பா.ஜ. சார்பில் 'ஆப்பரேஷன் சிந்துார்' வெற்றி ஊர்வலம்

சேலம் மாவட்டம் பனமரத்துப்பட்டி அருகே கெஜ்ஜல்நாயக்கன்பட்டியில் அமைந்துள்ள பா.ஜ.க. லோக்சபா தொகுதி அலுவலகத்தில், சேலம் கிழக்கு மாவட்ட நிர்வாகிகளின் ஆலோசனை கூட்டம் நேற்று நடைபெற்றது. இந்த கூட்டத்திற்கு மாவட்ட பொதுச்செயலர் ராஜேந்திரன் தலைமை வகித்தார். அவருடன் மற்றொரு மாவட்ட பொதுச்செயலர் ராமச்சந்திரன், மாவட்ட செயலர் கந்தசாமி உள்ளிட்ட முக்கிய நிர்வாகிகள் கலந்து கொண்டு பேசினர். கூட்டத்தில் 'ஆப்பரேஷன் சிந்துார்' வெற்றியை வரவேற்கும் வகையில் நாளை மாலை நரசிங்கபுரத்தில் தொடங்கி ஆத்துாரில் நிறைவடையும் வெற்றி ஊர்வலத்தை தேசிய கொடியுடன் நடத்த திட்டமிடப்பட்டுள்ளது. இந்த ஊர்வலத்தில் ஒவ்வொரு ஒன்றியத்திலிருந்தும் 100க்கும் மேற்பட்டோர் பங்கேற்க திட்டமிடப்பட்டுள்ளனர். மாநில தலைமை அனுமதி பெற்றவுடன், ஒன்றியம், டவுன் பஞ்சாயத்து மற்றும் ஊராட்சிகளில் வெற்றி ஊர்வலங்களை நடத்துவது தொடர்பாகவும் ஆலோசிக்கப்பட்டது. இந்த கூட்டத்தில் மாநில பொதுக்குழுவின் முன்னாள் உறுப்பினர் சின்னுராஜ், ஒன்றிய முன்னாள் தலைவர் மோகன்ராஜ், வீரபாண்டி தொகுதி நிர்வாகிகள் உள்ளிட்டோர் பங்கேற்று கருத்துகளை பதிவு செய்தனர்.