தமிழகம் முழுவதும் தீபாவளிக்கு 2 நாளில் ரூ.464 கோடிக்கு மதுவிற்பனை

இந்த நிலையில் விபத்துகள் ஏற்பட காரணமாக இருப்பதால் நெடுஞ்சாலை ஓரங்களில் இருக்கும டாஸ்மாக் கடைகளை மூட கோர்ட்டு உத்தரவிட்டது. அந்த உத்தரவுப்படி நெடுஞ்சாலைகளில் இருந்த டாஸ்மாக் கடைகள் மூடப்பட்டு, நகருக்குள் புதிதாக திறக்கப்பட்டன. இதன்படி 2016-2021 காலகட்டத்தில் மட்டும் 1290 டாஸ்மாக் கடைகள் மூடப்பட்டன. தற்போது தமிழகம் முழுவதும் சுமார் 6,434 டாஸ்மாக் மதுக் கடைகள் இருப்பதாக கணக்கிடப்பட்டுள்ளன. இவைகள் மூலம் அரசுக்கு ஆண்டுதோறும் ரூ.36,752 கோடி வரை வருமானம் கிடைக்கிறது என்றும் கூறப்படுகிறது. தனியார் மது ஆலைகளில் இருந்து தமிழ்நாடு வாணிபக் கழகம், மதுவை கொள்முதல் செய்து, டாஸ்மாக் கடைகளில் விற்பனை செய்கிறது.

தமிழகத்தில் உள்ள டாஸ்மாக் கடைகளில் வழக்கமாக விடுமுறை நாட்களில் சுமார் ரூ.150 கோடிக்கு மது விற்பனை நடைபெறும். பண்டிகைக்காலங்களில் இதன் விற்பனை பல மடங்கு அதிகரிக்கும்.குறிப்பாக தீபாவளி, பொங்கல், புத்தாண்டு போன்ற காலங்களில் விற்பனை உயர்ந்து இருக்கும். பண்டிகை காலங்களில் மதுபானங்களின் விற்பனை ஒவ்வொரு ஆண்டும் கூடிக்கொண்டே இருக்கிறது. அந்த வகையில் கடந்தாண்டு தீபாவளியின் போது 2 நாட்களில் ரூ.431 கோடிக்கு டாஸ்மாக் கடைகளில் மதுபானம் விற்பனையானது. இதனை முறியடிக்கும் வகையில் இந்த தீபாவளி விற்பனையாக கடந்த 2 நாட்களில் மட்டும் ரூ.464.21 கோடி அளவுக்கு மதுபானங்கள் விற்பனையாகி உள்ளன.

சென்னையில் மட்டும் நேற்று -ரூ. 51.52 கோடிக்கும், திருச்சியில் -ரூ.50.66 கோடிக்கும், சேலத்தில் ரூ.52.36 கோடிக்கும், மதுரையில் ரூ.55.78 கோடிக்கும், கோவையில் - ரூ.48.47 கோடிக்கும் என மொத்தமாக ரூ. 258.79 கோடிக்கு மது விற்பனையானது.

நேற்று முன்தினம், சென்னையில் -ரூ.38.64 கோடிக்கும், திருச்சியில் மட்டும் -ரூ.41.36 கோடிக்கும், சேலத்தில்-ரூ.40.82 கோடிக்கும், மதுரையில் ரூ.45.26 கோடிக்கும், கோவையில் ரூ.39.34 கோடி என மொத்தமாக ரூ. 205.42 கோடிக்கு மது விற்பனை நடைபெற்றது என டாஸ்மாக் நிர்வாகம் அறிவித்துள்ளது. இதன் மூலம் கடந்த தீபாவளி விற்பனையை இந்த தீபாவளி முறியடித்துள்ளது. அதிகபட்சமாக மதுரை மண்டலத்தில் ரூ.101.04 கோடிக்கு மது விற்பனையாகி உள்ளது. தமிழகம் முழுவதும் கடந்த இரண்டு நாட்களில் 464.21கோடி ரூபாயுக்கு மதுவிற்பனை ஆகி உள்ளது.