ஏலசீட்டு நடத்தி பணம் மோசடி

கரூர் மாவட்டத்தில் ஏலச்சீட்டு மோசடி சம்பவம் ஒரு பரபரப்பை ஏற்படுத்தியுள்ளது. வடக்கு காந்தி கிராமம் இ.பி. காலனி பகுதியைச் சேர்ந்த செந்தில் குமாரின் மனைவி லட்சுமி (வயது 44) என்பவர், அதே பகுதியைச் சேர்ந்த சித்ரா (வயது 47) என்பவருக்கு ஆறு லட்ச ரூபாய் பணத்தை கடனாக வழங்கியிருந்தார். இதற்குப் பிறகும், சித்ரா நடத்தி வந்த ஏலச்சீட்டில் லட்சுமி மூலதனமாக 6,78,100 ரூபாய் முதலீடு செய்திருந்தார். ஆனால், எட்டு மாதங்களுக்கு பிறகு சித்ரா ஏலச்சீட்டு நடவடிக்கைகளை நிறுத்திவிட்டதாக கூறப்படுகிறது. இதனால், லட்சுமி மேற்கண்ட கடன் தொகையும், ஏலச்சீட்டு முதலீட்டுத் தொகையும், வட்டி உள்ளிட்ட மொத்தமாக 13,50,000 ரூபாயை சித்ராவிடம் திரும்பக் கேட்டு, அந்தத் தொகைக்கான காசோலை ஒன்றையும் பெற்றிருந்தார். ஆனால், அந்தக் காசோலையை வங்கியில் செலுத்தியபோது, சித்ராவின் எஸ்.பி. வங்கி கணக்கில் போதிய தொகை இல்லாததால் செக் பவுன்ஸ் ஆனது. இதையடுத்து மே 12-ம் தேதி லட்சுமி நேரில் சென்று சித்ராவின் வீட்டில் பணத்தை கேட்கச் சென்றபோது, சித்ரா மற்றும் அவருடைய மகள் கிருபாஸ்ரீ (வயது 27) ஆகியோர், லட்சுமியிடம் தகாத வார்த்தைகள் பேசி மிரட்டல் விடுத்ததாகவும் கூறப்படுகிறது. இதுபற்றி லட்சுமி பசுபதிபாளையம் போலீசில் புகார் அளித்த நிலையில், போலீசார் சித்ரா மற்றும் கிருபாஸ்ரீ ஆகியோர்மீது வழக்குப்பதிவு செய்து, தீவிர விசாரணை நடத்தி வருகின்றனர்.