நாமக்கல்லில் ஒரே நாளில் முட்டை விலை 30 பைசா சரிவு: ஒரு முட்டை ரூ. 4.60: பண்ணையாளர்கள் அதிர்ச்சி

நாமக்கல்,

நாமக்கல் மண்டலத்தில் முட்டை விலை ஒரே நாளில் 30 பைசா விலை சரிவடைந்து, ஒரு முட்டையின் விலை ரூ. 4.60 ஆக நிர்ணியக்கப்பட்டதால், பண்ணையாளர்கள் அதிர்ச்சி அடைந்துள்ளனர்.

நாமக்கல், சேலம், ஈரோடு, பெருந்துறை, கோவை உள்ளிட்ட நாமக்கல் மண்டலத்தில், 1,000க்கும் மேற்பட்ட கோழிப்பண்ணைகள் உள்ளன. இங்கு, 6 கோடி முட்டைக் கோழிகள் வளர்க்கப்படுகின்றன. அவற்றின் மூலம், தினசரி சுமார் 5 கோடி முட்டைகள் உற்பத்தி செய்யப்படுகிறது. உற்பத்தி செய்யப்படும் முட்டைகள், தமிழக அரசின் சத்துணவு திட்டத்திற்கும், வெளிநாட்டிற்கும் ஏற்றுமதி செய்யப்படுகிறது. மேலும், கேரளா உள்ளிட்ட வெளி மாநிலங்களுக்கும், தமிழகத்தின் பல்வேறு மாவட்டங்களுக்கும், விற்பனைக்காக தினமும் லாரிகள் மூலம் அனுப்பி வைக்கப்படுகிறது.

தேசிய முட்டை ஒருங்கிணைப்புக்குழு (என்இசிசி), தினசரி பண்ணைகளில் ரொக்க விற்பனைக்கு, முட்டை விலையை அறிவித்து வருகிறது. அதை பண்ணையாளர்கள் கடைபிடித்து வருகின்றனர். கடந்த, 24ம் தேதி, ரூ. 4.85 ஆக இருந்த ஒரு முட்டையின் விலை 5 பைசா உயர்ந்து ரூ. 4.90 ஆனது. இந்த நிலையில் இன்று மாலை என்இசிசி மண்டல தலைவர் சிங்கராஜ் தலைமையில் நடைபெற்ற கூட்டத்தில், முட்டை விலை ஒரே நாளில் 30 பைசா குறைக்கப்பட்டு ஒரு முட்டையின் பண்ணைக்கொள்முதல் விலை ரூ. 4.60 ஆக நிர்ணயிக்கப்பட்டது. தேசிய முட்டை ஒருங்கிணைப்புக்குழு (என்இசிசி) என்பது பண்ணையாளர்களுக்கான ஒரு அமைப்பாகும். என் முட்டை என் விலை என்ற குறிக்கோளை அடிப்படையாக கொண்டு, பண்ணையாளர்களே முட்டை விலை நிர்ணயிக்கும் வகையில், இந்த அமைப்பு செயல்பட்டு நாள் தோறும் முட்டை விலையை அறிவித்து வருகிறது. ஆனால் முட்டை விற்பனையார்கள் என்இசிசி அறிவிக்கும் விலையில் இருந்து 50 முதல் 60 பைசா வரை மைனஸ் விலை வைத்து கொள்முதல் செய்கின்றனர். இதனால் பண்ணையாளர்களுக்கு மட்டுமல்லாமல் முட்டை சாப்பிடும் நுகர்வோருக்கும் பாதிப்பு ஏற்படுகிறது.

இந்த பிரச்சினைக்கு தீர்வு காணும் வகையில், அகில இந்திய அளவில் என்இசிசி விலையை கண்காணிக்கும் வகையில் கண்காணிப்புக்குழு அமைக்கப்பட்டுள்ளது. அதன் அவசரக் கூட்டம் நாளை 28ம் தேதி காலை நாமக்கல் என்இசிசி அலுவலகத்தில் நடைபெற உள்ளது. இந்த நிலையில் ஒரே நாளில் முட்டை விலை 30 பைசா சரிவடைந்துள்ளதால் பண்ணையாளர்கள் அதிர்ச்சி அடைந்துள்ளனர்.

முக்கிய நகரங்களில் ஒரு முட்டையின் விலை (பைசாவில்): சென்னை 500, பர்வாலா 475 , பெங்களூர் 500, டெல்லி 490, ஹொஸ்பேட் 450, ஹைதராபாத் 445, கொல்கத்தா 545, மைசூர் 500, விஜயவாடா 485.

கோழி விலை: பிராய்லர் கோழி உயிருடன் ஒரு கிலோ ரூ. 84 ஆக அறிவிக்கப்பட்டுள்ளது. முட்டைக்கோழி ஒரு கிலோ ரூ. 65 ஆக சிகா நிர்ணயித்துள்ளது.