மாணவர்களுக்கு பூங்கொத்து, இனிப்பு கொடுத்து வரவேற்றார் முதலமைச்சர் மு.க.ஸ்டாலின்

தமிழகத்தில்19 மாதங்களுக்கு பிறகு இன்று 1-ம் வகுப்பு முதல் 8-ம் வகுப்பு வரை பள்ளிக்கூடங்கள் முழுமையாக திறக்கப்பட்டன. நீண்ட நாட்களுக்கு பிறகு மாணவ-மாணவிகள் பள்ளிக்கூடங்களுக்கு வருகை தந்ததால் அவர்களை உற்சாகப்படுத்தும் வகையில் முதலமைச்சர் மு.க.ஸ்டாலின் சென்னை கிண்டி மடுவங்கரையில் உள்ள மாநகராட்சி பள்ளிக்கூடத்துக்கு இன்று காலை நேரில் சென்றார்.

முதலமைச்சரை பள்ளிக்கூட வாசலில் தலைமை ஆசிரியர் மற்றும் ஆசிரியர்கள் வரவேற்றனர். பள்ளிக்கு வந்திருந்த மாணவ- மாணவிகளுக்கு முதலமைச்சர் மு.க.ஸ்டாலின் இனிப்பு, பூங்கொத்து கொடுத்து, வாழ்த்து தெரிவித்து உற்சாகமாக வரவேற்றார்.

முதலமைச்சர் மு.க.ஸ்டாலினை பார்த்து "வணக்கம், முதலமைச்சருக்கு எங்களது வணக்கம்" என்று மாணவ-மாணவிகள் இருகை கூப்பி வணங்கினார்கள். பதிலுக்கு மு.க.ஸ்டாலினும் மாணவ- மாணவிகளுக்கு வணக்கம் தெரிவித்தப்படியே வந்தார்.

"நீண்ட நாட்களுக்கு பிறகு பள்ளிக்கூடத்துக்கு நீங்கள் வருகை தந்துள்ளதால் உங்களை வரவேற்பதில் நான் மிகவும் மகிழ்ச்சி அடைகிறேன்" என்று மாணவ-மாணவிகளுடன் முதலமைச்சர் கலந்துரையாடினார்.

மாணவ-மாணவிகளும் முதலமைச்சரிடம் பேசினார்கள். அப்போது மாணவர்களுக்கு நோட்டு, புத்தகங்களையும் வழங்கினார். பள்ளிக்கூடத்தில் இருந்த அனைத்து வகுப்பறைக்கும் முதலமைச்சர் மு.க.ஸ்டாலின் சென்று பார்வையிட்டு மாணவர்களை உற்சாகப்படுத்தினார். பள்ளியில் சுமார் 10 நிமிடங்கள் மாணவ, மாணவிகளுடன் மகிழ்ச்சியாக பேசினார்.