின் காணொளிகள் இணையத்தில் வைரலாகி விட்டன. சில செய்திகளில், காவலர் பெட்டியும் காணாமல் போனதாகக் கூறப்படுகிறது.

"டீசல் இன்ஜின் கொண்ட இந்த சரக்கு ரயில், கதுவா நிலையத்தில் அதன் ஓட்டுநர்கள் தேநீர் இடைவேளைக்காக நிறுத்தி வைக்கும் போது, எந்திரத்தை அணைக்காமல் விட்டுவிட்டதால் சரிவில் கீழ்நோக்கி நகரத் தொடங்கியது. ஆரம்பத்தில் ரயிலை நிறுத்த முயற்சிகள் பலனளிக்கவில்லை. சுமார் 80 கிமீ தூரம் பயணித்த அந்த ரயில், உஞ்சி பாசியில் (பஞ்சாப்) செங்குத்தான சரிவின் காரணமாக நின்றது," என்று அதிகாரி ஒருவர் தெரிவித்தார். ரயில் உச்சி பாசியில் வேகம் குறைந்ததும் அதிகாரி ஒருவர் ரயிலில் ஏறி அவசர பிரேக்குகளைப் பயன்படுத்தினார்.

ஃபெரோஸ்பூர் கோட்ட ரயில்வே மேலாளர் (DRM) சஞ்சய் சாஹு, ஜம்மு-ஜலந்தர் பகுதியில் உள்ள அனைத்து நிலையங்களையும் உடனடியாக ரயில்வே எச்சரித்தது என்றும், கீழ்நோக்கி வரும் அனைத்து ரயில்களையும் நிறுத்தியதாகவும், ஓட்டுநர் இல்லாத ரயிலை கடந்து செல்ல அனுமதிக்க அனைத்து கிராசிங்குகளையும் மூடியதாகவும் கூறினார். மேலே செல்லும் மின்சார கேபிள்களில் உள்ள மின்சாரமும் துண்டிக்கப்பட்டது. ஓடிக்கொண்டிருந்த ரயிலை பத்திரமாக செல்ல விட்டு, சேவை தண்டவாளங்கள் திறந்து வைக்கப்பட்டன.

அசம்பாவிதம் தவிர்க்கப்பட்டது. விசாரணைக்கு உத்தரவிட்ட DRM சாஹு, கதுவா நிலையத்தில் இருந்த ஆறு அதிகாரிகளை பணியிடை நீக்கம் செய்தார். ஓட்டுநர்களைத் தவிர, இதில் நிலைய கண்காணிப்பாளர், பாயிண்ட்ஸ்மேன் மற்றும் மற்றொரு அதிகாரி ஆகியோரும் அடங்குவர். சாஹு, உயிரிழப்பு அல்லது சேதம் எதுவும் இல்லை என்று வலியுறுத்தினார். மேலும் இந்த சம்பவம் காலை 7.25 மணி முதல் 9 மணி வரை நடந்ததாகவும் தெரிவித்தார். “விசாரணையில் சம்பவத்திற்கான காரணம் தெரியவரும். பணியிடை நீக்கம் செய்யப்பட்ட ஆறு அதிகாரிகளும் திங்கட்கிழமை முதல் விசாரணைக்கு உட்படுத்தப்படுவார்கள்” என்றார் சாஹு.

ஒரு ரயில் எந்த நிலையத்திலும் நிற்கும் போது, ​​அது கீழே உருளாமல் இருக்க அதன் சக்கரங்களின் கீழ் மர ஆப்புகள் வைக்கப்படுவதை அதிகாரிகள் சுட்டிக்காட்டினர்.