அரசு திட்டங்களுக்கு தகுதியான பயனாளிகளை தேர்வு செய்ய வேண்டும்

சேலம் மாவட்ட வளர்ச்சி, ஒருங்கிணைப்பு மற்றும் கண்காணிப்பு குழு கூட்டம் நேற்று சேலம் கலெக்டர் அலுவலகத்தில் நடைபெற்றது. இந்த கூட்டத்திற்கு கலெக்டர் பிருந்தாதேவி தலைமையிலும், குழு தலைவர் மற்றும் சேலம் மக்களவை உறுப்பினர் செல்வகணபதி இணைத் தலைமையிலும் கூட்டம் நடத்தப்பட்டது. இதில் உரையாற்றிய எம்.பி. செல்வகணபதி, மாவட்ட ஊரக வளர்ச்சி முகமை சார்பில் செயல்படுத்தப்படும் தேசிய ஊரக வேலை உறுதி திட்டம், ஊரக குடிநீர் இயக்கம், பிரதம மந்திரி குடியிருப்பு திட்டம், தூய்மை பாரத் இயக்கம் உள்ளிட்ட 37 திட்டங்கள் குறித்த ஆய்வுகள் மேற்கொள்ளப்பட்டுள்ளதாக தெரிவித்தார். அரசு கொண்டு வரும் அனைத்து நலத்திட்டங்களும் பயனாளிகளுக்கு முழுமையாக கிடைக்க வேண்டும் என்பதே நோக்கம் என்பதை அவர் வலியுறுத்தினார். அதற்காக திட்டங்கள் தாமதமின்றி செயல்பட வேண்டும் என்றும், அவற்றை செயல்படுத்தும் பொறுப்பு அரசு அலுவலர்களிடமே இருப்பதாகவும் கூறினார். குறிப்பாக, பயனாளிகள் தேர்வு செய்யும் போது மிகுந்த கவனத்துடன் தகுதியானவர்களை தேர்ந்தெடுக்க வேண்டும் என்றும், திட்டங்கள் மூலம் தேவைப்படும் பணிகளை விரைவாக முடிக்க அதிகாரிகள் முனைப்புடன் செயல்பட வேண்டும் என்றும் கூறினார். இந்த கூட்டத்தில் மேட்டூர் மாநகராட்சி மேயர் ராமச்சந்திரன், நகராட்சி கமிஷனர் இளங்கோவன், எம்.பி.க்கள் மணி, மலையரசன், மாதேஸ்வரன், எம்.எல்.ஏ. சதாசிவம், மாவட்ட வருவாய் அலுவலர் (டி.ஆர்.ஓ.) ரவிக்குமார் உள்ளிட்ட பலர் கலந்து கொண்டு கருத்துகள் பரிமாறினர்.