ஜீவனாம்சம் பெற வரலட்சுமியின் தொடர் போராட்டம்

கருங்கல்பாளையம் ஆறுமுகம் வீதியைச் சேர்ந்த வரலட்சுமி என்ற பெண், பல ஆண்டுகளாக ஜீவனாம்சம் கோரி நீதிமன்றம், போலீசாரின் கதவுகளை தட்டி வருகிறார். நேற்று, ஈரோடு கலெக்டர் அலுவலகம் முன்பு சாலையில் அமர்ந்து மறியலில் ஈடுபட முயன்ற அவர், சிறப்பு பிரிவு போலீசாரால் தடுக்கப்பட்டு, போலீஸ் அறைக்கு அழைத்துச் செல்லப்பட்டார்.

அங்குள்ள அதிகாரிகளிடம் அளித்த மனுவில், நானும் என் கணவர் அய்யப்பனும் பிரிந்த நிலையில் உள்ளோம். எங்கள் மகள் தனஸ்ரீ திருமணமாகி தற்போது விருத்தாசலத்தில் வசிக்கிறார். 2015ஆம் ஆண்டு, குடும்ப நல நீதிமன்றம், எனக்கும் மகளுக்கும் மாதம் தலா ₹5,000 ஜீவனாம்சம் வழங்க உத்தரவிட்டது. ஆனால், என் கணவர் அதை இன்று வரை செலுத்தவில்லை. இதற்காக மேல்முறையீடு செய்தேன். நீதிமன்றம் பிடியாணை பிறப்பித்தும், சத்தி போலீசார் எந்த நடவடிக்கையும் எடுக்கவில்லை. தற்போது என் கணவர் சத்தியமங்கலத்தில் தொழில் செய்து வருகிறார். அவரை கைது செய்து நீதிமன்றத்தில் ஆஜர்படுத்த வேண்டும். போலீசாரின் செயல்பாடு தொடர்பாக நடவடிக்கை எடுக்க வேண்டும் எனத் தெரிவித்துள்ளார்.

வரலட்சுமி, இதே கோரிக்கையுடன், தொடர்ந்து கலெக்டர் அலுவலகம் வருவதும், மனு அளிப்பதும், மறியலில் ஈடுபட முயல்வதும் சகஜமாகியுள்ளன. ஆனாலும், அவரது நீண்ட போராட்டத்திற்கு நியாயமான முடிவுத் தீர்வு எப்போது கிடைக்கும்  என்பது கேள்விக்குறியாகவே உள்ளது.